අලුත් අවුරුද්දත් ඉතින් දොරකඩට ම ඇවිත්…
ඈත ගම්වල අවුරුද්දත් එක්ක ම එරමුදු ගස්වල මල් පිපිලා… කොවුල් නදින් සවන් පිරෙද්දි…
නගරයේ නම් වීදි සියල්ල විවිධ ඇඳුම් ආයිත්තම් කඩ සාප්පුවලින් පිරිලා යද්දි…. තැනින් තැන නැගෙන යකඩ කටක හඬ අන් සියල්ල අභිභවා යද්දි…
අවුරුද්ද ඇවිත් කියලා අපි දැන ගන්නවා.
හැබැයි කැම්පස් අපි අවුරුද්ද ඇවිත් කියල දැන ගන්නෙ වෙන විදියකට… ඒ ශ්‍රද්ධාංජලී වෙනුවෙන් සූදානම් වෙන භක්ති ගීත හඬින් එහෙමත් නැත්නම් කට්ටිය වට වෙලා උණ බට සකස් කරන දර්ශනයකින්. අවුරුද්දට කලින් මොන එකකට වෙසක් එකට සූදානම් වෙනව ද? එහෙමත් කෙනෙක්ට හිතේ වි, හැබැ යි ඒ සූදානම කෙතරම් වෙනසක් සිදු කරනව ද කියන කරුණට ශ්‍රද්ධාංජලී සමගින් ඒකාලෝකවන ඔබ සාක්ෂි දරා වි.
හැබැ යි ඉතින් ගමට ලැබුවත් නගරෙට ලැබුවත්…
අපි අවුරුද්ද සමරන විදිය සහ අපිට පෙනන අවුරුද්ද වෙනස් වුනත්… මුළු මහත් ශ්‍රී ලාංකික හැමෝගෙ ම අවුරුදු ප්‍රාර්ථනාවන් එකක් වනවා ඇති නේද…
මිතුරෙක් හමු වුනා ම හරි මුහුණු පොතේ හුවමාරු කරන ඡායාරූපයක වුවත් කියවෙන්නෙ එක ම ප්‍රාර්ථනාවක් නේද?
ඔබ සැමට සාමය සතුට පිරි සෞභාග්‍යමත් නව වසරක් වේවා !!!
එහෙනම් FOS Media වෙනුවෙන් ඒ සුන්දර ප්‍රාර්ථනාව මම ඔබට කරනවා.
නව වසරත් එක්ක අපි හැමෝ ම අලුත් වෙනවනෙ…
ගෙවල් දොරවල් පිරිසිඳු කරලා… නැවුම් ඇඳුම් ආයිත්තම්වලින් සැරසිලා අපි භෞතික වශයෙන් අලුත් වෙන්න හැදුවත් වඩාත් වැදගත් වෙන්නෙ නව වසරේ සිතුවිලිවලින් අලුත් වෙලා යහපත් චෛතසිකයන් මූලික කරගෙන නිවැරදි ගමනක් යන එක කියල තමා වෙලාවකට හිතෙන්නෙ.
ඒ වගේ ම නව වසරේ තමන්ගෙ ඉලක්කයන් වෙනුවෙන් සැලසුම් සහගත ව ගමනක් යන එකත්… ඒ ගමන අන් අයගෙ ගමනට බාධා නොවන අන්දමින් සිදු කරන එකත් හරි ම වැදගත්.
අලුත් අවුරුද්දටත් අර කවුද වගේ කිරිබත් කෑල්ලක් කාලා කැවුමක් කාලා නිදා ගන්නෙ නැතු ව අවුරුදු ක්‍රීඩාවක් කරලා.. ගමේ වෙල් එලියෙ රවුමක් දාලා… කොහේහරි කමතක් හොයන් ඇවිදලා බලලා… මෙතුවක් කාලෙකට අවුරුද්ද කියන අත්දැකීම හරියට ලබ ලා නැත්නම් ඒකත් ලබා ගන්න උත්සාහයක් දරන්න කියලා ඔබට ආරාධනා කරනවා… හැබැයි ඉතින් තුම්මුල්ලටත් ඔය කියන අවුරුදු රස්නෙ එනවා කියලා තමා ආරංචි .. එතකොට ඉතින් හොයන් යන්න දෙයක් නෑ අවුරුදු ක්‍රීඩාවන් තුම්මුල්ලෙදි ම බලා ගන්න බැරි යැ…
අලුත් අවුරුද්දෙ හැමදාමත් පරණ විදියට ඉන්නත් බෑනෙ…
ඉතින් අපිත් හා හා පුරා කියලා අලුත් වැඩකට අත ගැහුවා…
මෙතුවක් කල් විවිධ වූ මාධ්‍ය ක්‍රමවේදයන් ඔස්සේ නව මං සොයා ගිය අපි අප්‍රේල් 16 සහ 17 යන දිනයන් හි ශ්‍රි ලාංකීය ඉතිහාසයේ ප්‍රථම වරට විශ්වවිද්‍යාලයක් විසින් පවත්වන ප්‍රථම අන්තර්ජාල ගුවන් විදුලි නාලිකාවේ නිල විකාශන කටයුතු සිදු කරන්නට බලාපොරොත්තු වෙනවා. මෙතුවක් කල් පාඨකයෙක් සහ නරඹන්නෙක් විදියට අප හා එක් වුන ඔබටත් නව වසරේ වෙනසක් එක්ක UOC Rhythm ගුවන් විදුලි නාලිකාව සමගින් ශ්‍රාවකයෙක් ලෙස එක් වෙන්න කියල FOS Media අපි ආරාධනා කරනවා.