සරසවි කරලියේ මහා කෙළි මංගල්‍යය ඇරඹෙයි…

Share

ඔද තෙද එඩි බල පානා
සොහොයුරු දම් පොබ කරනා
රොද බැඳ කිතුගොස නගනා
පිළිමල් බල බිඳ දමනා
සැම දන ජය ධජ බඳනා
සරසවි මව් නම් දිලෙනා
කිරුළක පැතුමන් පුරනා
මහ කෙළි නොවැ ඇරඹෙන්නා

ශ්‍රී ලාංකේය සරසවි වංසකතාවේ මහා කෙළි මංගල්‍යය, SLUG XIII නොහොත් ශ්‍රී ලංකා විශ්වවිද්‍යාල ක්‍රීඩා තරගාවලි ඉතිහාසයේ 13වැන්න පසුගිය අගෝස්තු මස 26වන දින ශ්‍රී ලංකා ජනාධිපති මෛත්‍රීපාල සිරිසේන මැතිතුමන් විසින් රුහුණ විශ්වවිද්‍යාලයේ රබීන්ද්‍රනාත් තාගෝර් අනුස්මරණ ශ්‍රවණාගාරයේ දී නිල වශයෙන් සමාරම්භය සනිටුහන් කරන ලදී. විශ්වවිද්‍යාල 14ක් නියෝජනය කරමින් ක්‍රීඩක ක්‍රීඩිකාවන් 1000කට ආසන්න ප්‍රමාණයක් ක්‍රීඩා ඉසව් 22ක් වෙනුවෙන් තරග වදින මෙවර තරගාවලියෙහි සත්කාරකත්වය දරන්නේ රුහුණ විශ්වවිද්‍යාලයයි.

1980 වර්ෂයේ පේරාදෙණිය විශ්වවිද්‍යාලයේ සත්කාරකත්වය යටතේ පළමු වරට දිග හැරුණු ශ්‍රී ලංකා විශ්වවිද්‍යාල ක්‍රීඩා උළෙල, එතැන් පටන් 1989 වසර හැරුණු විට සෑම වසර තුනකට වරක් ම ඔලිම්පික් ආකෘතිය අනුව යමින් මහත් උත්සවශ්‍රීයෙන් පවත්වනු ලබයි. එකම කිරුළක් වෙනුවෙන් සිහින මැවෙන ශ්‍රී ලංකා විශ්වවිද්‍යාල ක්‍රීඩා තරගාවලි ඉතිහාසයේ වැඩිම වරක් එනම් හයවරක් සමස්ත ශූරයින් බවට පත් වීමේ වාර්තාවට කොළඹ විශ්වවිද්‍යාලය හිමිකම් කියන අතර අවසන් වරට එනම් SLUG XIIහි සමස්ත ශූරයින් ලෙස අබිසෙස් ලැබුවේ ශ්‍රී ජයවර්ධනපුර විශ්වවිද්‍යාලයයි.

සමාරම්භක උළෙලේ දී රුහුණ විශ්වවිද්‍යාලයේ පියුමි අහිංසා හා කළණ වික්‍රමාරච්චි යන ක්‍රීඩක ක්‍රීඩිකාවන් විසින් ඔලිම්පික් පහන දල්වන ලද අතර ක්‍රීඩා ප්‍රතිඥාව ඉදිරිපත් කරන ලද්දේ එම විශ්වවිද්‍යාලයේ ම කුශාන් ඩයස් ක්‍රීඩකයා විසිනි. පැමිණ සිටි සැම පිළිගැනීමේ වගකීම පැවරුණේ රුහුණ විශ්වවිද්‍යාලයේ උපකුලපති ජ්‍යෙෂ්ඨ මහාචාර්‍ය සුජීව අමරසේන මහතාටයි. ජනාධිපති මෛත්‍රීපාල සිරිසේන මහතා මෙන් ම ශ්‍රී ලංකා විශ්වවිද්‍යාල ක්‍රීඩා සංගමයේ (SLUSA) සභාපති මහාචාර්‍ය තිලක් පී. ඩී. ගමගේ මහතා ද මෙහි දී සභාව ආමන්ත්‍රණය කළ අතර රුහුණ විශ්වවිද්‍යාලයේ නියෝජ්‍ය උපකුලපති මහාචාර්‍ය ඊ. පී. එස්. චන්දන මහතා විසින් ස්තුති කතාව සිදු කරන ලදී.

සෞන්දර්‍ය අංගවලින් විචිත්‍රවත් වූ උළෙලට දකුණු පළාත් ආණ්ඩුකාර හේමාල් ගුණසේකර, විශ්වවිද්‍යාල උපකුලපතිවරුන්, ශ්‍රී ලංකා විශ්වවිද්‍යාල ක්‍රීඩා සංගමයේ නිලධාරීන්, ක්‍රීඩා කණ්ඩායම් කළමනාකාරවරුන්, පුහුණුකරුවන්, ක්‍රීඩක ක්‍රීඩිකාවන් ඇතුළු විශාල පිරිසක් එක්ව සිටියහ.

මෙවර තරගාවලියේ නිල සමාරම්භයට පෙර සති කිහිපය තුළ රග්බි, මලල ක්‍රීඩා, හොකී, ටෙනිස් හා ඔරු පැදීමේ තරඟ සම්පූර්ණයෙන් ම හා අවසන් පූර්ව වටය වන තෙක් ක්‍රිකට් තරග නිමාව දැක ඇති අතර මේ වන විට පිළිවෙළින් කොළඹ, ශ්‍රී ජයවර්ධනපුර හා සබරගමුව විශ්වවිද්‍යාල ප්‍රසාද ලකුණු සටහනේ ප්‍රථම, දෙවන හා තෙවන ස්ථානවල රැඳී සිටියි. තරගාවලියේ ඉතිරි තරග ඉසව් 16 අගෝස්තු මස 27වන දින සිට සැප්තැම්බර් මස 07වන දින දක්වා රුහුණ විශ්වවිද්‍යාලයීය පරිශ්‍රයෙහි හා ඒ ආශ්‍රිතව පැවැත්වීමට නියමිතයි.

ක්‍රීඩාවේ සරසවි විශිෂ්ටයන්ගේ ජවය, ශක්තිය මැන බැලෙන, ඉදිරි වසර තුනක කාලය සඳහා වඩාත් ම ක්‍රීඩා ශක්‍යතාවයෙන් සන්නද්ධ විශ්වවිද්‍යාලය සොයා යන SLUG XIII සර්වප්‍රකාරයෙන් ම සාර්ථක වන්නටත්, සුවිශිෂ්ට ක්‍රීඩකයින් සරසවි පද්ධතියෙන් රටට තිළිණ වන්නටත් ප්‍රාර්ථනය කරමින්, දිනෙන් දින උණුසුම් වන SLUG XIII කෙළිබිමේ තතු දැනගන්නට FOS Media සමඟින් රැඳෙන මෙන් ඔබට ඇරයුම් කර සිටිමු.

Catch us on our official web site for SLUGXIII 2019.
Blogs|Videos|Scores and many more…
https://fos.cmb.ac.lk/slug2019/

Stay tuned with us for live updates…
#WeReportBestAtFirst
#FOSMedia

Image Courtesy – FOS Media

 
Tagged : / /