කාලයයි මේ එක්ව නැගුමට

Anjali , , 0 Comments

නහරයක් නහරයක් පාසා
දිවෙන උණුසුම් රුහිරු ධාරා
රක්ත පැහැමයි නොවේ වෙනසක්
ඔබේ යැයි මගේ යැයි කියා

ලද අරුම ජීවන ගමන තුල
බාධක බොහෝමයි හමුවෙනා
ඔබට මෙන් මා හට ද එලෙසයි
එකම උරුමයකිය සදා

හද සලිත කළ වේදනාවන්
නෙතු අගින් ජීවය ලබා
මා ද ඔබ මෙන් තවත් අයෙකි ය
පවසලා නික්මී ගියා

ඔබ උතුරු කොණ මා දකුණු කොණ
දිවි ගෙවු මුත් වෙන් වෙලා
අපි දෙදෙන සොහොයුරන් වන්නෙමු
එකම ලක්මව් සෙවණේ වැඩෙනා

ජාති ආගම් භේද කුමටද
අපි එකම මවකගේ දරුවන්
එකම මව්කුස තුළින් නොවුන ද
එකම මව්බිම තුල උපන්

උපන් දා කඩදාසියක් මත
සීමා රැසක් සටහන් කළේ
නමුදු නොහැකිය ඒ කිසිවකට නම්
බිඳ දමන්නට සොයුරුදම් බලේ

බිඳ දමන්නට සොයුරුදම්
පැමිණේවි මහ බලවේගයන්
එකිනෙකා හා යුධ වැදී අප
මියෙනු දැකුමට රිසි සිතින්

නිත්‍ය නොවෙනා ලෝකයක් තුල
නිත්‍ය සීමා පවුරු තැනුමට
කිමද ඇතැමුන් වෙහෙස වන්නේ
අපේ උන්ගෙම ලේ හලා බිම

කාලයයි මේ එක්ව නැගුමට
සියල් සීමා ඉවතලා හැම
අසීමිත සොහොයුරුදමක බල
ගොඩ නගමු රැකුමට අපේ මව

Image Courtesy- https://groundviews.org/wp-content/uploads/2012/11/Nation.jpg