“සහස් 2013”

Share

මව් කුසින් මෙලොව එලිය දුටු දා සිට මසැසින් ලෝකය දකින අප, මනසින් ලෝකය දැකීමට හුරු වන්නේ මව් සෙනෙහස මුසු වූ ගුරුහරුකම් වල අරුමයත් සමගිනි… එතැන් පටන් පියවරෙන් පියවර ගෙවමින්, “අ”යනු “ආ”යනු කියමින් ලෝකය කියවන දරුවන්, සරු දේ නිසරු දෙයින් වෙන් කරමින්, විචක්ෂණ බුද්ධියෙන් ජය ගන්නට යත්න දරනුයේ ප්‍රඥාවෙන්, පෞර්ශ්‍යත්වයෙන් සංවර්ධනය වීමත් සමගින්ය…

සිරි ලක් මවගේ දරුවන් වන අප හට, ගුණ නුවණින් පිරිපුන් වීමට මහත් රුකුලක් වනුයේ, පළමු වසරේ සිට සරසවියෙන් නික්මෙන තෙක් අපව පෝෂණය කරන නිදහස් අධ්‍යාපනය නම් වූ උත්තුංග ක්‍රමවේදයයි. එකී සංකල්පයෙන් ප්‍රතිලාබ ලැබ, අති මහත් වූ සරසවි වරම් ලැබුවන් වන, කොළඹ විශ්ව විද්‍යාලයීය විද්‍යා පීඨ සිසුන් වන අප, ඒ වරමේ වටිනාකම අප පිටුපසින් එන සහෝදර කැලට උරුම කර දී, අප ලැබුවාවූ අමිල මෙහෙවරට කෘතගුණ දැක්වීමේ ප්‍රයත්නයක් ලෙස, “සහස් 2013” හැඳින්වීමට කැමැත්තෙමු.

ඔවුන් ලැබුවා වූ වරප්‍රසාදයන් තම බාල සොයුරු කැලට ලබා දීමේ උත්තුංග මෙහෙවර සඳහා මෙවර තෝරාගෙන තිබෙනුයේ මොණරාගල දිස්ත්‍රික්කයෙන් මෙවර අ.පො.ස. උසස් පෙළ විභාගයට විද්‍යා අංශයෙන් මුහුණ දෙන සිසු සිසුවියන් පිරිසයි. කොළඹ හා නාගරික ජනප්‍රිය පාසල් වල සිසුනට වඩා අඩු පහසුකම් යටතේ වුවත්, තම අරමුණු ජය ගැනීමේ අධිෂ්ඨානයෙන් ක්‍රියා කරන ඔවුනට “සහස් 2013” වැඩසටහන ඉමහත් රුකුලක් වනවා නිසැකයි. ඔක්තෝබර් 17 හා 18 යන දෙදින තුල මොණරාගල දිස්ත්‍රික්කයේ පාසැල් 16 ක, සිසු සිසුවියන් 400 ක්, උදෙසා මොණරාගල රාජකීය මධ්‍ය මහා විදුහල් පරිශ්‍රයේදී “සහස් 2013” අධ්‍යාපනික යාත්‍රාව දියත් කිරීමට මේ වන විට සියලු කටයුතු සංවිධානය කර ඇත. අ.පො.ස. උසස් පෙළ රසායන විද්‍යා විෂය නිර්දේශයට අනුගතව සහස් 2013 වැඩසටහන යටතේ පහත සඳහන් මුලිකාංග ඇතුලත් කර ඇත.

• රසායන විද්‍යා නිබන්ධන සාකච්ඡාව
• ප්‍රායෝගික පරීක්ෂණ ආදර්ශණය
• රසායන විද්‍යා ප්‍රශ්ණ විචාරාත්මක වැඩසටහන
• රසායන විද්‍යා මැජික් සංදර්ශණය
• පාසල් උපකරණ හා විෂයානුබද්ධ පොත්පත් බෙදා දීම
• රාත්‍රී අහස නිරීක්ෂණය කිරීමේ කඳවුර

මොණරාගල දිස්ත්‍රික්කයේ සිසුන් තුල මෙතෙක් පැවති සියලුම විෂයානුබද්ධ ගැටළු වලට සාර්ථක විසඳුම් ලබා දී ඔවුන්ගේ ආත්ම විශ්වාසය තව තවත් වැඩි කිරීමත්, විභාගය සඳහා අවැසි සියලුම විෂය කරුණු වලින් ඔවුන් සන්නද්ධ කිරීමත් මෙමගින් අපේක්ෂා කෙරේ. මෙම වටිනා අවස්ථාවෙන් උපරිම ප්‍රයෝජන ගෙන මතු දිනක එම සිසු කැල සරසවි බිම ජය කෙහෙළි නංවන මොහොත උදාවන තුරු කොළඹ විශ්ව විද්‍යාලයීය විද්‍යා පිඨයේ අප, දෙනෙත් අයා බලා සිටින්නේ නිහතමානී ආත්මාභිමානයක් ද සිත් තුල රඳවා ගෙන බවද අවසන් වශයෙන් සටහන් කරමු.

sahas2013

https://www.facebook.com/SAHAS.UoC
සංවිධාන ශක්තිය –
රසායන විද්‍යා සංගමය – කොලඹ විශ්ව විද්‍යාලය.
සටහන – කවින්ද්‍රි ඩිල්ෂානි