අවුරුද්දත් එහෙනම් ඔන්න ගෙවිලා ගියා .රතුපාටින් වැහිල තිබුණු එරබදු ගස් ආපහු පාට මාරු කරල කොල පාටට සංක්‍රමණය වෙද්දි කොලඹ නගරෙ සමහර තැන් නම් රතුපාට උනේ මැයි දිනේ නිසාවෙන්. සැරින් සැරේ කොළඹ හතෙනුත් ඇසුනු කොහාගෙ හඩත් හෙමීට වියැකිල යද්දි තවත් සුවිශේෂී මාසයක උදාව ලබනව. ඒ වෙසක් මාසය.
මුලු මහත් ලංකාවම වගේ වෙසක් උලෙලට සූදානම් වෙද්දි කොළඹ් විශ්ව විද්‍යාලෙ විද්‍යා පීඨයේ අපිත් ලහිලහියෙ ඒ පින්වත් දිනය වෙනුවෙන් සූදානම් වෙනවා. අවුරුද්ද කිව්වම බාල මහලු හැමෝගෙම සිත්වලට නැගෙන දේවල් ටිකක් තියෙනවනෙ.ඒ වගේම වෙසක් පුන් පොහෝ දිනය කිව්වමත් පන්සල , බෝමළුව , වෙසක් කූඩු , තොරන් , දන්සැල් වගේ දේවල් සිත් වලට නැගෙනවනේ.
අපි හැමෝම පොඩ්ඩො කාලෙ අම්ම තාත්තගෙ අතේ එල්ලිල වෙසක් බලන්න යද්දි හරිම ආසාවෙන් බලපු නිර්මාණයක්නෙ වෙසක් කූඩුව කියන්නෙ. ඒ දවස් වල වෙසක් කූඩු ගනන් කරන්නත් අපි අමතක කලේ නෑ. හැබැයි මේ පාර ඔය වැඩේ කරන්න ගියොත් නම් කැම්පස් එක අසල ඉන්න පොඩ්ඩො වැටෙන්නෙ අලි අමාරුවක. ඇයි අප්පා ආරංචි විදියට නම් දැනටත් කූඩු ගණන 200 පැනල.ඒක නම් කමක් නෑ කියමුකො, ලගපාත උණගහක් , හාඩ්වෙයාර් එකක් බකට් කම්බියක් හොයනව කියන්නෙත් කලුනික හොයනව වගේම අසීරු කටයුත්තක් වෙලා, අපේ අය අරන් ඇවිල්ලම.
අටපට්ටම් කූඩුවක් හදනව කියන්නෙ කලාවක්. ඒත් බලාගෙන යද්දි අපේ සේරම අටපට්ටම් ඔස්කාර්ල. ඒ කොහොම වුනත් සියල්ලන්ම එකා වගේ එකතුවෙලා මේ වෙනුවෙන් තමන්ගෙ විවේක කාලයන් කැපකරපු එක ඇත්තටම අගය කල යුතුදෙයක්.
මෙහෙම හැමෝම එකාවන්ව වෙසක් මංගල්‍යයට සූදානම් වෙද්දි කැම්පස් එක හමායන සුලගත් එක්කම අපේම ඇත්තො භක්ති ගීත පුහුණු වෙන හඩ ඇසෙනව …..
බුද්ධානු භාවේන සිත් නෙත් පහන්වී
මෙත් මල් පිපීලා මුදිතා ජලාශේ
නන්වා ලොව්තුරා රශ්මි මාලා
හෙළ දෙරණ ජන ජයතු ජයමංගලානි ….
