වෙනස් නොවෙනා බැඳීමක්

 

තෙරක් නොපෙනෙන අහස් වියනේ
සදා දිදුලන තාරකාවිය
සඳක් නැතිදා බොහෝ අගනා
රටා මවනා සිත්තරාවිය
දනන් තුඩ තුඩ නිතර රැව්දෙන
ගේය පදයේ අයිතිකාරිය

බිඳෙන් බිඳ සඳ එළිය
පතුරන අහස් තලයේ
තමන්ගේ රැස් මහිම බිඳ බිඳ
ගිලිහෙනා බව දැන දැනත්
නිහඬවම රඟ දෙන රුවැත්තිය
සදා නොවෙනස් තාරකාවිය

පුර පොහෝදා අහස් තලයේ
සඳ කුමරු අබිසෙස් ලබද්දී
එකත්පසෙකව සතුටු සිතකින්
විසුරවයි ඇය සිනහ මල්
හද පත්ලෙ නැගි සෙනෙහසින්

සඳට පෙම් බැඳි මුත් අහස් කුස
කෙලෙස පුර සඳ සැමදා දිලෙන්නේ
යා යුතුය හැර අහස් රඟබිම
එයයි ලෝ දම සදා නොවෙනස්

සදා ලෙන්ගතු තාරකාවිය
අහස් ගැබ සනසවයි මෙලෙසින්
ගියත් තනිකර ඔබව අද සඳ
ගියේ ගොස් යළි එන්නමයි
යන්න කළියෙන් පැවසුවේ මට

නැවත නොවැරද එන බවයි
එන තුරා සඳ කුමරු නැවතත්
පුදමි මගේ රැස් දහර ඔබ වෙත
දිවිතුරා නැහැ යන්නෙ හැරදා
ඒ මගේ කඩනොවන වදනයි

Image Courtesy : https://bit.ly/3aKXk1X

Tagged : / / /