බුදු සමිඳු සඳ කිඳුරු කව දෙසතී

Share

පලා හදවත ගලන කදුලැල්ලෙන්,
සෝදනා කල සසර පියසටහන් ,
හැර ගියත් මුලු ලොවට කරුණාවෙන්,
තනි වුණා ඇය රජමැදුරෙ සුවිසල්.

වසර ගණනක් සිතේ දුක සඟවා,
කසී සලු පිලි අතැර සිත පහදා,
පාරමී දම් පිරුව මුත් සොඳිනා,
හද පැලී උනු කඳුලු ගඟ ගැලුවා.

එදා කිඳුරිය ඇය ම විය නිකැලැල්
පබාවතියද රුවින් අග තැන්පත්
අතැර විජිතය වන වැදුනු බිසවත්
රුදුරු සසරේ ඇය ම විය සවියත්

ලොව්තුරා බුදු සමිඳ දැකගත් දා,
හැඩු කදුලින් දෙපා සෙදුවා.
එකට ආ මග නිමා වී සසරේ ,
ඇගේ කඳුළැලි පියුම් වී පිදුනා.

මහා ගුණ කඳ මෙතෙක් කිව නොහැකී,
හැම භවයක නිමල පෙම් කවකී.
ඇගේ ගුණ කඳ අගය වන පරිදී,
බුදු සමිඳු සඳ කිඳුරු කව දෙසතී.