මේ දවස් වල අපේ තරුණ තරුණියන් බොහෝ පිරිස් රුපවාහිනිය අසල පොරකනවා.මොකද මේ දවස් වල නැවතත් ක්‍රිකට් වසන්තය ඇවිල්ලා.මාර්තු 16 දින සිට පුරා සති 3ක් බංග්ලාදේශයේ තණ නිල්ල ඉතාමත් උණුසුම්ව පවතීවි. මං මේ කියන්නේ මොකක් ගැනද කියල දැන් ඔයාල දන්නව ඇති.මේ දිනවල බංග්ලාදේශයේ පැවැත්වෙන පස්වෙනි පන්දු වාර 20 20 ලෝක කුසලාන තරඟාවලිය ඉතාමත්ම උණුසුම් මුහුණුවරක් ගෙන තිබෙනවා.අපි මෙම පන්දුවාර 20 20 තරඟ එහෙමත් නැත්තම් T 20 තරඟ වල ආරම්භය සොයා බලමු.
ක්‍රිකට් තරඟ වල තරඟ රටා 3ක් තියෙනවා.ටෙස්ට් , එක්දින සහ පන්දුවාර 20 20 තරඟ. ඇත්තෙන්ම ක්‍රිකට් කියන්නේ ටෙස්ට්(TEST) තරඟයි.නමුත් නරඹන්නන් ටෙස්ට් තරඟ වලට උදාසීන බවක් දක්වන්නේ එය දින 5ක් ක්‍රීඩා කරන නිසාත් ඇල්මැරුණු තරඟ විලාශයක් අනුගමනය කරන නිසාත්ය. එයට පිලියමක් ලෙස එක්දින පන්දුවාර 50 (ODI )තරඟ පටන් ගත්තේ වර්ෂ 1971 දී මෙල්බර්න් ක්‍රීඩා පිටියේදී ඔස්ට්‍රේලියාව සහ එංගලන්තය අතරදීය. නමුත් එහෙදිත් සම්පුර්ණ තරඟයටම පැය 6ක් පමණ ගත වන නිසා ප්‍රේක්ෂකයින්ට ඊට වැඩ විනෝදාස්වාදයක් අවශ්‍ය විය.එයට පිලියමක් ලෙස තමයි පන්දුවාර 20 20 තරඟ ආරම්භ වුයේ.ඒ 2003 වසරේදී එංගලන්තයේ ලෝර්ඩ්ස් පිටිදීයි .මුල්ම පන්දු වාර ජාත්‍යන්තර 20 20 (T 20I ) තරඟය පැවැත්වුයේ 2005 වසරේදී ඔස්ට්‍රේලියාව සහ නවසීලන්තය අතර නවසීලන්තයේ ඕක්ලන්ඩ්හි ඒඩ්න් පාර්ක් (Eden Park ) පිටියේදීය .එහිදී ජය ලැබුවේ ඔස්ට්‍රේලියාවයි.
ශ්‍රී ලංකාව හා හා පුරා කියා පන්දුවාර 20 20 ජාත්‍යන්තර තරඟයකට සහභාගී වුයේ ක්‍රිකට් ක්‍රීඩාවේ මහා ගෙදර වන එංගලන්තයේදී එංගලන්ත පිල සමඟයි. 2006 වසරේදී එංගලන්තයේ සවුත්හැම්ප්ටන් හි රෝස්බෝල් පිටියේ පැවැත්වුණු එම තරඟය ලකුණු 2කින් තියුණු ලෙස ජය ගැනීමට ශ්‍රී ලංකාව සමත් විය. ඔයාලගේ උනන්දුව නිසා මං එම තරඟයේ ලකුණු සටහන සටහන පහතින් ඉදිරිපත් කරන්නම්.
ටෙස්ට් , එක්දින ජාත්‍යන්තර තරඟ මෙන්ම මෙම පන්දුවාර 20 20 තරඟ වලද එයටම ආවේණික තරඟ නීති කිහිපයක් දකින්න පුළුවන් ඉතාමත් කෙටියෙන් ඔයාලට මං ඒවා කියන්න කැමතියි.තරඟය ඇතුලත සිසිල් බීම පානය පිණිස හෝ වෙන අවශ්‍යතා සඳහා කෙටි විවේක ලබා දෙනු නොලැබේ. විනාඩි 75කින් එක පිලක් තම ඉනිම නිමා කල යුතුය.ඒ වගේම එක් ඉනිමක් අවසාන වූ පසු මිනිත්තු 15ක පමණ කෙටි විවේකයක් පමණක් ලබාදෙන්නේ ඊලග ඉනිමට සුදානම් වීම පිණිසයි.පන්දු යවන්නෙකු එක් ඉනිමක් තුල පන්දුවාර 4ක් පමණක් උපරිම ලෙස යැවිය හැකි වේ.power play අවස්ථාව පලවෙනි පන්දුවාර 6 තුලදී ලබා දේ.එහිදී පන්දු රකින්නන් දෙදෙනෙක් පමණක් යාර 30 සිමාවෙන් පිට පන්දු රැකීම කල යුතුවේ.දෙවෙනි ඉනිම අවසානයේ දෙපිලේම ලකුණු සම වුවහොත් සුපිරි පන්දු වාරයේදී (super over) එක් පිලක ජය තීන්දු කරයි.එම සුපිරි පන්දු වාරයේදී පලවෙනි වර ක්‍රීඩා කරන කණ්ඩායම ලබාදෙන ඉලක්කය හඹා යාමෙන් ජය ලබා ගත හැකිය.එහිදී එම පන්දු වාරයේදී කඩුලු 2ක් දැවී ගියහොත් එම පිලේ සුපිරි පන්දුවාරය නිමාවේ.වැඩිම ලකුණු ලබා ගන්නා පිල ජයග්‍රහණය කරයි.නමුත් මෙහිදී සුපිරි පන්දුවාරයේදී තරගයේ ලකුණු සම වුවහොත් දෙපිලේම 6 පහරවල් ගණන් කර වැඩිම 6 පහරවල් ඇති පිලට දිනුම ලබා දෙයි.එහිදීත් සම වුවහොත් දෙපිලේම 4 පහරවල් ගණනය කර එයින් වැඩිම 4 පහරවල් ප්‍රමාණයක් එල්ල කර ඇති පිල ජයග්‍රහණය කරයි.අනෙකුත් නීති රීති එක් දින තරඟ වලදී මෙන්ය.
පන්දු වාර 20 20 ICC ශ්‍රේණිගත කිරීම් වල අංක 1 කණ්ඩායම අපගේ ශ්‍රී ලංකාවයි.දෙවෙනි ස්ථානයේ අසල්වැසි රට වන ඉන්දියාව රැදී සිටිනවා.තෙවෙනි ස්ථානයේ රැදී සිටින්නේ පකිස්ථානයයි.ක්‍රිකට් ක්‍රීඩාවේ තිඹිරි ගෙය ලෙස හදුන්වන එංගලන්තය සිටින්නේ 8 වෙනි ස්ථානයෙයි.මෙමගින් පැහැදිලි වන්නේ ආසියානු රටවල් තවමත් ක්‍රිකට් ක්‍රීඩාවේ ඉදිරියෙන් සිටිනා බවයි.
මේ දිනවල පැවැත්වෙන පන්දු වාර 20 20 ලෝක කුසලාන තරඟාවලියේ ආරම්භය ගැන කිව්වේ නැත්තම් මදි කමක් කියල හිතෙනවා මට. ඒ නිසා මම ඉතාමත් කෙටියෙන් ඉතිහාසය ඔයාලට සදහන් කරන්නම්.පලවෙනි පන්දුවාර 20 20 ලෝක කුසලාන තරඟාවලිය පැවැත්වුයේ දකුණු අප්‍රිකාවේදී. එහිදී මංගල තරඟය පැවැත්වුයේ බටහිර ඉන්දීය කොදෙව්වන් අතර සහ දකුණු අප්‍රිකාව අතරයි.එහිදී ජයග්‍රහණය කලේ දකුණු අප්‍රිකා කණ්ඩායමයි. මම ඒ ලකුණු සටහන ඔයාලට ඉදිරිපත් කරන්නම්.
එම ලෝක කුසලාන තරඟාවලියේදී ලෝක වාර්තා කිහිපයක් වාර්තා වුනා.පන්දුවාර 20 20 තරඟයකදී එක් පන්දුවාරයකදී 6 පහරවල් 6ක් එල්ල කල එකම ක්‍රීඩකයා වීමට ඉන්දියාවේ යුවරාජ් සිං ට හැකි වුණා.එහිදී එංගලන්තයේ ස්ටුවර්ට් බ්‍රෝඩ් හට පිට පිටම 6 පහරවල් පිටිය පුරාවටම එල්ල කලේ ප්‍රේක්ෂකයින් අමන්දානන්දයට පත් කරවමිනි.එමෙන්ම ශ්‍රී ලංකාව තමන් සහභාගී වූ පලවෙනි තරඟයේදී කෙන්යාව පරදවා දැවැන්ත ජයක් ලැබීමට සමත් වුනා.එම තරඟයේදී පන්දුවාර 20 20 ජාත්‍යන්තර තරඟයකදී එක් පිලක් වාර්තා කල වැඩිම ලකුණු 260/6 ලබා ගැනීමට ශ්‍රී ලංකාව සමත් වුණා .එම තරගයේ ලකුණු සටහන පහත පරිදි වුනා.
නමුත් අවසානයේදී අවසන් මහා තරඟයට එක්වුණේ ඉන්දියාව සහ පකිස්ථානයයි.එහිදී පකිස්ථානය පරදවා ජය ලබන්නට ඉන්දියාව සමත් වුනේ මංගල පන්දුවාර 20 20 ලෝක කුසලානය තමන්ගේ රටට ගෙන එමිනි.
දෙවනි පන්දුවාර 20 20 ලෝක කුසලානය පැවැත්වුයේ එංගලන්තයේදීය.ශ්‍රී ලංකාව තමන් සහභාගී වූ තරඟ සියල්ලම ජය ගෙන අපරාජිතව අවසන් මහා තරගයට එක වුයේ පකිස්ථානය සමග තරග වැදීමටයි. නමුත් එහිදී ඉතාමත් අවාසනාවන්ත ලෙස අප වෙතින් එම අවස්ථාව ගිලිහි ගියේ ශ්‍රී ලංකා ක්‍රීඩා ලෝලීන්ගේ හදවත් සසල කරවමිනි.තෙවෙනි පන්දුවාර 20 20 ලෝක කුසලාන තරඟාවලිය පැවැත්වුයේ බටහිර ඉන්දීය කොදෙව් දුපත් වලදියි.එහිදී අවසන් පන්දුවේදී ඉන්දියාව පරදවා අවසන් පූර්ව තරගයට ශ්‍රී ලංකාව පැමිණියද එහිදී ඔස්ට්‍රේලියාව වෙතින් දැවැන්ත පරාජයක් ලබා තරගාවලියෙන් ඉවත් වීමට සිදු වුණා.එහිදී එංගලන්තය ලෝක කුසලානය ලබා ගත්තේ එංගලන්තය ක්‍රිකට් ඉතිහාසයේ ලබාගත් පළමු ලෝක කුසලානය බවට එය පත් කරවමිනි. හතරවෙනි පන්දුවාර 20 20 ලෝක කුසලාන තරඟාවලිය අපට වැදගත් වුයේ එය සම්පුර්ණයෙන්ම ශ්‍රී ලංකාවේදී පැවැත්වූ බැවිනි.එහිදී ආක්‍රමණශීලි තරඟ විලාශයක් පෙන්නුම් කරමින් බටහිර ඉන්දීය කොදෙව්වන් සමග අවසන් මහා තරඟයට පැමිණියද එහිදීත් අවාසනාවන්ත ලෙස ශ්‍රී ලංකාවට පරජයයේ කටුකත්වය විදීමට සිදු වුනා. පිරිමි ලෝක කුසලානයට සමගාමිව කාන්තා ලෝක කුසලානයද පැවැත්වෙන බව ඔබ දන්නවා ද ?මෙවර ශ්‍රී ලංකාව මෙන්ම අනෙකුත් රටවල්ද පස්වෙනි ලෝක කුසලාන තරඟාවලියට සහභාගී වී කුසලානය තමන්ගේ රටට ගෙන යාමට බංග්ලාදේශයට පැමිණියේ අත්දැකීම් පිරි ක්‍රීඩකයින් මෙන්ම යොවුන් ක්‍රීඩකයින් ද සමගයි. පස්වෙනි පන්දුවාර 20 20 ලෝක කුසලානය අපගේ මව්බිමට ගෙන ඒමට අපගේ නායක දිනේෂ් චන්දිමාල් ඇතුළු සිංහ පෝතකයින්ට ශක්තිය ලැබේවා.
Sources :
http://crickett20cup.blogspot.com [Cover Photo]
http://www.icc-cricket.com/about/38/rules-and-regulations
http://twenty20worldcup.cricketworld4u.com/rules.php
http://www.cricket20.com/db/int/