ටික දවසක් ඉවසාපන් පින්බර දේවී

Deshapriya , , 0 Comments

නුවර එළියෙ, පූලෑව ගම්මානයේ, ටිකක් දුරින් දුරින් පිහිටා තිබුණු, ගෙවල් දෙකක බොහොම පිරිපුන්ව වැඩුණු, තරුණ වයසෙ බව්වො දෙපළක් තමයි ශේන් සහ ටයිනි. දවසක් මහ නගර සභාවෙන් පවත්වපු එන්නත් සායනයකට ගෙවල් වල උදවිය එක්ක ආපු ගමනකදි තමයි මුලින්ම මේ ඇස් එකිනෙක මුණගැහෙන්නෙ. එදා ඒ නෙතගැටීමත් එක්ක ඇති වුණ අමුතුම ආකර්ෂණය නිසා තමයි හැමදාම මේ දෙපළ ඉර බැහැගෙන යන ජාමෙට ‘කහටලන්ද තේ වතු යාය’ ගාවට, හාම්පුතාලටත් හොරාට එකතු වෙන්නෙ. අනේ… බලන්නකො, කොච්චර ලස්සනද ඒ දෙන්නාගෙ අවිහිංසක ආදරය කියල…..

මළ හිරු හිනැහෙන ගොම්මන වඩින වෙලාවේ

නළඹල නන් දුහුල් රටා මැවෙන   කලාවේ

පුරුදු ලෙසින් හමු වී අපි තෙදළු  තලාවේ

ගුලිවෙමු සොඳුරියෙ ආදර දැහැන  මුලාවේ

 

රුසිරි විසිරි  සුසිනිඳු මුදු වලා පොකුරු කැටී

සැනසුම් සුව සොයා ඇදෙති හිරු කැන් පැහැ වැටී

කතා කියති ලතාවකට මුදු පවනේ  ගැටී

පෙනෙනවාද ආදරියේ පෙම් අඹරේ  හැටී

 

පිපුණත් සිතිවිලි මනකල් හද පතුලේ  දහස

ප්‍රේමයමයි සඟවා ගන්නට  බැරි රස රහස

දෙහදක් එක්සිත් වෙන කල හද සනහන  පහස

අපෙ ආලෙට ආසිරි වැසි පිදුවේ මේ  අහස

 

රෑ අඳුරට ඔය අහසම අවනත   වේවී

නිස්කලංක සුවපිරි යස නින්දක්    දේවී

අලුත් දිනක අසිරිය රන් අරුණලු  ඒවී

ටික දවසක් ඉවසාපන් පින්බර    දේවී

 

Image Courtesy : https://bit.ly/2VfTgP4