වාර්ෂික පැළ අලෙවිය 2016, ශාක විද්‍යා සංගමය

Share

ගහ කොළ පණ නල මෙන් සුරකින දන නැත කිසි දින ලොව වියැකෙන්නේ…

සොබාදහමේ අපුර්වත්වය මොනවට විදහාපාමින් සුළගට තාලෙට ලෙළදෙන මේ හරිත වර්ණ ජීවීන් මුළුමහත් ලෝකයක දෛවය තමන් මත දරාසිටීම සැබවින් ම විශ්මයාකාර ය. මේ හරිත වර්ණයෙන් වර්ණවත් වූ නන් විධ ජීවීන්ගේ සැබෑ වටිනාකම හදවතින් ම වටහාගත් පිරිසක් කොළඹ විශ්වවිද්‍යාලයීය විද්‍යා පීඨය තුළ නිහඩ ව ම තම කාර්යභාරය ඉටුකරමින් සිටියි. ඒ විද්‍යා පීඨ ශාක විද්‍යා සංගමය යි (BOTSOC). දිවයිනේ පැරණි ම විද්‍යා පීඨයේ තවත් පැරණි සංගමයක් වන ශාක විද්‍යා සංගමයේ සහෘදයන් විසින් වසරක් පාසා සංවිධානය කරනු ලබන නොයෙක් සමාජ සත්කාරයන් අතරින් එකක් වන වාර්ෂික පැළ අලෙවිය පසුගිය 24 වන දින කොළඹ විශ්වවිද්‍යාලයීය පරිපාලන පරිශ්‍රයේ දී (College House Premises) සාර්ථක අයුරින් පැවැත්වුණි. ගුණාත්මකභාවයෙන් යුත් විවිධ වර්ගයේ වටිනා පැළ රාශියක් එහි දක්නට තිබූ අතර එය සමාජ සත්කාරයක් බවට පත්වන්නේ පුර්ණ දැනුවත්කිරීමක් සහිත ව ඉතා අඩු මිළකට එම පැළ පාරිභෝගිකයන් හට මිළදී ගතහැකි වීම යි. මල් පැළ, දුර්ලභ බෙහෙත් පැළෑටි, බද්ධ පළතුරු පැළ, ගෙවතු අලංකරන පැළෑටි ආදී සියලු ම වර්ගයේ සුලබ දුර්ලභ ශාක අලෙවිය සඳහා ඇතුලත්කර තිබීම විශේෂත්වයක් විය.

 

මේ දිනවල පවතින දැඩි උණුසුම නිසා ම දෝ පාරිභෝගිකයන් අතර පැළ මිලදීගැනීමේ පැහැදිලි උද්‍යෝගයක් දක්නට ලැබුණි. දිනය පුරාවට ශාක විද්‍යා සාමාජිකයින් ලබාදුන් සුහදශීලී කඩිනම් සේවය බොහෝදෙනාගේ නොමද ඇගැයීමට ලක්වූ අතර එය පැළ අලෙවිය සාර්ථක කරගැනීමෙහි ලා බෙහෙවින් ඉවහල් වූ බව ශාක විද්‍යා සංගමයේ සභාපතිතුමාගේ අදහස විය. හකුරු සමගින් උණුසුම් බෙලිමල් වීදුරුවක රස බැලීමට ද පැළ අලෙවි පරිශ්‍රයට පැමිණෙන්නන් හට ශාක විද්‍යා සංගමය මගින් අවස්ථාව සලසා තිබුණි.

 

6

7

8

මේ සියල්ල පිටුපස නිබද අනුශාසනයෙන් සංගමය දිරිමත් කරන්නේ සංගමයේ ගරු ජ්‍යෙෂ්ඨ භාණ්ඩාගාරික ආචාර්ය ඉරෝජා කල්දේරා ආචාර්යවරිය යි. මෙලෙසින් සාර්ථක අයුරින් සංවිධානය කර නිමාවට පත් වූ 2016 වාර්ෂික පැළ අලෙවිය සදහා නන් අයුරින් සහයෝගය දැක් වූ, පැළ මිලදීගත් සියලු ම දෙනාට කොළඹ විශ්වවිද්‍යාලයීය ශාක විද්‍යා සංගමය තම හෘද්‍යාංගම ස්තූතිය පළකර සිටියි. තමන් ආදරයෙන් රැකබලාගත් පැළෑටි වලට සෙනෙහස පිරි නවාතැනක් ලැබෙනු ඇති බව ශාක විද්‍යා සහෘදයින්ගේ අපේක්ෂාව යි.

12

 
Tagged : / / /