ලොව පුරා වාසය කරන කෝටි සංඛ්‍යාත කතෝලික ජනයාගේ නායකයා වන ඇති උතුම් ශුද්ධ වූ ෆ්රැන්සිස් පාප් වහන්සේ පසුගිය 13 වනදා ශ්‍රී ලංකාවට සැපත් විය. ශ්‍රී ලංකාවේ කතෝලික ජනතාව මෙම අවස්ථාව උදා වන තුරු පුල පුලා බලා සිටි අතර 1995 දී දෙවන ජුවාම් පාවුළු පාප් තුමාගෙන් පසුව මෙරටට සැපත් පළමු පාප් තුමන් ලෙස එතුමන් ඉතිහාසයට එක්විය. 78 වන වියේ පසුවන ශුද්ධ වූ ෆ්රැන්සිස් පාප් තුමන්ගේ උපන් රට වන්නේ ආර්ජන්ටිනාවයි. ලෝක සාමය ඇතිකිරීම සහ දුගී හා රෝගී ජනතාව වෙනුවෙන් එතුමන් කළ සේවාවන් ලොව පුරා ප්‍රසාදයට පාත්‍රව තිබෙනවා.
කටුනායක ජාත්‍යන්තර ගුවන්තොටුපලේදී ජනපති මෛත්‍රීපාල සිරිසේන මහතා විසින් එතුමන් පිළිගත් අතර උත්තමාචර පෙළපාලියකින් අනතුරුව අති විශේෂ අමුත්තන් සඳහා වූ ස්වර්ණ පුස්තකයේ අත්සන් කිරීම එතුමා සිදු කලහ.එතුමාව පිළිගැනීමේ කතාව ජනාධිපති තුමන් විසින් සිදු කලා. එම අවස්ථාවේදී රැස්ව සිටි පිරිස අමතමින් පාප් තුමන් පවසා සිටියේ මිනිසා තුල යහපත් සිතිවිලි ඇති කරවීම සඳහා අප සියලු දෙනාම කැපවිය යුතු බවයි. ඉන් අනතුරුව කොළඹ – කටුනායක මාර්ගය ඔස්සේ කොළඹ බලා පිටත් වූ අතර එතුමන් දැක ගැනීමට සහ එතුමන්ට ආචාර කිරීමට කතෝලික සහ කතෝලික නොවන ලක්ෂ සංඛ්‍යාත ජනකායක් මග දෙපස රැස්ව සිටියා. එදින සවස ජනාදිපතිතුමන් මුණ ගැසුණු පාප් තුමන් බණ්ඩාරනායක අනුස්මරණ සම්මන්ත්‍රණ ශාලාවේදී මෙරට ආගමික නියෝජිතයන් සමග පැවැත්වුනු අන්තර් ආගමික හමුවකට එක් වුනා.
පසු දින එනම් ජනවාරි 14 වනදා උදෑසන 8.30ට එතුමාණන්ගේ ප්‍රධානත්වයෙන් ගාලු මුවදොර පිටියේදී දිව්‍යම පූජා යාගයක් පැවැත් වුනා. ඒ සඳහා ලක්ෂ 5කට අධික ජනතාවක් රැස්ව සිටියා. එම දිව්‍යම පූජා යාගය අතරතුර පාප් තුමන්ගේ මෙරට සංචාරයේ වැදගත්ම අවස්ථාව වූ අතර එහිදී එතුමන්ගේ මෙරටට පැමිණීම සඳහා ප්‍රධාන කාරණයක් වූ භාග්‍යවර ජුසේ වාස් පියතුමන්ව ශුද්ධවරයට ඔසවනු ලැබුවා.
ජුසේ වාස් පියතුමන් ලන්දේසි පීඩන සමයේ මෙරට කතෝලික දහමේ අභිවෘද්ධිය උදෙසා දිවිහිමියෙන් කටයුතු කල පුද්ගලයෙකු වූ අතර එතුමාණන් එකල මහනුවර ප්‍රදේශයේ ඇතිව තිබු මහා නියඟයක් නිම කිරීමේ ප්‍රාතිහාර්යයක් සිදු කිරීම හේතුවෙන් ජනතා ප්‍රසාදය මෙන්ම මහනුවර රජු වූ 2 වන විමලධර්මසූරිය රජුගේ අනුග්‍රහය ද පැහැදීම ද දිනා ගැනීමට සමත් වුනා. මීට අමතරව එතුමාණන් එකල මහා වසංගතයක් ලෙස පැතිර තිබු වසුරිය රෝගයට ගොදුරු වූ රෝගීන් ඉන් ගලවා ගැනීමටද මහත් වෙහෙස මහන්සියෙන් කටයුතු කල බව ඉතිහාසයේ සඳහන් වෙනවා. ලන්දේසි සමයේ අභාවයට යමින් තිබු මෙරට කතෝලික දහමට නව පණක් ලබා දෙමින් එතුමන් කල සේවය මේ රටේ කතෝලික දහමේ පැවැත්ම සඳහා මහඟු දායකත්වයක් ලබාදුන් බව කියවෙනවා.
මෙම දිව්‍ය පුජා යාගය අවසානයේ පාප් තුමන් විසින් ජනතාව ආසිරි ගන්වන ලද අතර ශ්‍රී ලංකා ගුවන් හමුදාව හා නාවික හමුදාව විසින් ගුවන් හා නාවික සංදර්ශනයක් ද පැවැත්වුනා.
ඉන් අනතුරුව පාප් වහන්සේ ගුවනින් මඩු දේවස්ථානය කරා ගමන් කල අතර මඩු දේවස්ථානයේද එතුමන් බැහැ දැකීම සඳහා ලක්ෂ සංඛ්‍යාත ජනකායක් රැස්ව සිටියා. ඉන්පසු නැවත කොලඹ බලා පැමිණීමෙන් අනතුරුව පසුගිය සතියේ එනම් මෙමස 15 වනදා එතුමන් බොලවලානේ පිහිටි ලංකාවේ අප ස්වාමිදුව දේවස්ථානයට පැමිණීමෙන් අනතුරුව කටුනායක ජාත්‍යන්තර ගුවන්තොටුපලෙන් පිලිපීනයේ මැනිලා නුවරට යාම සඳහා නික්ම ගියා.
කතෝලිකයන් සුළුතරයක් වෙසෙන රටකින් පාප් තුමන්ට හිමිවූ ඉහලම පිළිගැනීම ලැබුනේ ලංකාවෙන් බව වතිකානයෙන් පැමිණි නියෝජිතයන් පවසනවා. පාප් තුමන්ගේ මේ පැමිණීම තුලින් ශ්‍රී ලංකාව පිලිබඳ ජාත්යනන්තර ප්‍රජාව තුල වඩාත් යහපත් ආකල්පයක් වර්ධනය වේ යැයි බලාපොරොත්තු වෙනවා.
ආශ්‍රිත සබැඳි