දකුණු රටින් මහ මුහුද සිපගන්නා සුන්දරත්වයෙන් මෙන් ම ජෛව විවිධත්වයෙන් අනූන මාදු ගඟ ඉතා වටිනා වූ කඩොලාන පරිසරයකට උරුමකම් කියයි. ඉතා ඉහළ ශාක හා සත්ත්ව ප්‍රජාවක් මෙම ගංඟාව ආශ්‍රිතව නිරීක්ෂණය කිරීමට එහි සංචාරය කරන ඔබටත් හැකියාව ලැබෙන බව නම් නිසැක ය. ගඟ මැද පිහිටි ප්‍රමාණයෙන් කුඩා දූපතේ සිට විශාල දූපත දක්වා, විශාල දූපත් ප්‍රමාණයක් මාදු ගඟට හිමි ය. බණ්ඩාරනායක ජාත්‍යන්තර ගුවන්තොටුපළේ සිට ආසන්න ව කි.මී. 131 ක දුරින් පිහිටා ඇති මෙම ස්ථානයට ගමන් කළ හැකි මාර්ග කිහිපයකි. ඒවායෙන් අධිවේගී මාර්ගය භාවිතා කරන්නේ නම් ඔබට පැය 2ක් වැනි කෙටි කාලයක දී ළඟා විය හැකි ය. ඉඳින් මේ සූදානම ඔබව මාදු ගඟේ සංචාරයක් රැගෙන යාමටයි.
- සංචාරය කළ දිනය: 2021.03.22
- බණ්ඩාරනායක ජත්‍යන්තර ගුවන් තොටුපළේ සිට දුර: කි.මී. 131
එදින සුන්දර උදෑසනකි. පෙර සූදානම් වූ පරිදි 2021.03.22 වූ සඳුදා දින මෙම සංචාරය අම්බලන්ගොඩ දක්වා දුම්රිය ඔස්සේ යාමටත් පසුව ඉතිරි කෙටි දුර බසයෙන් යාමටත් අපි බලාපොරොත්තු වුණෙමු. මෙලෙස අප ගමන් මාර්ගය තෝරාගන්නා ලද්දේ දුම්රිය ගමනේ ආස්වාදය විඳ ගැනීමට ය. උදෑසන හිමිදිරියේ මරදාන දුම්රිය ස්ථානයට එක් රොක් වූ අප ටිකට් රැගෙන මැදිරියට ගොඩ වී ඉඩ අල්ලා ගත්තෙමු. ඒ මඟින් ගොඩ වන මිතුරන් සඳහා ඉඩ තබා ගැනීමට ය.
උදෑසන 6.20 පසු වී මඳ වෙලාවකින් අප ගමන ආරම්භ කරන ලද්දේ සොම්නස් සිනාවන්ගෙන් පිරුණු 3 වන පන්තියේ පළමු මැදිරියත් සමඟ ය. එසේ වුව ද පෙර කී පරිදි අප යුහුසුළු ව අල්ලාගත් ආසන කිහිපයක් ම මැදිරියේ වූ සාමාන්‍ය අනෙකුත් මගීන් සඳහා පිරිනමනු ලද්දේ බොහෝ දෙනා සිටගෙන යාමට කැමැත්තක් දැක්වූ බැවිනි. කොළඹ කොටුව, පානදුර සහ දකුණු කළුතර යන දුම්රිය නැවතුම්පළ වලින් ගමනට එක් වීමට සිටි අප මිතුරන් ක්‍රමක්‍රමයෙන් එකතු කරගනිමින් අප ගමනේ යෙදුණේ සුන්දර බටහිර වෙරළ තීරය දිගේ දිවෙන මුහුදුබඩ දුම්රිය මාර්ගයේ දෙපස පරිසරයේ චමත්කාරයත් ගත සිත පිනා යන මුහුදු සුළඟේ ආස්වාදයත් විඳගනිමින් ය. බොහෝ දෙනා මැදිරියේ දොරවල් අසළට එක් රොක් වී මෙම අත්දැකීම විඳ ගැනීමට උත්සුක වූහ.
සැබැවින් ම දුම්රිය ගමන ආස්වාදජනක ගමනක් විය. උදෑසන ආහාරය ද මැදිරිය තුළ ම අරගත් අපි සින්දු කියමින් විනෝද වූයෙමු. පිරිස එකතු ව සින්දු කියන විට මැදිරියේ සිටි අන් අය ද එය රසවිඳි බව අපට වැටහුණි. තව ද දොරවල් අසළට වී සිරි නැරඹුවෙමු. මුහුද අයිනෙන් දිවෙන මාර්ගය විටෙක නිවාස හා පැල්පත් අතරින් ගමන් කරයි. විටෙක මහා මාර්ගය ද දුම්රිය මාර්ගයට ආසන්න ව ගමන් කරයි. පෙර සඳහන් කළ පරිදි නිවාස හා පැල්පත් අතරින් ගමන් කරන විට නොයෙකුත් මානව ක්‍රියාකාරකම් නිරීක්ෂණය කිරීමට හැකි ය.
මෙම දුම්රිය ගමනේ රසවත් සිදුවීම් කිහිපයක් නිතැතින් ම මතකයට නැගේ. වරක්, එක්වර ම සිදුවූ තිරිංග තද කිරීමක් හේතුවෙන් මා හිඳ සිටි අසුනෙන් ලිස්සා ගිය බව දැනුදු මා මතක් කරනුයේ මුවගට නැගුණු සිනාවක් ද සමඟින් ය. එමෙන් ම ඡායාරූප ගැනීම සඳහා ආසන උඩ නගිමින් මැදිරියේ වහලයේ හා රාක්ක වල එල්ලෙමින් තම මුහුණ පෙන්වීම සඳහා පිරිසක් සෑම විට ම ගත් මහන්සිය දැනුදු සිහිපත් වේ. මැදිරියේ දොර ළඟට වී විනෝද වූ අයුරු මෙන් ම ඔවුන් සමඟ විනෝද වන්නට නොපැමිණ දොර අසළට වී සිටිනවා යැයි ප්‍රධාන සංවිධයකවරිය ඇතුළු පිරිසගෙන් බැනුම් ඇසුවා ද මතක ය. තවත් එක් රසවත් සිදුවීමක් සිදු විය. ඒ ගමන් කරන දුම්රියේ මැදිරි දෙක අතර ගමන් කිරීමට බියෙන් පසුවූ අප මිතුරියක් මැදිරි දෙක අතර මාරු කරවීමට අප ගත් උත්සාහයයි. එය නම් රසවත් වූ මතකයකි. මෙම සිදුවීම් මතකයට නැගෙන විට නිතැතින් ම සිනාවක් මුවඟට පැමිණේ.
මෙලෙස සුන්දර මතකයන් රැසක් එකතු කරගනිමින් අපි දුම්රිය ගමනේ අවසානය දක්වා එනම් අම්බලන්ගොඩ දුම්රිය නැවතුම්පළ දක්වා පැමිණියෙමු. එම ස්ථානයේ මඳ වෙලාවක් රැඳී සිටි පිරිස එම ස්ථනයෙන් අප හා එක් වූ පිරිස ද සමඟින් බලපිටිය පාලම අසළට යෑමට බස් රථයට ගොඩ විය. ඒ මාදු ගඟේ සවාරිය ආරම්භ කිරීමට යෙදී තිබුණේ එම ස්ථානයෙන් බැවිනි.
කෙටි බස් ගමනක් වුව ද එය ද විනෝදයෙන් සපිරි එකක් විය. උසුළුවිසුළු මැද ගමනාන්තය තෙක් පැමිණිය ද පිරිසට බසයෙන් බැසීමට පවා අමතක විය. පිරිසක් බසින විටත්, තවත් පිරිසක් බස් රථයට ම වී සිටියේ එබැවිනි. කෙසේ හෝ අවසානයේ පිරිස බැසගත් පසු අපට තේරුම්ගියේ පැමිණි බසයෙන් බාගයක් පිරිස අප මිතුරන් වූ බවයි. පසුව මාර්ගය දිගේ මඳ දුරක් පා ගමනින් ඇවිද ගොස් බලපිටිය පාලමෙන් එතෙර වූ පසු අප හට බෝට්ටු සේවාව ලබා ගැනීමට බලාපොරොත්තු වූ ස්ථානයට ළඟා වීමට හැකිවිය.
අප එම ස්ථානයට ළඟා වන විටත් මඳක් අව් රශ්මිය තදින් දැනෙන්නට වූ නමුදු තොටුපළ පවතින ස්ථානයට පිවිසීමත් සමඟ දැණුනු සිසිලස වචනයෙන් විස්තර කිරීමට සැබැවින් ම අපහසු ය. මනාලෙස පිරිපුන් ව වැඩුණු රුක් ගොමුව මෙන් ම වටාපිටාවේ වූ කඩොලාන ගොමුවත් එම ස්ථානයට හිරු කිරණ පතිත වීම වලකා තිබුණි. එසේ වුව ද එය අඳුරු ස්ථානයක් නො වීය. මඳ වෙලාවක් එම ස්ථානයට වී ගමන් විඩාව නිවා ගත් අපි සැම ගමනේ ප්‍රධාන ම අංගය වූ මාඳු ගඟේ සවාරිය ආරම්භ කිරීමට සූදානම් වීමු. රැගෙන ආ ගමන්මළු හා අනෙකුත් දෑ ආරක්ෂිත ව පසෙකින් තබා ජීවිතාරක්ෂක කබා ඇඳීම ආරම්භ කළ පිරිසගෙන් බොහෝ දෙනා නිසි පරිදි එය පැළඳ ගත්ත ද කිහිප දෙනෙක් නිසි පරිදි පැළඳ ගැනීමට අපොහොසත් ව සිදු කර තිබූ දේවල් අන් අයගේ හාස්‍යයට හේතු විය. කෙසේ හෝ අවසානයේ සියල්ල සූදානම් කරගත් අප රැගෙන යාමට අවශ්‍යය ද්‍රව්‍යයද රැගෙන නවතා තිබූ බෝට්ටු දෙකට ගොඩ වීමු.
බෝට්ටුවේ වූ එන්ජිම පණ ගැන්වීමෙන් අනතුරු ව තොටුපළින් නික්ම මඳින් මඳ ගඟ මැද්දට සේන්දුවත් ම සිත්වල හටගත් ප්‍රීතිය සෑම මුහුණක ම දකින්න ලැබුණි. ගඟ මැදට පැමිණීමෙන් පසුව සෙමෙන් සෙමෙන් ගමන වේගවත් වන්නට වීය. නමුදු බෝට්ටු ක්‍රියාකරු මඳක් සෙමෙන් එය ධාවනය කරන්නට වූයේ ගඟ මැද හරහට දමා තිබූ විශාල කඹ හේතුවෙන් මෙන් ම අපට පසුව පිටත් වන්නට තිබූ බෝට්ටුව පැමිණෙන තෙක් ය. ගඟ හරහා එලෙසින් කඹ ඇද අත්තේ වේගයෙන් බෝට්ටු ධාවනය කිරීම හේතුවෙන් ගංගාව ආශ්‍රිත පරිසරයට සිදු වන හානිය වළක්වා ගැනීමට යැයි අප හට සිතුණි.
ක්‍රමයෙන් කඩොලාන හා මඟින් මඟට හමු වූ ඉස්සන් කොටු පසු කරමින් ඉදිරියට ඇදෙන්නට වූ අප, දෙපස වූ පරිසරයේ චමත්කාරය සතුටින් විඳ ගන්නා ලදී. මෙලෙස මඳ දුරක් ඉදිරියට ඇදෙන විට අපට හමු වූයේ ගඟ මට්ටමට ඉතාමත් පහත් වූ පාලමකි. සැබවින් ම එය නම් අවධානයෙන් නො යන්නේ නම් අනතුරක් ඇති කරවන තරම් ය. මන්ද යත් එය බෝට්ටුවේ හිඳ සිටි අපගේ උරහිස් මට්ටමට තරම් පහතින් තිබූ නිසාවෙනි. සැබවින් ම මාඳු ගඟ දිගේ සංචාරය කරන ඔබට මෙවැනි පාලම් කීපයක් ම හමුවේ. පාලම පසුකර මඳ දුරක් ඉදිරියට ඇදෙන්නට වූ අප ක්‍රමයෙන් ගඟ ඉවුරට ළං වන්නට වූ අතර අප ඉදිරියෙන් දිස් වන්නට වූයේ කඩොලාන රුක් ගොමුව තුළට වූ විවරයකි. පිරිසගේ කුතුහලය ක්‍රමයෙන් වැඩිවත් ම අප ක්‍රමයෙන් එය තුළට ඇතුළු වීමු. එය නීල හරිත කඩොලාන ගොමුව තුළ සෑදුණු කුහරයකි. ඇත්තෙන් ම කියනවා නම් කුඩා උමං බිංගෙයක් වැනි ය. මෙම උමං බිංගෙයට ඇතුළු වත් ම එතෙක් වෙලා දැඩි අව් රශ්මියේ නැහැවෙමින් තිබූ අප ගතට දැණුනු සනීපය වචනයෙන් කියා නිම කළ නො හැක. මනා ලෙස රුක් ගොමුවෙන් ආවරණය වී පැවතීම නිසා එම ස්ථානය සිසිල් මෙන් ම සුවදායක තැනක් විය. තවත් මෙවැනි ම ස්ථාන කීපයක් පවතින බව අපගේ බෝට්ටු ක්‍රියාකරු අප සමඟ ප්‍රකාශ කරන ලදී. එම ස්ථානයට වී පරිසරයට සවන් යොමා නිහඬ ව බලා සිටි අප මඳ වෙලාවක් රැඳී සිටීමෙන් අනතුරු ව ඡායාරූප කිහිපයක් ගැනීමෙන් අනතුරු ව තැනින් තැනින් එල්ලුණු කරු මුල් මඟහරිමින් අප ක්‍රමයෙන් නැවතත් ගුහාවක් වන් එම ස්ථානයෙන් පිටතට පැමිණ ගංඟාවට පිවිසෙන ලදී.
නැවතත් ගමන ආරම්භ විය. බෝට්ටුව තුළ සිටි පිරිසගේ සිනා හඬ පිරුණු කතාබහත් එකිනෙකාට විවිධ දේවල් කියමින් කළ විහිළුතහළුත් ඒවාට බඳුන් වූ අයගේ කෑ ගැසීමුත් එමෙන් ම විටින් විට මුහුණ පිසගෙන යන සිහින් පිනිපහරත් සිරුර මත නොනවත්වා පතිත වන හිරු කිරණින් එල්ල වන පීඩාව අමතක කරලීමට සමත් විය. මෙලෙස විනෝදයෙන් පිරුණු අප ඊළඟට ළඟා වූයේ තවත් අමතක නො වන ස්ථානයකට ය. “ෆිශ් තෙරපි” සේවාව ලබා ගත හැකි ස්ථානයක් වූ මෙම තොටුපළට අප ගොඩවූයේ විවිධ තර්ක විතර්ක මැද බව නම් මතක තිබේ. ඒ මෙම ක්‍රියාවේ යෙදෙනවා ද නැද්ද යනුවෙනි. නමුදු බහුතර කැමැත්ත එය වූ බැවින් අපි එහි නිරත වීමට තීරණය කළෙමු. එයට තවත් එක් හේතුවක් විය. එනම් අපගේ අනෙක් බෝට්ටුව පැමිණෙන තෙක් කාලය ලබා ගැනීමටයි.
සේවාව ලබා ගැනීම සඳහා එම ස්ථානයේ පිරිස සමග සාකච්ඡා කොට සූදානම් වීය. එම ස්ථානයේ පිහිටීම පළමුව විස්තර කළ යුතු ය. පාවෙන විශාල බැරල් මත ලෑලි වලින් ඉදිකරන ලද පාලම් වන් කොටස් මතින් ගමන් කළ යුතු වූ අතර එම බැරල් වලින් ම වටකර ගඟ දියේ සාදන ලද මාළු කොටු තුළ විවිධ ප්‍රමාණයෙන් වූ මාළු වර්ග දැකගත හැකි විය. අප හට පෙන්වන ලද ස්ථාන වෙත ගමන් ගත් පිරිස පෙර කී ලෑලි පාලම් මත හිඳ කකුල් වතුරේ ගිල්වා සිටින්නට විය. සැබවින් ම එය පිරිසකට නම් මහත් විනෝදයක් විය. නමුදු තවත් පිරිසකට එය බියක් ද තවත් පිරිසකට හිරිකිතයක් ද ගෙන දෙන්නට වූ අතර බොහෝ දෙනා කුතුහලය හේතුවෙන් ම ක්‍රමයෙන් තම කකුල් ජලය තුළට දමන ලදී. සමහරු මේ සඳහා යම් කාලයක් ගත් අතර කෙසේ හෝ යහළුවන්ගේ පෙළඹවීම මත අවසානයේ සිදු කළත් කිසිසේත් ම එය සිදු නොකළ කිහිප දෙනෙක් විය. ඉන් එක් අයෙකු පිරිස අතර ඇවිදිමින් ඡායාරූප ගැනීමටත්, වීඩියෝ කිරීමටත් උත්සුක වූ අතර තවත් තැනැත්තියක අප අතර එහා මෙහා යමින් තම කකුල් වතුරට දමන ලෙස පිරිසගෙන් එන ඉල්ලීම් වලට පිළිතුරු දෙමින් යහළුවන්ගේ කකුල් අසළට මාළු කෑම දමමින් විනෝද වූ අතර කිහිප විටක ම කකුල් බලෙන් වතුරේ ගිල්වීමට කළ උත්සාහයන් කෑ ගසමින් ප්‍රතික්ෂේප කරන්නට විය. සැබැවින් ම ඇයගේ එම කෑ ගැසීම ගඟේ එහා ඉවුරටත් ඇසුණාදැයි අපට සිතුණු වාර නම් බොහෝ ය. එමෙන් ම විටින් විට ගමන් නායිකාව වූ ඇයට වෙනත් හේතූන් මත විවිධ විහිළු කිරීම් වලට ලක් වූ බව ද දැනුදු සිහිපත්කරනුයේ සිනා මුසු මුහුණෙනි. මෙම සියලු සිද්ධීනුත් පෙර නොපුරුදු ව කකුල් වතුරට දමා මාළුන් සපාකන විට සමහර පිරිස් කළ කෑ ගැසීමුත් අප එම අවස්ථාවේ සිනා සාගරයක ගිල්වීමට සමත් විය. තව එක් දෙයක් මෙහිලා සිහිපත් කළ යුතු ය. මාළුන් සපාකන විට පළමුව සියුම් වේදනාවක් දැණුන ද පසුව එය කකුලට සනීපයකි. එමෙන් ම මෙහි දී ඔබට ප්‍රමාණ කීපයක ම මාළුන් සිටින ස්ථාන වලට කකුල් යොමා බැලිය හැකි ය.
ඒ වන විටත් අපගේ අනෙක් බෝට්ටුවත් එම ස්ථානයට පැමිණ තිබුණු අතර ඔවුන් ද එලෙස ම විනෝද වෙමින් පසුවිය. අප එම ස්ථානයෙන් නික්ම වූයේ බොහෝ වෙලාවක් විනෝද වීමෙන් අනතුරුව ය. එසේ වුව ද කාලය ගෙවී යනවා අපට නො දැණුනු තරම් ය. මාදු ගඟේ සංචාරය කරන ඔබ විශේෂයෙන් යා යුතු ම විනෝදය සපිරි ස්ථනයක් ලෙස මෙම ස්ථාන මම දකිමි. එම ස්ථනයෙන් අප නැවත ගමන් ආරම්භ කළේ මතක ගොන්නක් ද රැගෙන ය.
දැන් නම් මධ්‍යහ්නය ආසන්න ය. දැඩි අව් රශ්මියෙන් එල්ලවන පීඩාව ද දිය මත ගමන් කිරීම නිසා විසි වන සිහින් දිය බිඳු වල ආශ්වාදය විඳිමින් මෙන් ම තම “ස්කින් එක අවුට් යනවා” කියමින් කිහිප දෙනෙකු කළ කෑ ගැසීම් ද මැදින් බෝට්ටු දෙක සමාන්තර ව යාත්‍රා කරන්නට වීය. බෝට්ටු දෙකේ සිටි පිරිස් එකිනෙකාට සිදු කළ කෑ ගැසීම් පැහැදිලි ව නෑසුණේ එන්ජින් ශබ්දය හේතුවෙනි. එමෙන් ම ගමන් කරන අතරතුර බොට්ටු දෙකක අතර කිරල ගෙඩිවලින් ගසා ගැනීම ද අප පිරිස සිදු කරන ලද්දේ විනෝදය පිණිස ය.
කෙසේ හෝ මෙලෙස දූපත් කිහිපයක් පසු කරමින් ඉදිරියට ඇදුණු අපගේ මීළඟ නැවතුම වූයේ දූවේ පන්සල ය. එම ස්ථානයට ගොස් වැඳ පුදා ගැනීමෙන් අනතුරු ව පඬුරු දමා මඳ වෙලාවක් එහි ගත කළ අප නැවත ඒමට පිටත් විය. ඒ ගමන සඳහා අප සිතුවටත් වඩා කාලයක් ගත වන්නට වූ බැවින් ය. නැවත පැමිණීමට පිටත් වූ අප හට කෙටි කාලයක් ගත වේයැයි සිතා අප රැගෙන ආ ජල ප්‍රමාණය ප්‍රමාණවත් වූයේ නැති බැවින් පිපාසය ද, ආහාර කිසිවක් ද රැගෙන නොපැමිණි බැවින් මේ වන විට මඳ කුසගින්නක් ද දැනෙමින් පැවතුණි. නමුදු සමහරෙකුට එය ඉවසා සිටීමට අපහසු තරම් එකක් වූ බවත් කිසි දිනෙක එම අත්දැකීම විඳ නැති බවත් පෙනෙන්නට තිබුණි. ඔවුන් එය අර්ථ දැක්වූයේ “යකෙක් කන්න තරම් බඩගිනි” බව ප්‍රකාශ කරමින් ය. නමුදු ඔවුනට ඉවසා සිටීමට සිදු විය.
නැවත පැමිණෙන අතරතුර අප තවත් එක් ස්ථානයකට ගොඩ විය. ඒ කුරුඳු තලන ස්ථානයක් නැරඹීමට ය. කුරුඳු තලන ආකාරය අපට පහදා දුන් එම ස්ථානයෙන් අපට කුරුඳු තේ එකක් නොමිලේ ම ලබා දෙන ලදී. සැබැවින් ම එය රසවත් ය. කුරුඳු කුඩු යොදා සාදන ලද මේවාට සීනි හෝ පැණි රසකාරකයක් දමා නොතිබුණි. නමුත් එයින් ලැබුනු පැණිරසට හුරු රසය දිව පිනා යන්නක් විය. කුරුඳු තැලීම පිලිබඳ ව අපට කියා දුන් තැනෙත්තා ද විහිළු සහගත අයෙකු වූ නිසාවෙන් අපට එම ස්ථානයෙන් ගෙන ආවේ ප්‍රීතියකි. ඔහු තම විස්තරය කරන අතරතුර තමා වටා සිටි පිරිසට විවිධාකර කතා කියන්නට විය. විටෙක කුරුඳු තේ බොමින් සිටි කිහිප දෙනෙක්ට කෙට්ටු වීමට හැකියැයි පවසන ලද ඔහු කුඩා සිරුරක් හිමි අපගේ යහළු යෙහෙළියන්ට විහිළු කරන්නට වූයේ තවත් කෙට්ටු වෙයි යැයි ප්‍රකාශ කරමිනි. සුද්ද කර අවසන් වූ කුරුදු පොල්ල නඩේ ගුරීට පිරිනැමීමට සූදානම් වූයේ පිරිස පාලනයට කුරුඳු පොලු වඩා උචිත බව පවසමින් ය. කුරුඳු තෙල් වල භාවිත හා ප්‍රයෝජන පිලිබඳ ව අපට පැහැදිලි කරමින් බාම් වර්ග සඳහා යොදා ගනුයේ ද මෙම තෙල් ම බව අප හට ඒත්තු ගැන්වීමට හිසේ රදේ පවතින අයෙකු සිටිනවාදැයි අසන විට එක් අයෙක් තමාට ඔලුව රිදෙනවායැයි කියමින් පැන ඉදිරිපත් වූයේ සැබැවට ම හිසේ රදේ පැවති නිසා ම දැයි දන්නේ ඔහු ම පමණි. ඔහුගේ හිසේ තෙල් ස්වල්පයක් ආලේප කළ පසු දැන් එය හරි යැයි කියා සිටි අතර සිටි සියල්ලට ම කුරුඳු තෙල් වල සුවඳ බැලීමට අවස්ථාව හිමි විය. මේ අතර අප පිරිසේ තවත් එක් සුපිරි චරිතයක් විය .සැබැවින් ම “ටියුබ්ලයිට් කාරයෙකු” වූ ඔහු එම කුරුඳු තලන්නා කරන ලද බොහෝ විහිළු වලට අප සිනාසී අවසන් වූ පසු “ඒ මොකක්ද කිව්වේ?” යැයි බොහෝ විට අපෙන් ඇසීය.
තව ද ඔහු තම නිෂ්පාදන අලෙවි කිරීම පිණිස පැවසූ තවත් එක් ප්‍රකාශයක් සිහියට නැගේ. කුරුඳු තෙල් ඇඟේ අමාරුවට කදිම යැයිත්, කුරුඳු කුඩු පානය ඉතා ගුණදායක බවත්, කුරුඳු ඉතාමත් හොඳ මට්ටමේ ඒවා යැයි ප්‍රකාශ කළ හෙතෙම මේවා ගෙන ගොස් නැන්දම්මලාට ලබා දීමෙන් ඔවුන් ව යාළු කරගත හැකි බවත් ‘ෂේප් එකේ’ තබා ගත හැකි බවත් ප්‍රකාශ කරන ලදී. මෙම ප්‍රකාශය අප සිනා සාගරයක ගිල් වූ නමුදු බොහෝ පිරිසක් යුහුසුළු ව ඒවා මිලදී ගත්තේ ඔවුන්ගේ නැන්දම්මලා ‘ෂේප්’ කර ගැනීමටයැයි අපට සිතුණි. එමෙන් ම එම ස්ථානයේ ඡායරූප ගැනීම සඳහා ඩොලර් අයකරනවා යැයි පැවසීමෙන් අනතුරුව අප මිතුරියකගේ මුහුණේ ඇති වූ වෙනස්කම තාමත් මතක ඇති අතර එම පෙනුමට “ඩොලර් ලුක්” යැයි නමක් පටබැඳීමට අන් පිරිස දක්ෂ විය. මෙලෙස එම ස්ථානයේ ගත කළ කාලය සතුටින් හිත් පිරී යන්නක් විය. වරක් එම ස්ථානයේ තොටුපළේ වූ කදුරු ගෙඩියක් “මේ මොකක්ද” යැයි අසමින් කඩා ගැනීමට උත්සාහ කළ අප මිතුරෙකු ඒවායේ විස සහිත බව දැනගත් විගස ඇල්ලීමටවත් නො ගොස් ආපසු හැරුනු අන්දම සියල්ලන්ට ම මතක ය.
අප නැවත එම ස්ථානයෙන් පැමිණීමට පිටත් වූයේ උදෑසන පටන් කිරල බීම බීමට රුසියෙන් පසු වූ අයෙකුගේ බලාපොරොත්තු බිඳ හෙළමිනි. පෙර ගමන් කල මාර්ගයේ ම දෙපස පරිසරයේ අසිරිය විඳ ගනිමින් අප නැවත ගමන් ආරම්භ කළ ස්ථානයට ක්‍රමයෙන් ළං වූයේ මඟ දී හමු වූ මාළු කොටුවක් ආසන්නයට ගොස් නැරඹීමෙන් අනතුරුව ය. තොටුපළ ආසන්නයට පැමිණි අප එක්වර ම එහි නො ගොස් පාලම පසු කරමින් මුහුද දෙසට ඇදෙන්නට වුයේ මෝය කට නැරඹීමට ය. නමුත් එයට ප්‍රථම ව එක් අයෙකු තොටුපළට ඇරලවීම සඳහා ගඟ මැද දී බෝට්ටු අතර මාරු වූ අවස්ථාව නම් සියල්ලන්ට ම අමතක නො වන සිදුවීමකි. එලෙස මාරු වන විට බෝට්ටු පැද්දෙන්නට වූ අතර පිරිසේ මුහුණු දෙස එම අවස්ථාවේ බලන්නට වටී. බෝට්ටුව පෙරළේවි ද යන සැකය ගැබ් ව තිබූ ඔවුන්ගේ මුහුණු මතකයට නැගෙන විට මෙම සටහන ලියන මා හට සිනහා පහළ වීම වළක්වා ගත නො හැකි ය. එලෙස මාරු වීමෙන් අනතුරු ව ගමන් අරභා මාදු ගඟේ මෝය කටට ආසන්න වූ අප මුහුද දෙස මඳ වෙලාවක් බලා හිඳ ඈතින් පෙනෙන මුහුදේ අසිරිය විඳගැනීමෙන් අනතුරුව ආපසු තොටුපළ දක්වා ගමන් ඇරඹීය.
නවමු අත්දැකීම් රාශියක් එක් කරගනිමින් පරිසර සුන්දරත්වය විඳිමින් ප්‍රිතිමත් ව සාර්ථක ලෙස මාදු ගඟේ සංචාරය අවසන් කළ අප තොටුපළට පිවිසියේ බඩුබාහිරාදිය ද රැගෙන මීළඟ නැවතුම වූ හික්කඩුව වෙරළ බලා යාමට ය. මඳ වෙලාවක් පෙර කී තුරු සෙවණට වී ගිමන් නිවාගනිමින් කාලය ගත කළ අප එම ස්ථානයෙන් නික්ම පැමිණියේ මතක ගොන්නක් ද තුරුලු කරගෙන ය.
මාර්ගයට පැමිණි අප මාතර දක්වා දිවෙන බසයක නැගී හික්කඩුව වෙරළ තීරය බලා පැමිණි අතර එම ස්ථානයේ සෙවණක පිහිටි හෝටලයකින් දිවා ආහාරය ගන්නා ලදී. මුහුදු වෙරළ අයිනට වී මුහුදු සුළඟෙ ආස්වාදය ලබමින් මිතුරන් සමඟ ලබාගත් දිවා සැබැවින් ම රසවත් විය. තව ද ඒ අතරතුර සිදු වූ සමහර සිදුවීම් අපි දැණුදු සිහිපත් කරමින් සිනහ වන්නෙමු. දිවා ආහාරයෙන් අනතුරු ව අප බොහෝ දෙන මුහුදට බැස නාමින් ක්‍රීඩා කරමින් විනෝද වන්නට වූ අතර කාලය ඉක්මනින් ගෙවී යන්නට විය. රෑ බෝ වීමට ආසන්න වූ හෙයින් පැය දෙකකට වඩා අධික කාලයක් මුහුදු ජලයේ විනෝද වූ අප ගොඩට පැමිණ පිරිසිදු වී හැඳ පැළඳගෙන ආපසු පැමිණීමට සූදානම් විය.
අනතුරු ව පෙර දිනයකත් පසු දාත් උපන්දින යෙදී තිබූ අප යෙහෙළියන් දෙදෙනෙකුගේ උපන්දින සැමරීම එම ස්ථානයේ ම සිදුකළ අප ඡයරූප ගැනීමෙන් අනතුරු ව ආපසු පැමිණීමට පිටත් වූයේ සියල්ලන්ගේ ම මුව රැඳි සිනවන් ද සමඟ ය. පිරිසක් ගාලු පාර ඔස්සේ ද තවත් පිරිසක් අධිවේගී මාර්ගය ඔස්සේ ද ආපසු යාමට නියමිත ව තිබූ හෙයින් පිරිස මාර්ගය අසළින් වෙන් ව තම නිවෙස් බලා යාමට පිටත් විය.
ඉඳින් මේ අන්දමින් සාර්ථක සංචාරයක නිමාව සටහන් කරමි. ඔබත් සංචාරයේ යෙදීමට ප්‍රිය අයෙක් නම්, ඔබ සංචාරය කළ යුතු ම ස්ථානයක් ලෙස මම මාඳු ගඟ පෙන්වාදෙමි. මෙතෙක් වෙලා අපි සමඟ සංචාරයට එක් වූ ඔබ සැමට හද පිරි ස්තූතිය පුද කරසිටිමු.