ක්‍රීඩාවට උපන් හපන්කම් ඇති සරසවි වරම් ලද දක්ෂයින් උදෙසා අසිරිමත් ලෙස සංවිධානය කරනු ලැබූ SLUG තරග අතර බොහෝ දෙනාගේ අවධානය දිනාගත් තවත් සූවිශේෂී තරග ඉසව්වක් ලෙස බේස්බෝල් හැඳින්විය හැක. දිනෙන් දින උණුසුම් වූ SLUG තරග බිමේ අවසන් දින කිහිපය ඉතාමත් තීරණාත්මක විය. ඒ උණුසුම දෙගුණ තෙගුණ කරමින් විශ්ව විද්‍යාල 11 ක් බේස්බෝල් කිරුළ තමන් සතු කරගැනීමේ අභිප්‍රායෙන් තරග බිමට පිවිසියහ.
සැප්තැම්බර් 2, 3, 4, 5 යන දිනයන්හි දී කොටවිල ක්‍රීඩාංගනයේ දී සහ කොග්ගල BOI ක්‍රීඩාංගනයේ දී එකිනෙකට දෙවෙනි නොවන උණුසුම් තරග රටා මවමින් බේස්බෝල් හරඹය පැවැත්විණි.
කරට කර තරග වැදුනු තරග ගණනාවකින් අනතුරුව ජ’පුර, පේරාදෙණිය, කොළඹ, සබරගමුව විශ්වවිද්‍යාල කණ්ඩායම් අවසන් පූර්ව වටයට සුදුසුකම් ලැබූහ. එහිදී සබරගමුව විශ්වවිද්‍යාල කණ්ඩායම විසින් පේරාදෙණිය විශ්වවිද්‍යාල කණ්ඩායම පරාජයට පත් කළ අතර ලකුණු පුවරුව දිස් වූයේ 15 – 12 ක් ලෙසිනි. එසේම ජ,පුර – කොළඹ විශ්වවිද්‍යාල අතර පැවැති තරගයේ නිමාව සනිටුහන් වූයේ 08 – 01 ක් ලෙස ජ,පුර විශ්වවිද්‍යාල කණ්ඩායමට අවසන් මහා තරගයට පිවිසීමට මග විවර කර දෙමිනි.
අවසන් මහා තරගයේ දී ජ,පුර සහ සබරගමුව විශ්වවිද්‍යාල කණ්ඩායම් කොටවිල ක්‍රීඩාංගනයේ දී උරෙනුර ගැටුනේ උණුසුම් තරග අත්දැකීමක් ක්‍රීඩාලෝලීන් හට තිළිණ කරමිනි. ඉතා තීරණාත්මක තරඟයක් අවසානයේ ජ,පුර ක්‍රීඩකයන් ජයග්‍රාහකයන් ලෙස අබිසෙස් ගන්වමින් ලකුණු පුවරුව 13 – 14 ක් ලෙස දිස් විය.
පුරා දින හතරක් SLUG තරග බිම කැළඹූ බේස්බෝල් තරගාවලියේ නිමාව සනිටුහන් වූයේ ජ’පුර විශ්වවිද්‍යාල කණ්ඩායමට ශූරතාවයත්, සබරගමුව විශ්වවිද්‍යාල කණ්ඩායමට අනුශූරතාවයත්, පේරාදෙණිය විශ්වවිද්‍යාල කණ්ඩායමට තෙවන ස්ථානයත් හිමි කර දෙමිනි.
ජයග්‍රහණයේ කිරුළු පැළඳි ඔබ සැමට FOS Media අපගේ උණුසුම් සුබ පැතුම්.
Image Courtesy : https://bit.ly/2kfAefr
Catch us on our official web site for SLUGXIII 2019.
Blogs|Videos|Scores and many more…
https://fos.cmb.ac.lk/slug2019/
#WeReportBestAtFirst
#FOSMedia