Oration 2016

Share

විද්‍යා පීඨය තුළ ශිෂ්‍ය සංගම් විශාල ප්‍රමාණයක් තිබෙනවා. ඒ අතරින් ගැවල් සමාජය (Gavel Club) කියන්නේ වැඩි දෙනෙකුගේ අවධානය යොමු නොවුණු සංගමයක්. ශිෂ්‍ය සංගමයක් විදියට ගැවල් සමාජය විසින් ඉටු කරන කාර්යයන් පිළිබඳ ව සහ මේ දිනවල ඔවුන් අතින් සිදුවන විශේෂ කර්තව්‍යයක් පිළිබඳ ව ඔබ දැනුවත් කිරීම සඳහා අප සමග කතාබහකට එකතු වුණේ, ගැවල් සමාජයේ මහජන සම්බන්ධතා පිළිබඳ හිටපු උප සභාපති (VP-Public Relations) ෆාදිල් ඉක්බල් සොයුරා සහ සාමාජිකත්ව කටයුතු පිළිබඳ හිටපු උප සභාපති (VP-Membership) ගිහාන් සේනානායක සොයුරා.

  • ගැවල් සමාජයේ ආරම්භය ගැන වචනයක් සඳහන් කළොත්?

මේ සමාජයට ලොකු ඉතිහාසයක් නැහැ. පටන් අරගෙන ගත වෙලා තියෙන්නෙ බොහො ම කෙටි කාලයක්. 2014 අවුරුද්දෙ නොවැම්බර් මාසෙ මේ සමාජය පටන් ගත්තේ සාමාජිකයන් හත් දෙනෙක් වගේ බොහො ම අඩු සංඛ්‍යාවකින්. මුලින්ම මේ සංගමය ස්ථාපනය කළේ විද්‍යා පීඨයේ. දැන් අනෙක් පීඨ වලටත් ව්‍යාප්ත වෙලා හැම පීඨයෙ ම වගේ තියෙනවා. Statistics Department එකේ ආචාර්ය අසෝකා රාමනායක මැඩම් තමයි මේ විදියේ සමාජයක් ආරම්භ කරන්න මුල් අදහස දුන්නෙ. අසෝකා මැඩම් දැනට සමාජයේ ජ්‍යේෂ්ඨ භාණ්ඩාගාරික විදියට කටයුතු කරනවා. අපේ Gavel Club එක පටන් ගැනීමේ කටයුත්තෙ දි කැළණිය විශ්වවිද්‍යාලයේ Gavel Club එක තමයි සහයෝගය දුන්නෙ.

  • Gavel Club එකේ අරමුණු මොනවා ද?

එක අරමුණක් තමයි ඉංග්‍රීසි භාෂා සන්නිවේදන කුසලතා වැඩි දියුණු කිරීම. අපිට දකින්න ලැබෙන දෙයක් තමයි භාෂාව හොඳින් හසුරුවන අයට පවා ඉංග්‍රීසි බසින් කතා කිරීමට තියෙන අපහසුතාවය. විශේෂයෙන් ම public speaking තමයි දුර්වල. ඉංග්‍රීසි භාෂා සන්නිවේදන කුසලතා වැඩි දියුණු කරගන්න ශිෂ්‍යයන්ට අවස්ථාවක් ලබා දීම මේ සමාජයෙන් සිදුවෙනවා. ඒ වගේ ම සිසුන්ගේ නායකත්ව කුසලතා වැඩි දියුණු කරගැනීමට අවස්ථාවක් ලබා දීමත් මේ හරහා සිදු වෙනවා.

  • මේ සමාජයේ විශේෂත්වය කුමක් ද?

ඉංග්‍රීසි භාෂා හැකියාව ඉතා අඩු අය, මධ්‍යස්ථ මට්ටමේ අය සහ භාෂාව ඉතා හොඳින් හසුරුවන අයත් Gavel සමාජයේ ඉන්නවා. තමන්ගේ English language skills හදාගෙන හොඳ තැනකට එන්නේ කොහොම ද කියලා මෙහිදී කතා කරනවා. Gavel Club එක කියන්නේ Toastmasters International  කියන club එකේ student body එක. Gavel Club එකට සම්බන්ධ වෙන්න ඉංග්‍රීසි භාෂා හැකියාව බාධාවක් නොවෙයි. එක් සමිති වාරයකට සිසුන් 30-40 අතර ප්‍රමාණයක් සහභාගී වෙනවා. Club එක ඇතුලෙ  කිසි ම වෙනසක් සිදුවෙන්නෙ නෑ කිසි ම කෙනෙකුට. එක පවුලක සාමාජිකයන් පිරිසක් වගේ තමයි අපි වැඩ කරන්නෙ.

  • ඔබ විසින් සිදු කරන අලුත් කටයුත්ත ගැන කිව්වොත්?

අපේ club එක විසින් Oration 2016 නමින් අලුතින් event එකක් සංවිධානය කරලා තියෙනවා. සියළු ම පීඨ වල ශිෂ්‍යයන්ට මේ සඳහා සහභාගී වෙන්න පුළුවන්. හොඳ ම කථිකයා තෝරන එක තමයි මෙහිදි සිදු වෙන්නෙ.

  • Oration 2016 ගැන වැඩි විස්තර දැනගන්න කැමති යි.

මුලින් කිව්වා වගේ කොළඹ විශ්වවිද්‍යාලයේ සියළු ම පීඨ වල ශිෂ්‍යයන් අතරින් හොඳ ම කථිකයා තේරීම තමයි මෙහි දි වෙන්නෙ.  මේ තරඟය මූලික අවස්ථා 3ක් යටතේ පැවැත්වෙනවා.  මූලික වටයේ තරඟ, අවසන් පූර්ව තරඟ සහ අවසාන තරඟය වශයෙන්. දැනට තරඟය සඳහා සිසුන් 120ක් ලියාපදිංචි වෙලා තියෙනවා.  ඒ සිසුන් කණ්ඩායම් 4 කට වෙන් කරලා, මූලික වටයේ තරඟ පවත්වනවා. පෙබරවාරි 27 වන සෙනසුරාදා පෙරවරු 9 සිට මධ්‍යහ්න 12 දක්වා කොළඹ විශ්වවිද්‍යාලයේ විද්‍යා පීඨයේ  දී එම කණ්ඩායම් 4 සඳහා මූලික වටයේ තරඟ පැවැත්වෙනවා. එයින් 20 දෙනෙක් අවසන් පූර්ව වටයට සුදුසුකම් ලබනවා. අවසන් පූර්ව තරඟ පැවැත්වෙන්නේ මාර්තු 12 වැනිදා. එයින් සිසුන් 5 දෙනෙක් අවසන් තරඟය සඳහා තෝරා ගැනෙනවා. අවසන් තරඟය පැවැත්වෙන්නේ මාර්තු 17 වනදා. මේ සඳහා නිල මාධ්‍ය දායකත්වය FOS Media වෙතිනු යි ලබා දෙන්නෙ.

  • Oration 2016 සඳහා පූර්ව දැනුවත් කිරීමේ වැඩසටහන් ක්‍රියාත්මක වෙනවා ද?

Oration 2016 ඉලක්ක කරගෙන වැඩමුළු 2ක් පවත්වනවා. ඉන් පළමුවැන්න පෙබරවාරි 17 වනදා පැවැත්වුණා. දෙවන වැඩමුළුව මාර්තු 2 වනදා පැවැත්වීමට නියමිත යි. මෙම වැඩමුළු මෙහෙයවන්නේ  toastmasters ලා විසිනුයි. ඕනෑම කෙනෙකුට නොමිලේ මෙම වැඩමුළු සඳහා සහභාගී වීමේ ඉඩකඩ සලස්වා තිබෙනවා. අපි උත්සහ කරන්නේ පවතින යමක් club එකට දෙන්න යි. සියළුම කටයුතු හොඳින් සැලසුම් වෙමින් තියෙනවා මේ වනවිට.

  • මේ කටයුත්තෙ දි සංගමයේ සාමාජිකයන්ගේ දායකත්වය ගැනත් සඳහන් කරමු.

මේ event එකට ලොකු වියදමක් දරන්න සිදුවෙලා තියෙනවා. ඒ නිසා මේ දවස් වල budget එක හොයන්න සෑහෙන්න මහන්සි වෙනවා. මේ කටයුත්තෙ දි club එකෙ මානව සම්පත් දායකත්වය ප්‍රමාණවත් නොවන නිසා, ස්වෙච්ඡාවෙන් මේ සඳහා දායක වන්න කැමති අයගේ සහයෝගය ලබා ගන්නවා. මීට කලින් අපි මේ වගේ ලොකු event එකක් කරලා නැහැ. අපේ team එක නොවෙන්න මේ කිසි දෙයක් මේ තරම් හොඳට කරන්න ලැබෙන්නේ නැහැ. මේ වන විට Oration 2016 තරඟාවලිය සඳහා කටයුතු සියල්ල සූදානමින් පවතින්නෙ.

කොළඹ විශ්වවිද්‍යාලයේ විද්‍යා පීඨයේ ගැවල්  සමාජය මගින් සංවිධානය කෙරෙන Oration 2016 හොඳ ම කථිකයා සොයා යෑමේ තරඟාවලිය සඳහා කටයුතු සියල්ල සම්පාදනය වෙමින් පවතිනවා.  ඔවුන්ගේ මෙම කටයුත්ත සාර්ථක කරගන්නට FOS Media අපිත් උණුසුම් සුභ පැතුම් එකතු කරනවා.

 
Tagged : / /