මුවදොර අසළ සිටි රඟ නුරාවී

පස් මහ බැලුම් නෙතු අතර පාවී

නොනිදන සිහින ළඟ සඳ උදා වී

මේ දිගු ගමන කෙළවර කරාවී

අද හෙට දුවන රේල්ලුවක පීල්ලක

ඇසිපිය වහන් කරන මේ සෙල්ලම

මිටකින් පහත් තනිකඩ හිතින් බට

සැමරුම් වේද මධු සඳ උදා කළ

විටකින් මකා සැනෙක යළි පතා

තිර පිටු පසින් අසම්මත කතා

තුරු පටු අතර සිත නිවන කතා

නුඹ හඬන දා ඔහුට අඬහැරය උනා

රුහිරෙන් වතක් දවසක උදාවක්

ලොව අණසකට නතු වන කලාවක්

කියමින් කිසිත් නොඇසූ කතාවක්

වත සළු හඬයි හත් අට වතාවක්

මත් මල් මිටක් ගෙල සිඳ පලන්දා

කළුවර රැයක් එළි කර පහන් දා

දිවියක වගක් නොදැණුනු බිළින්දා

ලොව එළි දකී පපුතුර පිළිස්සා

යදමට හුරු ව අඩවන් ව සළු හැර

නුඹ තතු දනියි සඳ අහිමි මුවදොර

සැනසුම් සුසුමේ සැමදා මනාලිය

සිතුවිලි දවයි තුන්යමක රාත්‍රිය

මිරිවැඩි පෙමක නුඹ ම අද බාරිය

රහසින් හඬයි කෙරෙන තුරු කාරිය

නොදකින හෙටක රජ වන කුමාරිය

නාඬා හිඳින්, හඳ කියයි සාක්කිය

Image Courtesy: https://bit.ly/3Fm2iV8