සිව් වසරකට වරක් පවත්වනු ලබන ලෝක තරුණ සමුළුව 2014 වසරේදි එනම් මේ වසරේදි ශ්‍රි ලංකාවේදී පැවැත්වීමට දැනටමත් යෞවන කටයුතු හා නිපුණතා සංවර්ධන අමාත්‍යංශය සියළු කටයුතු සංවිධානය කර තිබේ. 2010 වසරේදි මෙක්සිකෝවේදී පැවැත්වුනු ලෝක සමුළුව මෙවර ලංකාවේදී පැවැත්වීමට ලැබීම ලක්වාසි අප සැමගේ වාසනාවක් වෙන්ම ලොව අන් රටවල් වල විශේෂ අවධානයට යොමු වීමටද හේතු වන කරුණක් වේ. එය කුඩා රාජ්‍යක් වශයෙන් අප සැම ආඩම්බර විය යුතු මෙන්ම විය හැකි සිදුවීමක් වේ. මෙවර සමුළුව මැයි මස 06 වැනිදා සිට 10 වැනිදා දක්වා ප්‍රධාන වශයෙන් කොළඹ(බණ්ඩාරණායක අනුස්මරණ ජාත්‍යන්තර සම්මන්ත්‍රණ ශාලවේදී- BMICH) දීද හම්බන්තොටදී ද පැවැත්වීමට කටයුතු සූදානම් කර තිබේ. ලෝක සමුළුවේ නිළ තේමා ලකුණ ( Official LOGO ) තුළ පෙති සතකින් යුතු නෙළුම් මළක් නියෝජනය වන අතර එම නෙළුම් මලෙන් ශ්‍රී ලංකාවේ පවිත්‍රත්වයද පෙති සතෙන් මහාද්වීප සත ද නියෝජනය කරනු ලබයි.

මෙවර සමුළුවේ ප්‍රධානම තේමාව වන්නේ 2015න් ඔබ්බට සංවර්ධනය සඳහා තරුණ ජවය බලගැන්වීමයි . ලෝකයේ අනාගතය නියෝජනය කරන ජගත් තරුණ ප්‍රජාව එකම වේදිකාවක මුණගැසෙන 1500කට අධික දෙස් විදෙස් පිරිසකගේ සහභාගීත්වයෙන් පැවැත්වෙන මෙයට අවුරුදු 18-29 ත් අතර විවිධ රටවල තරුණ නියෝජිතයන් සහභාගී වීමට නියමිතය. මේ සඳහා ශ්‍රී ලංකා රජය සියළු අනුග්‍රහයන් දක්වනු ලබයි. සමුළුවේ ප්‍රධාන අරමුණ වන්නේ මෙසේ ඒකරාශී වන තරුණ නියෝජිතයන් හා ඒ නියෝජනය කරනු ලබන රටවල් අතර ඒකාබද්ධ ප්‍රතිඵල ලේඛනයක් වන “කොළඹ ප‍්‍රකාශනය” (“Colombo Action Plan”) එළි දැක්වීමයි. සමුළුව අවසානයේ සියළු නියෝජිතයින්ගේ අදහස් හා යෝජනා අනුව මේ ලියවිල්ල සකස් වීමට නියමිතය. ප්‍රතිපත්ති නිර්මාණයේදී තරුණ ජවයට මූලිකත්වයක් ලබා දිය යුතු ආකාරය එම ප්‍රකාශණය තුලින් ඔප්නැංවීමට බලාපොරොත්තු වේ.

2014 ලෝක තරුණ සමුළුවේදී ප්‍රධාන වශයෙන් තේමාවන් 07ක් හා පදනම් 07ක් සාකච්ඡාවට භාජනය කෙරේ. එම පදනම් (foundations) හා තේමාවන් (themes) මෙසේය.

පදනම් (foundations) 

• යහ පාලනය හා වගකිව යුතු බව –  Achieving Good Governance & Accountability.
• සෑම මට්ටමකටම තරුණ සහභාගීත්වය – Inclusive Youth Participation at All Levels.
• තරුණ අයිතිවාසිකම් – Youth Rights
• ගෝලීයකරණය – Globalization/Inclusive Youth-Led Development (MOI).
• අසමානත්වය අවසන් කිරීම – Ending Systemic Inequalities.
• ලිංගික සමානාත්මතාවය – Gender Equality.
• පූර්ව යෞවනත්ව බලගැන්වීම – Empowering Marginalized Youth Including Most at Risk Young People

තේමාවන් (themes)

• ගුණාත්මක අධ්‍යාපනයට සම ප්‍රවේශය  – Realizing equal access to quality Education.
• සේවා නියුක්තිය හා ව්‍යවසායකත්වය – Full Employment and Entrepreneurship.
• දරිද්‍රතාවය අවසන් කිරීම හා ආහාර සුරක්ෂිතතාවය – Poverty Eradication and Food Security.
• නිරෝගීභාවය ඔප් නැංවීම හා සෞඛ්‍ය සඳහා ප්‍රවේශය – Promoting Healthy Lives and Access to Health
• පරිසර සුරක්ෂිතතාවය, හදිසි අවස්ථා සඳහා පූර්ව සූදානම, තරුණ කේන්ද්‍ර නාගරීකරණය – Environmental Protection, Emergency Preparedness and Youth Centered Urbanization
• සාමය සාක්ෂාත්කර ගැනීම, සමඟි බව ඇති කිරීම හා ප්‍රචණ්ඩත්වය අවසන් කිරීම – Realizing peace, reconciliation and ending violence.
• ක්‍රීඩා හා විනෝදාස්වාද සහතික කිරීම – Ensuring inclusive recreation, sports and cultures

අවසන් වශයෙන් සාරංශ කර විට තරුණ සහභාගීත්වය සහස්‍ර සංවර්ධන ඉලක්ක කරා දායක කර ගන්නා ආකරය ඇතුළු ඉහත කී තේමාවන් ඔස්සේ විවිධ රටවල තරුණ නියෝජිතවරුන්ගේ අදහස්, යෝජනා හා චෝදනා  සාකච්ඡාවට බඳුන් කිරීම මෙම සමුළුවේ අභිප්‍රාය වේ. එහිදී විද්‍යාව හා තාක්ෂණවේදය මෙරට දියුණු කිරීමද සාකච්ඡාවට බඳුන් වනු ඇතැයි අප බලාපොරොත්තු වෙමු.

Sources:

http://wcy2014.com/, http://www.lakbima.lk, http://www.ceylontoday.lk

Image Sources:

http://wcy2014.com, https://www.facebook.com/wcy2014