ශ්‍රී සම්බුද්ධ වර්ෂ 2557ක් වූ වෙසක් පුන් පොහොය නිමිති කර ගෙන කොළඹ විශ්ව විද්‍යාලයීය විද්‍යා පීඨය මඟින් උතුම් වූ වැඩසටහන් රාශියක් සංවිධානය කරන්නට යෙදුණා.
කොළඹ විශ්ව විද්‍යාලයේ සාමූහික වෙසක් සැරසිලි සඳහා විද්‍යා පීඨය වෙසක් කූඩු විශාල ප්‍රමාණයකින් දායකත්වය ලබා දුන්නා. ඒ අතරම විද්‍යා පීඨ භූමිය තුල ද විශාල වෙසක් සැරසිලි සංඛ්‍යාවක් ඉදි කර තිබෙනවා. ආමිස පූජාව උදෙසා කරනු ලබන්නා වූ පුණ්‍යකර්මයන් වශයෙන් කරනු ලබන මේ පුජාවන් අතරට ආලෝක පූජාවන් වෙනුවෙන් ආපන ශාලා භූමිය මෙන්ම අනෙක් ස්ථාන ද වර්ණවත් වීම සිදුවුණා. මේ සියළු කර්තව්‍යන් සාර්ථක කර ගැනීමට බෞද්ධ සංගමය ඇතුලු සියළු ශිෂ්‍ය ශිෂ්‍යාවන් තම නොමඳ දායකත්වය ලබා දුන්නා. එමෙන්ම ආගම් භේද දුරැලමින් අනෙකුත් ආගම් වල සිසුන්ද තම දායකත්වය මෙම වෙසක් උළෙල සාර්ථක කර ගැනීමට ලබා දුන්නා.
වෙසක් දිනට පෙර දින එනම් බ්‍රහස්පතින්දා දින විද්‍යා පීඨ භූමිය වෙසක් කළාපයක් වශයෙන් නම් කරන්නට යෙදුණු අතර විශේෂ වෙසක් වැඩසටහන එදින ක්‍රියාත්මක වුණා.
අපරභාග 1.30 සිට ගරුතර පන්නල පඥ්ඥාධාර මාහිමියන් විසින් මෙහෙය වූ සුමධුර කවි බණ දේශණය ද අපරභාග 3.00 සිට ගරු පණහඩුවේ යසස්සි හිමියන් විසින් මෙහෙය වූ කාලීන ධර්ම දේශණය ද සවස 4 සිට විද්‍යා පීඨ සිසු සිසුවියන්ගේ දායකත්වයෙන් සංවිධානය වන්නට යෙදුණු කොස් හා මඥ්ඥොක්කා දන්සැල ද අතිසාර්ථක අන්දමින් පැවැත්වුණා. සවස 5 සිට ශ්‍රද්ධාංජලී බොදු ගී සරණිය පැවැත්වුණු අතර රැස්ව සිටි පිරිසගේ විශේෂ අවධානය ඒ වෙත යොමු වුණා. මේ අන්දමින් ශ්‍රී සම්බුද්ධ වර්ෂ 2557ක් වූ වෙසක් මහා මංගලෝත්සවය සඳහා කොළඹ විශ්ව විද්‍යාලයීය විද්‍යා පීඨය සංවිධානය කරනු ලැබූ විශේෂ වෙසක් වැඩසටහන සාර්ථක ලෙස අවසන් වූවා.

දිල්කි
ජායාරූප – දිලීප ලියනගම