සැරසුවත් සිරුර සුදු වතින්
සුපිපුනත් වට්ටි සුදු මලින්
ඉතිරුනත් පහන් පොල්තෙලින්
සිත පිරිය යුතු මෙත් මලින්
මේ ගීතය ඔබ අසා ඇති.. විද්‍යා පීඨයේ මෙන්ම මාධ්‍ය නාලිකා වලත් ගුවන් විදුලියෙත් නිතර ඇහෙන ජනප්‍රිය ගීතයක්. මේ ගීතයේ නිර්මාණයට දායක වුනේ අපේම විද්‍යා පිඨයේ සොයුරෙක් හා සොහොයුරියක්..ඔහු නමින් යසස් සෙනරත් විරකැටිය. ඇය විශාරද උදානි විජේවර්ධන . මෙම ගිතයට පණ පෙවන්නේ උදානි විජේවර්ධනයන්ගේ මියුරු ස්වරයෙන්..
සමාජය යන රටාවත් එක්ක සැසඳු කල ඉතා වැදගත් පණිවිඩයක් මුදුන් පමුණුවලන නිර්මාණයක් ලෙස සැලකිය හැකියි. ඉතින් අප සිතුවා මේ ගීතය ගැන ගීතයේ තිර රචකයාගෙන් ම අසා දැනගන්න. මා පෙර සඳහන් කරා වගේම මෙම ගීතය තිර රචනය, නැතිනම් විඩියො එක නිශ්පාදනය හා නිර්මාණය කරේ යසස් විරකැටිය සොයුරායි. ඔහු විද්‍යා පිඨයේ ඡායාරූප කවයේ ප්‍රධාන සංවිධායක වරයාද වේ. ඔහු ඉතාමත් කාර්යබහුල තත්ත්වයක සිටියත් අපි ඔහුව සම්බන්ධ කරගත්තා මේ නිර්මාණය ගැන වැඩි යමක් දැනගන්න.
- යසස් අයියා, කොහොමද මේ දවස් වල ජිවිතේ, වැඩ රාජකාරි එහෙම…?
———–‘සුපුරුදු පරිදි සැහැල්ලුවෙන් ගතවෙනවා. එමෙන්ම මගේ අලුත් කෙටි චිත්‍රපටය ‘කොලනියක කතාවක්’ සදහා පෙරබිම සකසමින් ඉන්නේ මම මේ දින වල’
- හොඳයි, මොකක්ද අර අලුත් නිර්මාණය. ප්‍රතිචාරත් සැහෙන්න තියෙනවා. පොඩ්ඩක් කියමු ඒ වැඩේ ගැන..
: විශාරද උදානි විජේවර්ධන එක්ක කරපු මුල්ම සංගීත වීඩියෝ එක ගැනයි මම හිතන්නේ මල්ලි මේ අහන්නේ.
- ඔව් . ,ඇත්තටම
———- බුදුදහම තුල තියන සර්වකාලීන සත්‍යක් ගැන තමයි මේ ගීතයේ යටි පෙලින් දිවෙන්නේ.., උදානි මට මේ ගීතයට මියුසික් වීඩියෝ එකක් කරමු කියල මට මුලින්ම ගීතය දීපු දවසේ මම මේ ගීතය ගොඩ සැරයක් ඇහුව. යටි පෙලින් දුවන අරුතත් එක්ක සමාන්තරගත මානයක තියන මියුසික් වීඩියෝ එකක් කළා අපි අවසානේ.
- හොඳයි ගායිකාව ගැනත් සඳහන් කරොත් ,?
———-ඇය මීට සමකාලීනව විශාරද වරියක් ලෙස සංගීත දිවිය උසස් කර ගත්තා..,
- ඇයි මෙහෙම එකක් කරන්න හිතුනේ.. කොහොමද මේක පටන් ගත්තේ,.?
———-අපිට ඕන උනේ වඩා ඵලදායි නිරමාණයක් එක්ක සමාජගත වෙන්න. රැල්ල හරවන යමක් කරන්න.
- ඔබ හිතනවද රැල්ලකට යන සමාජයකට මෙවැනි ගිත කෙසේ පි‍ටුවහලක් වේවි කියලද? තරුණ පරම්පරාව කොහොම වැළඳ ගනීද? ඒ කිව්වෙ රොක් පොප් රටාවන් ක්ෂේත්‍රය ආක්‍රමණය කරන කාලේ?
——–නම නොදන්නා සුපර් මාකර්ට් එකක ඔබත් මමත් අපි හැමෝම, අපිට හොරෙන් විවිධ වටිනාකම් වලට විකිණෙනවා… අපි උත්සහ කල යුත්තේ අප සමග යම් හරයාත්මක යමක් ඒ විකිණීම තුලට ඔබ්බවන්න…අපි හිතනවා අපි ඒ දේ කළා කියල. ලංකාව කියන සංස්කෘතික කොළනිය තුල බාහිර සංස්කෘතික බොල් ඇට වපුරන්න ලේසියි… ඒ සඳහා කුලියට ඇට වපුරන්න ඕන තරම් උදවිය ඉන්නවා… මම කැමති වෙනස් දෙයක් වපුරන්න… හැබැයි මේ පොලවට උචිත යමක්.
- විඩියො එකේ පසුතල නිර්මාණය ගැන කිව්වොත්?
——–පසුතලය තමයි ප්‍රධාන අභියෝගය උනේ…මම ඉතා කෘතගුණ පූර්වකව මතක් කලයුතුයි මගේ මිත්‍ර චතුර මධුශාන්ව සහ උදාන වෙත්තසිංහ මිතුරන්ව…. ඒ වගේම Studio One ආයතනයේ තරිඳු ජයකොඩි, නාලක සේනාධීර studio climax අධිපති හිරාන් මධුසංක මගේ මිත්‍රයන්ව ඒ වගේම සංස්කරණ කටයුතු කල grayscale video හි එරික් අයියාවත්… එමෙන්ම පොල්ගම්පොල රජමහා විහාරය තඹ දොළ ඇල්ල පන්සල තමයි රූප රචනය සඳහා යොදාගත්තේ.
- මේ ඔබේ කුළුදුල් නිර්මානයද?
———සංගීත වීඩියෝකරණය කියන්නේ වෙනස් විෂය පථයක්.. ඉතින්
- ඔව්.,ඒ වෙනස් වු විශය පථයේ මුල්ම පියවරද මේ?
——– ඊට පුළුවන් ගීතය සතු ආත්මය එහෙම නැත්තන් යටිපෙළ අරුත රකින්න හෝ වෙනස් මානයක රසවින්දන තලයකට ගෙනියන්න…මම එහෙම අත්හදා බැලීමක් කළා ගියවර වෙල්කම් එකට කරපු ‘අහන් ඉන්න අහගෙන ඉන්න’ කියන මේඛලා ගමගේ ගේ මුල් ගීයට.එයයි මගේ මුල්ම අඩිය. එය සාර්ථක උනා මම හිතන්නේ..සැරසුවත් සිරුර ප්ලොට් එක හිතද්දීත් නව මානයක රසවින්දනය තියන්න මම පරිස්සම් උනා.
- වැඩිපුර යොමුවෙන්නෙ විඩියො ගීත සදහාද නැත්නම් කෙටි චිත්‍රපට සදහාද?
——–දෙකෙන් එකකට වෙනස් කමක් කරන්න මම කැමති නෑ…. නමුත් කෙටි චිත්‍ර පටය කියන ප්‍රබලතර රසවින්දන මාධ්‍යට මම වඩාත් ආසයි.
- හොඳයි…, කොහොමද පවුලේ අයගෙන් ලැබෙන සහයෝගය යාළුවන්ගෙනුත්..?
———පවුලේ උදවියගෙන් ලැබෙන සහය ගැන කිව්වොත් ,මම මගේ තාත්ත ගැන යමක් කිව යුතුයි…ඒ උත්තමය තමයි මම යන පාරේ මට පාර කියන දිශානති තරුව…මට මතකයි මම මුල්ම කෙටි චිත්‍රපටය [සෙරෙප්පුව] කරද්දී මගේ තාත්ත හිටියේ ජීවිතේ අවසාන දින හතර තුල…කළුබෝවිල දැඩි සත්කාර ඒකකයේ…ඒ නිර්මානේ ජයග්‍රහණය කරන්න දින කීපයකට කලින් තාත්ත මගෙන් දුරකට ගියා….එතනින් පස්සේ මම ජීවිතේ ගොඩක් කලාත්මක දේ නිර්මාණ කළා…ඒ කිසිවක් තාත්ත දැක්කේ නෑ,, නමුත් මේ ගමන දිහා ඔහු බලන් ඇති කොහේ හරි ඉදන්…යාළුවො ගැන මම ගොඩක් සතුටු වෙනවා. උදානිත් නිරන්තරයෙන්ම මා සමග ඉන්නවා. ගොඩක් දිගු පියවර තියද්දි එයාලත් මාත් එක්ක ඉන්නවා නිරන්තරයෙන්ම.
- අනිවාර්යෙන්ම.. ඔහු බලන් ඇති.., ඉස්සරහට මොනවද කරන්න බලාපොරොත්තු වෙන්නෙ.. ඒ ගැනත් සදහන් කරොත්?
————- තෙවෙනි කෙටි චිත්‍රපටය වන කොලනියක කතාවක් සඳහා සූදානම් වෙනවා…විශාරද උදානි අභිෂේකා විජේවර්ධන සහ උදේශ් ඉන්දුල ගයන මා ලියු ගීතයේ සංගීත වීඩියෝව සඳහා සූදානම් වෙනවා…ලොකු හීනයක් තියනවා විද්‍යා පීඨයෙන් සම්පූර්ණ ගීතයක් එලියට දෙන්න… පද රචනය සහ සංගීත වීඩියෝව මගෙන්..ගැයුම් උදානි සහ දෙවැනි වසරේ හොඳ ගායකයෙක් වන චරිත් හෙවත් නාන මල්ලි…ස්වර දෙවන වසරේ රජින්ද්‍ර මල්ලි..වාදනයෙන් රාජිත මල්ලි.
- හොදයි අපි බලාපොරොත්තුවෙනවා හොඳ නිර්මාණයක් දකින්නට ලැබෙයි කියලා.. සියළු වැඩ කටයුතු සාර්ථක වෙන්න එක සිතින්ම සුභ පතනවා.. මෙතරම් කාර්ය බහුල වෙලා හිටියත් අපට දැක්වු සහයෝගයට බොහොම ස්තුතියි..
——- මල්ලිලා මේ යන ගමන වෙනස් සහ උසස් එකක්..බොහොම ස්තුතියි මල්ලි. !!
Main : Udani Abhisheka Wijewardhana
Music: Saman Nishantha Fernando
Lyrics : Shelton Samarasinghe
Video Director : Yasas Senarath Weerakatiya