කැලණියේ වින්සන්ට් සහ ෆ්ලෝරිඩා ගෝමිස් යුවළට දාව ඔස්වල්ඩ් ගෝමිස් ළදරුවා උපන්නේ 1932 දෙසැම්බර් 12 වන දා ය.

සීතල නත්තල් මාසයක උපත ලද ගෝමිස් දරුවා පාසල් අධ්‍යාපනය ලැබුවේ මරදාන ශාන්ත ජෝශප් විද්‍යාලයෙනි. ඊට පසු පූජක වරය ලබාගැනීමට කැමැත්තෙන් කොටහේන ශාන්ත බෙනඩික්ට් සෙමනේරියට ඇතුළත් වූ අතර එහි අධ්‍යාපනය නිම කරමින් මහනුවර අම්පිටියේ ජාතික දෙව්සත්හලට ඇතුළු වූයේ 1950 දී ය. එහි සාර්ථකව පුහුණුවීම නිම කළ ඔහු 1958 පෙබරවාරි 3 දා පූජකවරයකු ලෙස පැවිදි දිවියට ඇතුළත් විය. කීර්තිමත් ලෙස පියතුමකුගේ කාර්යභාරය ඉටුකිරීමේ ප්‍රතිඵලය වූයේ අවුරුදු 34 ක් වැනි තරුණ වියේදීම බිෂොප්වරයකු වශයෙන් පත්වීමට ඉඩ ලැබීමයි. ඒ 1968 ජූලි 18 වන දා ය.

ඔස්වල්ඩ් ගෝමිස් හිමිපාණෝ තරුණ වියේ සිට ම කිතු දහම මෙන් ම බුදුදහම පිළිබඳව ද උනන්දුවක් දැක්වූහ. මඩිහේ පඤ්ඤාසීහ නාහිමියන් තම ස්වයං චරිතාපදානයේ දී ගෝමිස් පියතුමන් වෙනුවෙන් පිටු 4 ක් ම වෙන් කිරීමෙන් ඒ බව මනාව පැහැදිලි වේ. ශ්‍රී ලංකාවේ විශ්වවිද්‍යාලයක කුලපති පදවියට පත්වූ පළමුවැනි කතෝලික පියනම බවටද උන්වහන්සේ පත් වූයේ කොළඹ සරසවියේ කුලපති පදවිය ලැබීමත් සමඟ ය.

උන්වහන්සේ ගුරුවරයකු වශයෙන් ද මුල් කාලයේ කටයුතු කළහ. ඒ වර්ෂ 1958 සිට 1960 දක්වා කොළඹ ශාන්ත ඇලෝසියස් සෙමනේරියේ කථිකාචාර්යවරයකු වශයෙනි. වර්ෂ 1961 සිට 1968 දක්වා කොළඹ කතෝලික මුද්‍රණාලයේ අධ්‍යක්ෂ සහ සංස්කාරක ලෙස සේවය ලබා දුන්නේ ය. ගෝමිස් හිමිපාණන් 1966 ජනවාරි 25 දා අනුරාධපුර රදගුරු ලෙස පත් වූ අතර කොළඹ අගරදගුරු පදවිය තෙක් සේවය කළේ රජරට වැව් බැඳි රාජ්‍යයේ ය. ඒ කාලයේ අටමස්ථානයේ නායක හිමිවරුන් සමඟ සමීප ඇසුරක් ගොඩ නගා ගැනීමටද උන්වහන්සේ ක්‍රියා කළහ. මහාචාර්ය වල්පොල රාහුල හිමි, මහාචාර්ය බෙල්ලන්විල විමලරතන හිමි වැනි උගත් භික්ෂූන් වහන්සේ සමඟ සමීපව ඇසුරු කළ ගෝමිස් හිමිපාණන් රටේ ජාතික සමගිය ගැන කැක්කුමකින් අදහස් පළ කළහ. කොළඹ අගරදගුරු මන්දිරයේ භික්ෂූන් වහන්සේලාට දානයක් පිරි නැමූ පළමු හිමිපාණන් වන්නේ ද ගෝමිස් අගරදගුරු හිමියෝ ය. මහෝපදේශය ඇතුළු කෘති 8 ක්  ද උන්වහන්සේ ලියා තිබේ.

උන්වහන්සේ සෙමනේරිවල නිබන්ධන කාර්ය මණ්ඩලවලත්, කොළඹ කතෝලික මුද්‍රණාලයේ අධ්‍යක්ෂ සහ කර්තෘ ලෙසත්, පිලිපීනයේ රේඩියෝ වෙරිටාස් හි අධ්‍යක්ෂ මණ්ඩලයේ සාමාජිකයෙකු ලෙස ද සේවය කළහ. එතුමන් ආගමික හා සිවිල් යන දෙඅංශයෙන්ම විවිධ ජාතික හා ජාත්‍යන්තර සංවිධාන, මණ්ඩල, කොමිෂන් සභා ආදියෙහි සාමාජිකයෙකු, මහ ලේකම්වරයෙකු සහ සභාපතිවරයෙකු ලෙස ස්වකීය ගරු සේවය ලබා දුන්හ. අගරදගුරු ඔස්වල්ඩ් ගෝමිස් හිමිපාණෝ 1977 – 2001 කාලය තුළ කොළඹ විශ්වවිද්‍යාලයේ පාලක සභාවේ සාමාජිකයෙකු ද විය.

ඔහු දිනපතා සහ සති අන්ත පුවත්පත් සඳහා සිංහල සහ ඉංග්‍රීසි යන භාෂා දෙකෙන්ම පුළුල් ලෙස ලිපි ලියූ අතර පොත් විශාල ප්‍රමාණයක් ප්‍රකාශයට පත් කළේය. පාසල්, ජාත්‍යන්තර පාසල් සහ කාර්මික පාසල් 15 ක් පමණ පිහිටුවීමට එතුමාණන් දායක වී ඇත. එතුමාණන් උපන් ගම වන කැලණියේ ජනතාව සඳහා වෛද්‍ය මධ්‍යස්ථානයක් ද ස්ථාපිත කළේය. කැලණියේ උන්වහන්සේ පරිත්‍යාග කළ අක්කර 14 ක ඉඩමක වැඩිහිටි නිවාසයක් ඉදි වෙමින් පවතී. එතුමාණන් දුප්පතුන් සහ සුනාමි විපතට පත් වූවන් සඳහා විවිධ නිවාස යෝජනා ක්‍රම සහ ශිෂ්‍යත්ව යෝජනා ක්‍රම රැසකට සහය වී ඇත.

මානව වර්ගයාට ඔස්වල්ඩ් ගෝමිස් හිමිපාණන් කළ අමිල සේවය අගයමින්, චීනයේ ඉපැරණි විශ්වවිද්‍යාලයක් වන Fu Jen විශ්ව විද්‍යාලය විසින් උන්වහන්සේ වෙත දර්ශනශූරී ආචාර්ය උපාධිය (Honoris Causa) පිරිනමන ලදී.

ශ්‍රේෂ්ඨ අධ්‍යාපනඥයෙක් මෙන්ම සිංහල භාෂාව සාහිත්‍යය සහ තත් කාලීන බුදු දහම කෙරෙහි පතළ දැනුමකින් හෙබි උන්වහන්සේ ප්‍රවීණ ගත් කතුවර හිමිපාණන් නමක් ද වූහ. අර්නස්ට් පෝරුතොට , මර්සලින් ජයකොඩි පියතුමන්ලාගේ පශ්චාත් කාලීනයෙක් වූ ගෝමිස් හිමිපාණෝ කතෝලික සභාවේ චිරස්ථිතිය සඳහා මෙන්ම ශ්‍රී ලාංකීය සමාජයේ යහ පැවැත්ම උදෙසා ආධ්‍යාත්මික නායකයෙකු ලෙස පෙරමුණ ගත් හ.

කොළඹ විශ්වවිද්‍යාලය හිටපු කුලපති වහන්සේ වූ ද, අනුරාධපුර, කොළඹ යන අගරදගුරු පදවි සඳහා හිටපු අගරදගුරු හිමිපාණන් වූ ද අතිඋතුම් ආචාර්ය ඔස්වල්ඩ් ගෝමිස් රාජගුරු ප්‍රසාදීන් වහන්සේ ස්වර්ගස්ථ වූයෙන් උන්වහන්සේ ට ස්වර්ග මෝක්ෂ සම්පත්තිය ප්‍රාර්ථනා කරන්නෙමු.

Image Courtesy :

Featured Image : https://bit.ly/3HVWcfm

Image 1:https://bit.ly/3YrOLCd

Image 2:https://bit.ly/3HYizkA

Image 3: https://bit.ly/3WXoA5a