මසකට වරක් නන් විසිතුරු    පුරෝගෙන

අහසට තරම් ළෙන්ගතු පෙම    දරාගෙන

උකසට ගත්තු පිය පදවිය          අරාගෙන

පහසට නතුව එන්නේ ඇය  සොයාගෙන

හැම මාසෙම වරදින් නෑ        එනවම   නේ

හඬ ඇහෙද්දි මම පිම්මේ         දුවනව නේ

ගොඩ බාද්දි දස අත  ඇහැ      යවනව නේ

කැමති ජාති සතුටිනි        තෝරනවා  නේ

මම ගියාම සෙල්ලම් බඩු      තෝරන්න

මාමා එනවා අම්මව            හම්බෙන්න

ඒ දවසට මහ ඉහළින්            පිළිගන්න

අම්ම ඉන්නෙ හරි සතුටින්  පේවෙන්න

අප්පොච්චගෙ මරණෙදි මම හුඟක්   පොඩී ලු

අම්ම එක්ක තනිඋනෙ මම එදා            ඉදල ලු

මෙහෙම බලල යන්නෙත් අපෙ මාම   විතර ලු

මටත් තෑගි ගෙනත් දෙන්නෙ ඒ       හින්දම ලු

ටැට්ටර් යන්තරෙ දාන්නෙ අපෙ ගෙයි   ඉස්සරහින්

ඩැයිවර් සීට් එකේ නැගල මම මහරජ     පෙනුමින්

මාමා නම් හරිම හොඳයි අපේ කඳුළු          පිසිමින්

අම්මත් ඉන්නේ මෙදාට මලක් වගේ          සතුටින්

මේ අහන්න පැටියෝ මගෙ පුංචි     පුතා

හතරවටින් කියයි කනට මුසා    ගොතා

ගණන් ගන්න එපා පුතේ ඔවැනි   කතා

මගේ අගය තේරෙයි ලඟකදි ම     යතා

එහෙම කිව්වෙ අන්තිමටම ආ     දවසේ

අම්මගෙ කුස මෝරනවා හොර රහසේ

ඈත දිහා බලමින් නිම් නැති       අහසේ

මට ඇසුණා අම්මගෙ සුසුමන් සැහැසේ

සිහින ගොඩක්  සුළඟේ පා වී   යනවා

මාමා ගැන හා හූවක් නැති     වෙනවා

අම්මත් දැන් දැන් නිතරම  මුමුණනවා

පරණ තෑගි බල බල මා  සැනසෙනවා

Image Courtesy : https://bit.ly/2TPEyS8