බිංදු බිංදු වැහි වැටෙන වෙලාවට

වැහි බිඳු අතරින් පෙනෙන නුඹේ රුව

සීතල මඳ නල ගත දැවටෙන විට

සිහිනෙන් ඇවිදින් තුරුලු වෙන්න මට

හෙණ හඬ නඟමින් නුබ එලි කළ විට

බියට තිගැස්සී වෙව්ලන නුඹෙ ගත

වැටෙන මේඝයේ හඬට වඩා මට

ඇසුණා වේගෙන් ගැහෙන නුඹේ හද

ප්‍රේමය දයාව මඳහස එක් කළ

බැල්මක් දුන්නෙමි සිහිනෙන් නුඹ හට

අවිහිංසක බැල්මක් හෙළමින් නුඹ

තුරුලු වුණා තව තව මගෙ පපුවට

දුටු සියල්ල සිහිනයක්ම වන බව

පෙන්වූයේ ගිගුරුම් කෑ හෙණ හඬ

නුඹ මා නොදැකම පසු වූ කාලය

දන්නේ මා සරසවි බිම පමණය

Written By Pasindu Manod

Image Courtesy: https://bit.ly/37G2QTO