සිහින ලෝකයෙන් ආදරයක් සෙවීම
මේ ඇබැද්දිය වෙන්නෙ නම් ආදර කතා අඩංගු නවකතා සහ චිත්‍රපටිවලට ඇබ්බැහි උන අයටයි. තිර පිටපත් නිර්මාණකරුවන් උත්සාහ කරන්නේ බොහෝ විට සුදු චරිත මවන්නයි. ඒත් සැබෑ ලෝකෙ ජීවත් වෙන මිනිස්සු සර්ව සම්පූර්ණ සුදු චරිත නෙවෙයි. ඔවුන් තුළ යහපත් ගතිගුණ වගේම අයහපත් ගතිගුණත් තියෙනවා. ඔවුන්ට සම්පූර්ණ ආදරයක් අනෙකා වෙත ලබා දෙන්න බෑ. ඉතින් සර්ව සම්පූර්ණ ආදරවන්තයෙක් හොයන කෙනෙක්ට ආදරයක් හිමි කර ගන්න අමාරුයි. සර්ව සම්පූර්ණ ආදරවන්තයෙක් කියල කාවහරි තෝරගෙන, මාස කිහිපයකට පස්සෙ ඔහුගේ /ඇයගේ අඩුපාඩු දැක්කම කලකිරෙන බරපතල අඩුපාඩුවක් මේ පුද්ගලයන් තුළ පවතිනවා.
තමා කෙරෙහි ගරුත්වයක් නොමැති වීම
තමාට ගරු නොකරන කෙනෙක්ගේ ආදරය කවදාවත් සාර්ථක වෙන්නෙ නෑ. මොකද තමන්ට ගරු නොකරන පුද්ගලයෙක්ට වෙන කෙනෙක් ගරු කරන්නෙත් නැහැ. සමහර පුද්ගලයන් ඉන්නවා තමන්ට සහකරුවෙක් හෝ සහකාරියක් හමුවුන ගමන් ඔහුට හෝ ඇයට අසීමිත වටිනාකමක් දීලා තමන්ගේ වටිනාකමට තැනක් නොදෙන. අනිත් කෙනා වෙනුවෙන් තමන් කැමති දේවල් වෙනස් කර ගන්න, තමාගේ යාළුවෝ සහ රැකියාව පවා අතහරින පුද්ගලයන් තමන් විසින්ම තමාගේ වටිනාකම පහත හෙළා ගන්නවා. එහි ප්‍රතිඵලයක් ලෙස අනෙකාත් ඔබට දක්වන ගරුත්වය කෙමෙන් කෙමෙන් අඩු වී යනවා.
අනිත් කෙනාගේ පෞද්ගලික සීමාවන් වෙත බාධා පැනවීම
හැම පුද්ගලයෙක්ටම පෞද්ගලිකත්වයක් තියෙනවා. සමහර පුද්ගලයන් හිතාගෙන ඉන්නවා ආදරය කිරීම කියන්නේ අනිත් කෙනාගේ පෞද්ගලික ජීවිතය ආක්‍රමණය කිරීම කියලා. අනිත් කෙනාගෙ තීරණ සහ ජීවන රටාව වෙනස් කරන්නට යාම වගේ අනවශ්‍ය ඇඟිලි ගැහීම්වලින් වෙන්නේ සබඳතාවය පළුදු වීමයි. අනිත් කෙනාගේ ගතිගුණවලට ඔබ කැමති නැත්තම් ඔහුව හෝ ඇයව බලෙන් වෙනස් කිරීමට උත්සහ කරනවාට වඩා අතහැර යාම සුදුසුයි. මොකද අනවශ්‍ය විදියට තමන්ගේ ජීවිතයට ඇඟිලි ගසන පුද්ගලයෙක් එක්ක ජීවත් වෙන්න කවුරුත් කැමති නැහැ.
ඔබට සමාව දෙන්න බෑ
සමහර පුද්ගලයන් ඉන්නවා තමන්ට කවුරුහරි පොඩි හෝ වරදක් කළොත් ඒ දේ හොඳින් මතක තියාගෙන ඉන්න. සමහර පුද්ගලයන් අනෙකා සමාව ඉල්ලුවත් සමාව දෙන්නෙ නෑ. මේ වගේ අයටත් සබඳතාවයක් ඉස්සරහට ගෙනියන්න බැහැ. ඕනෙම පුද්ගලයෙක්ගේ අතින්, ඕනෑම වෙලාවක වරදක් වෙන්න පුළුවන්. ඔබට කවදාවත් වැරදි නොකරන සර්ව සම්පූර්ණ සහකරුවෙක් නම් මුණ ගැහෙන එකක් නෑ. තවත් සමහරු ඉන්නවා සමාව දෙන බව අඟවලා, පසුව කළ වැරදි මතක් කරමින් අනෙකාට රිදවන්න උත්සහ කරන. මේ වගේ පුද්ගලයන් එක්කත් කවුරුවත් ආදරයෙන් බැඳෙන්නේ නෑ.
ආදරයට සිතින් සූදානම් නැති වීම
තරුණ වයසෙදී ආදරය නොලැබීම ගැන දුක් වෙන සමහරු ඉන්නවා ආදරය කරන්න ඇත්තටම උවමනාවක් නැති. ඔවුන් ආදරයක් නොලැබීම ගැන දුක් වෙන්නේ නිසි වයස පහු වීම, මිතුරන් හැමෝටම පෙම්වතුන් /පෙම්වතියන් සිටීම වගේ කාරණා නිසා. මේ අයව ඇත්තටම සතුටට පත් කරන්නේ ආදරය නෙවෙයි. අධ්‍යාපනයේ ඉහළට ගමන් කිරීම, රැකියා ජීවිතයේ ඉහළට ගමන් කිරීම හෝ සංචාරය වැනි විනෝදාංශ වල නියැලීම වගේ දේවල්වලින් තමයි මේ අය ඇත්තටම සතුටක් ලබන්නේ. ආදරය ලබන්න සිතින් සූදානම් නැති කෙනෙක්ට ආදරයක් ලැබෙන ඉඩකඩ නම් ටිකක් අඩුයි.
තමා ගැන පමණක් සිතීම
තමා ගැන විතරක් හිතන, තමාගේ අවශ්‍යතාවලට විතරක් මුල් තැන දෙන පුද්ගලයන්ට කියන්නේ ආත්මාර්ථකාමී මිනිසුන් කියලයි. ආත්මාර්ථකාමී ගතිගුණ තියෙන පුද්ගලයෙක්ට ආදරය හිමිවෙන්නෙ හරි අඩුවෙන්. තමන්ගේ අවශ්‍යතාවලට තැනක් නොදෙන පුද්ගලයෙක් ළඟ රැඳෙන්න කවුරුත් උත්සහ කරන්නේ නැහැ.
Image links :