කොළඹ විශ්වවිද්‍යාලයේ ගැටුමක සිදුවීමක් ගැන තලු මරමින් මාධ්‍ය කතා කරන පසුබිමක මේ ලිපිය ලිවීමට සිතුවෙමි. කොළඹ විශ්වවිද්‍යාලයට ප්‍රථම US පේටන්ට් බලපත්‍රය හිමි වීමේ අභිමානයේ උණුසුම පහව යන්නෙත් කලින්, කොළඹ විශ්වවිද්‍යාලයේ නවක වදයේ සිදුවීමක් ලෙස සමහර මාධ්‍ය වල පළ වූ ප්‍රවෘත්තිය විශ්වවිද්‍යාලයට ආදරය කරන ඕනෑම අයෙකුට ඉදිකටුවකින් අනින්නාක් මෙන් වන්නට ඇති බවට සැකයක් නැත. ඉහත කී සිදුවීම එක්තරා පීඨයක දෙවන වසර සිසුන් කිහිප දෙනෙක් එකතු වී තුන්වන වසර ශිෂ්‍යයෙකුට පහර දීමේ සිදුවීමක් වුවද, ප්‍රවෘත්තිය පලවන්නේ කොළඹ විශ්වවිද්යාලයේ නවක වදය සම්බන්ධ සිදුවීමක් ලෙසය.

ගැටුම කෙසේ සිදුවූවාදැයි සොයා බලා වරදකරුවන්ට දඬුවම් ලබා දීම ගැන විවාදයක් නැත. නමුත් සිද්ධියෙන් ඇති වූ කැළල මැකිය හැකිද?

මෑත ඉතිහාසයේ ශිෂ්‍ය අරගල හේතුවෙන් විශ්වවිද්‍යලය වැසී නොමැති ලංකාවේ විශ්වවිද්‍යල  කිහිපය අතර සිටීම සහ අධ්‍යාපනයේ ගුණාත්මක බව නිසා වැජඹෙන ශ්‍රී ලංකාවේ ප්‍රමුඛතම විශ්වවිද්‍යාලය, කොළඹ විශ්වවිද්‍යාලයයි. ඔබ ලංකාවේ විවිධ ප්‍රදේශ පාසල් වලින් විශ්වවිද්‍යල වරම් ලැබූවත් ඔබ දැන් නියෝජනය කරන්නේ කොළඹ විශ්වවිද්‍යාලයේ ශිෂ්‍යයෙකුගේ භූමිකාව බැවින්, ඔබගෙ හැසිරීම්වල බලපෑම ඔබට පමණක් නොවන බව තරයේ සිහි තබාගත යුතුය. පසු ගිය දිනක කොළඹ විශ්වවිද්‍යාලයට පළමු US පේටන්ට් බලපත්‍රය හිමිවිය.ඒ දිලීර ආශ්‍රිත පර්යේෂණ වල ප්‍රතිඵල වශයෙන් එහි ප්‍රතිපිළිකා ගුණ ඇති බව සොයා ගැනීමත් සමගයි.

මෙවන් අතිශය අභිමානයෙන් කතාබහ ඇති විය යුතු අවස්ථාවන්, ඉහත සඳහන් කණගාටුදායක සිදුවීම් වලින් යටපත් වීම පවා සිදු විය හැකි නිසා, සිහියෙන් කටයුතු කල යුතුය. නැතහොත් අවසානයේ කිරි කළයට ගොම එක්කිරීමේ පවට ඔබ ද දායක වනු ඇත.

පසු ගිය දිනවල, කොළඹ විශ්වවිද්‍යාලයේ ඉතිහාසය ගැන ලිපියක් අභිමානයෙන් ලියමින් සිටියෙමි. නමුත් මෙම සිද්ධිය කන වැකුනු වහාම එය ලිවීම නවතා, අපේ විශ්වවිද්‍යාලයේ අභිමානය රැක ගැනීමට අපි සතුව ඇති වගකීම ගැන මතක් කිරීමට තීරණය කළෙමි.

මේ ලිපිය කියවන ඔබත් මගේ අදහස සමග හුදෙක්ම එකඟවනු ඇතැයි විශ්වාස කරමි. මන්ද යත් ඔබත් මාත් අද දින සම්බන්ධ වන ගැටුමක් හෝ කුමන හෝ අන්දමක සමාජ විරෝධී ක්‍රියාවකට ඔබේ නමටත්, ඔබේ පීඨයේ නමටත් ප්‍රථමව ඔබේ විශ්වවිද්‍යාලයේ නම ඉදිරියට එන බැවිනි.

මාධ්‍යවලට තම ජනප්‍රියත්වය වෙනුවෙන් පුවත් මැවීමට සහ පුවත් විකෘති කිරීමට ඉඩ දීමට වඩා ඉවසීමෙන් ප්‍රශ්න විසඳා ගැනීම සරසවි ශිෂ්‍යයන් ලෙස අපේ වගකීමක් බව මගේ හැඟීමයි. සංවාදයට විවෘතයි.

Image Courtesy:- https://bit.ly/30kkLeC