ස්පෙෂල් ඉල්ලුම හා තුන් වන වසර

Share

කැම්පස් එකට ඇවිල්ලා අවුරුදු තුනක් ගත උනා. ඒත් තාම ආපු මුල්ම දවස අද වාගේ මතකයි. අයියලාගේ තාඩන පීඩන ගර්ජනා මැද දවස ගෙවපු ඒ සුන්දර දවස් ආයෙමත් එන්නේ නෑ නේද කියලා මතක් උනාම හිතට දැනෙන්නේ පුංචි කණගාටුවක්. දැන් අපිත් අයියලා. කොටින්ම කිව්වොත් සුපර් සීනියර්ස්ලා. දැන් අලුත් බැච් එකක් එන්නත් කිට්ටුයි අපේ ගොඩ නොගිය අයියලා ඒ දචස එනකං ඇඟිලි ගැන ගැන ඉන්නේ කිව්වොත් මම වැරදි නෑ. අපේ ජූනියර් මල්ලිලාටත් ඒක එහෙමම වෙන්න ඇති. තමන්ගේ බැච් එකෙන් ගොඩා යා ගන්න බැරි උන අපි වගේ හැන්ඩ්සම් අයියලා ඊළඟ බැච් එකක් එනකං ඇඟිලි ගැන ගැන තමයි ඉන්නෙ. ඒත් මම අද නම් කථා කරන්නේ ගොඩ යන කථාවක් ගැන නෙමේ, මේ දවස් වල තර්ඩ් ඉයර් අපේ අයගේ කටේම තියෙන ස්පෙශල් එක ගැන.

කැම්පස් ජීවිතේ ගෙවන තුන් වෙනි අවුරුද්දේදී තමන් වඩාත් කැමති එක් ක්‍ෂේත්‍රයක් තෝරා ගෙන ඒ ඔස්සේ වැඩි දුර අධ්‍යාපනය හදාරන්න කොළඹ විශ්වවිද්‍යාලයේ විද්‍යා පීඨය සිසු දරු දැරියන්ට මංපෙත් විවර කරලා දීලා තියෙනවා. ඒක ජීවිතේ විශාලම කඩ ඉමක්. තමන් අනාගතේ කරන්නේ මොකද්ද කියන එක තීරණය කරන්නත් බොහෝ විට මේ කඩඉමට පුළුවන්. ඒත් ඒ කඩඉමට යන්න ඕනේ කටු ඉඹුල් රාශියක් මැද්දෙනුයි. කැම්පස් එකේ සිසුවෙකුගේ මට්ටම තීරණය කරන GPA කියන ඒකකය (උසස් පෙළ Z-score වගේ එකක්) ඉහල මට්ටමෙන් තියා ගන්න හැම කෙනෙක්ම උත්සාහ ගන්නවා. ඒත් ඒ ගැන වැඩි තැකීමක් නොකරන අයත් නැතුවා නෙමේ. මේ ස්පෙශල් එකක් සඳහා තේරෙන්න නම් එම සිසුවා හෝ සිසුවිය පළමු වසරේ හා දෙවන වසරේ තමන් කරන විෂයන් වලින් ඉහල ලකුණු ලබා ගන්න ඕනේ.

ගොඩක් අය GPA කියන එක දන්නවා උනත් නොදන්න අයත් ඉන්න නිසා ඒක ගැනත් මම පොඩි විස්තරයක් කරන්නම්. අපි උසස් පෙළට ඉගෙන ගන්න පාඩමක් උදාහරණයක් ලෙස ගනිමු. බොහෝ වෙලාවට මේ එක පාඩමක් කැම්පස් එකේ එක කෝර්ස් යුනිට් එකක් විදියට සලකනවා. ඒ කියන්නේ අපි ඉස්කෝලෙදී ඉගෙන ගත්තු දේවල් කොටස් වලට කඩලා වැඩි දුර අධ්යාවපනය ලබා දෙනවා. උදාහරණ ලෙස cell biology වගේ ඒවා ගන්න පුළුවන්. මේ එක එකක් කොර්ස් යුනිට් විශේෂිත වූ අංකයකින් හඳුන්වනු ලබනවා. එය එම කෝර්ස් යුනිට් එක පහසුවෙන් හඳුනා ගන්න පිටුවහලක් ගෙන දෙනවා. පළමු වසර කෝර්ස් යුනිට් එකක් නම් විෂය හඳුන්වන අකුරු දෙකට සෑම විටම අංක 1න් පටන් ගන්නවා. උදාහරණ ලෙස BT 1002. ඉතින් මේ එක කෝර්ස් යුනිට් එකක් පිළිබඳ ඇගයීම කරන්නේ වාර අවසාන විභාගයේදී වසරකට මෙවැනි ඒවා දෙකක් තියෙනවා. මේ කෝර්ස් යුනිට් වලට ලබා ගන්නා ලකුණු අනුව තමයි GPA එක තීරණය වෙන්නේ.

90> =A+ 4.33
80> = A 4.00
75> = A- 3.66
70> = B+ 3.33
65> = B 3.00 සහ B-, C+, C, C-, D+,D හා D- ලෙස. ලබා ගන්නා විභාග අපෙක්ෂකයා විභාගය අසමත් ලෙස සලකනවා. ඔහු නැවත වරක් විභාගය සඳහා පෙනී සිටියත් ඔහුට ලබා දෙන උපරිම අගය වන්නේ C සාමාර්ථයක්. කෝර්ස් යුනිට් එකක් සඳහා නියමිත ක්‍රෙඩිට් (credit) ගණනක් තියෙනවා. එය තිරණය වන්නේ එම කෝර්ස් යුනිට් එක ඉගැන්වීම සඳහා ගත වන කාලය අනුවයි. එය 2යි නම් GPA එක 2න් වැඩි වී තමයි ගණනට එකතු වන්නේ. මේ ආකාරයෙන් තමන් කිරීමට කැමති විශේෂ උපාධිය හා අදාල වන විෂයන් වලට ඉහල අගයක් පළමු හා දෙවන චසර වලින් ලබා ගැනීම තමයි මේ සඳහා තේරීමට අවශ්‍ය වන මූලික සාධකය. ඉතින් සමහර විට මෙවැනි විශේෂ උපාධියක් සඳහා තේරීමට මද තරඟයකට මුහුණු දෙන්නත් විටෙක අවශ්‍ය වෙන්න පුළුවන්. උදාහරණයක් ලෙස රසායන විද්‍යාව සඳහා සිසුන් තුල ඇත්තේ විශාල ඉල්ලුමක්. කෙසේ වෙතත් මේ වෙද්දි අපේ අයට තමන්ගේ බලාපොරොත්තු ඉෂ්ඨ වෙලා ඉවරයි. ටික දෙනෙක්ට බලාපොරොත්තු සුන් වෙලා ගියත් ඒ අයටත් විද්‍යා පීඨය වසර හතරක සාමාන්‍ය උපාධියක් සූදානම් කරල තිබෙන නිසා අධෛර්යමත් වීම අවශ්‍ය වෙන්නේ නෑ. විශේෂ උපාධිය සඳහා තේරුණු සමහරු ඒක භාර නොගෙන සාමාන්‍ය උපාධිය අරන් පිට වෙලා යන අවස්ථාත් තිබෙනවා. පංති සාමාර්ථයක් මඳක් පහසුවෙන් ලබා ගන්නට මේ අයට පුළුවන් වීම ඒකට හෙතුවක් වෙන්න ඇති. කොහොම වෙතත් ස්පෙශල් තේරුණු ගොඩක් අයට තාමත් ඒකට අනුවර්තනය වෙන්න බැරි වෙලා තියෙනවා. අධික වැඩ කටයුතු ප්‍රමාණයක් තිබීම එයට හේතුවක් වෙන්න ඇති. අවසාන වශයෙන් මම මේ වසරෙ විශේෂ උපාධිය සඳහා තේරුණු ගණන මෙහි සටහන් කරන්නම්.එමෙන්ම එම සියළුම සිසුන්ට මම මෙයින් සුභ පතනවා.

Plant Sciences – 6
Bio Technology – 6
Bio Informatics – 2
Zoology – 3
Chemistry – 28
Molecular Biology – 16
Pharmacy – 10
Computational Chemistry – 7
Math/Bus, Fin. & Comp. Science – 12
Math & Stat with Comp. Science – 4
Financial Mathematics – 7
Physics – 10
Engineering Physics – 10
Computational Physics – 10
Industrial Statistics – 10
Statistics – 10
Statics with Computer Science – 10