අප සියල්ලන්ගේ අභිප්‍රාය වන්නේ සතුටින් පිරි දිවියකි. ඒ සදහා අප අප වෙනුවෙන් කැප විය යුතුය. එහෙත් විටක අපට අප අමතකව යයි. තවත් විටක කාර්යබහුල ජීවිතය අප නිරෝගී බවෙන් ඈත් කර තබයි. ශාරීරික හා මානසික සුවය වැදගත් වන්නේ එය ඉහත දැක්වූ බාධක දුරුකර අපේ අරමුණු කරා අප ගෙන යන බැවිනි.සකසන ලද යහපත් ශරීරයකට ශාරීරික මෙන්ම මානසික ව්‍යායාමද වැදගත් වේ.
පසුගිය දිනක කොලඹ විශ්ව විද්‍යාලීය නවකලාගාරයේදී විද්‍යා පීඨ අධ්‍යයන හා අනධ්‍යයන කාර්ය මණ්ඩලය ඉලක්ක කර ගනිමින් එවන් සාර්ථක මානසික හා ශාරීරික සුවතා වැඩසටහනක් පවත්වන ලදී. විද්‍යා පීඨ පිඨාධිපති, මහාචාර්ය රන්ජිත් මහානාම මහතාගේ අදහසකට අනුව පැවති මෙම වැඩ සටහනෙහි සම්පත් දායකත්වය වෛද්‍ය අසංග විජේරත්න මහතා ඇතුළු පිරිස ලබා දුන්හ. වෛද්‍ය අසංග විජේරත්න මෙම ක්ෂේත්‍රයෙහි දීර්ගකාලින අත්දැකීම් සහිත විද්වතෙක් වන අතර ඔහු ස්කොට්ලන්තයේ ගලැස්ගොව් විශ්ව විද්‍යාලයේ (University of Glasgow, Scotland) මානව චාලක විද්‍යාව හා ක්‍රීඩා වෛද්‍ය විද්‍යාව (Human Kinetics and Sports Medical Science) පිළිබද ආචාර්ය උපාධිධාරියෙකි.
එදිනෙදා ජීවිතයේදී අප මුහුණ දෙන සෞඛ්‍යමය අභියෝග හා ඒවාට සාර්ථකව මුහුණ දෙන අයුරු, ශරීර සුවතා ව්‍යායාම සිදුකරන අයුරු හා නිවැරදි අහාර රටාවන් එදින සාකච්ඡා කරන ලද මාතෘකා අතර වේ. අධ්‍යයන හා අනධ්‍යයන කාර්ය මණ්ඩලයේ 80 ක පමණ පිරිසක සහභාගිත්වය මේ සඳහා ලැබී තිබු අතර ඔවුහු විෂය ක්ෂේත්‍රය පිළිබද විශාල දැනුමක් ලබාගත්හ.