ගම්බද රුවැත්තිය යන ලැසි ගමන බලා
පෙම්බර මුවැත්තිය යැයි නො කියම කෝමා
රූබර සිඟිත්තිය සබකෝලය පානා
පින්කර සිතැත්තිය ගමකට හරි අගනා

ගිරා නිලට දිලෙනා දිගු කේශ කලාපේ
ගසා කුසුම් දම් පතුරා සුවඳ දස අතේ
කුංකුම කුසුම් පිනි දිය ඉස සතර දිගන්තේ
ගම්බද රුවැත්තිය එන විට ගෙනෙයි වසන්තේ

රත් පැහැ ගිනි අව්වේ මිදුලේ ඇවිදින්නේ
වන්නමකට ලෙසින් බුහුටි දෙපා තබන්නේ
ඉමක් කොනක් නැති අහසේ තරුත් ගනින්නේ
පැතුම් මලක් මුව රන්දා සිනහ සලන්නේ

වලාකුළක පැටලී සඳ කොහේ ගියාදෝ
මලේ සුවඳ අරගෙන අද ගියදෝ
බවුන් වඩන්නට වනයට ගියදෝ
ගම්බද රුවැත්තිය අද කොහේ ගියදෝ

සඳ පිනි දිය ගැල්වුණු සිත පහන් වෙමින්
දිරනා කුණු කය ගැන කලකිරී ගිහින්
පෙර දා නො දුටු සිල්වත්කම සිතින් දරන්
ගම්බද රුවැත්තිය අද සිල් ගන්න ගිහින්

Image courtesy : https://goo.gl/KvHZXN