කොළඹ විශ්වවිද්‍යාලයේ විද්‍යා පීඨයේ කර්මාන්ත සංඛ්‍යානය හා ගණිත මූල්‍ය උපාධි පාඨමාලාව හදාරන සිසුන්ගේ SAIFA සංගමය මේ දිනවල විශේෂ වැඩකටයුත්තකට සූදානම් වෙනවා. මෙම විශේෂ වැඩකටයුත්ත සංවිධානය වන අතරතුර එහි මූලිකත්වය ගෙන කටයුතු කරන SAIFAහි වත්මන් සභාපති විබෝධ පෙරේරා සොයුරා සහ උප සභාපති චන්දික යාපා සොයුරා අපට මුණ ගැසුනා.
- මුලින් ම කියන්නකෝ මොකක්ද මේ SAIFA කියන්නේ?
ඔව්. SAIFA කියන්නෙ, Students Association For industrial and Financial Analysis කියන එක. ඇත්තට ම මේ සංගමය තමා කර්මාන්ත සංඛ්‍යානය හා ගණිත මූල්‍ය උපාධි පාඨමාලාව හදාරණ සිසුන්ටම විශේෂ වූ සංගමය. මේ සංගමය මීට අවුරුදු 3 කට විතර කලින් තමා ආරම්භ කලේ.
- මේ දවස්වල සංවිධානය වෙන විශේෂ වැඩකටයුත්ත ගැන කථා කලොත්
අපි මෙය නම් කරලා තියෙන්නෙ SAIFA Soiree 2016 නමින්. මේක මුල්ම වරට තමයි සංවිධානය වෙන්නෙ. මෙවැනි දෙයක් සංවිධානය කිරීමෙන් අපි මූලිකව ම බලාපොරොත්තු වෙන්නෙ, කර්මාන්ත සංඛ්‍යානය හා ගණිත මූල්‍ය උපාධි පාඨමාලාව හැදෑරූ ආදි විද්‍යාර්ථයන් හා දැනට මේ උපාධි පාඨමාලාව හදරන සිසුන් අතර සුහද හමුවක් පැවැත්වීම. එසේ ම කර්මාන්ත සංඛ්‍යානය හා ගණිත මූල්‍ය උපාධි පාඨමාලාව හදුන්වා දී මෙම වසරට අවුරුදු 10ක් සපිරෙනවා. ඒ වගේම SAIFA පිලිබද ව ආදි විද්‍යාර්ථයන් දැනුවත් කිරීමත් මෙහි තවත් එක් අරමුණක් වෙනවා.
- කවද ද,කොහෙ ද, කීයට ද මේ සුහද හමුව පැවැත්වෙන්නෙ?
පෙබරවාරි මාසේ 21 වෙනිදා, ඉරිදා දවසෙ සවස 2.00 ඉදල රෑ 9.00 වන තෙක් කොළඹ විශ්වවිද්‍යාලයේ ක්‍රීඩා පිටියේ පැවැත්වෙනවා.
- මේ සදහා කොළඹ විශ්වවිද්‍යාලය ම තෝරගන්න හේතුවක් තිබුණ නේද?
ඇත්තෙන්ම ඔව්. උපාධිය ලබාගෙන විශ්වවිද්‍යාලයෙන් පිට වී ගියාට පස්සෙ වසර ගනනාවකින් අයෙත් විශ්වවිද්‍යාලයට එන්න බැරි වුන බොහෝ දෙනෙක් ඉන්නවා. ඉතින් ඒ අයට මේක හොද අවස්ථාවක් වේවි ඔවුන්ගේ පරණ මිතුරන් විශ්වවිද්‍යාලය තුළදීම නැවත හමුවන්නට.
- අවසාන වශයෙන් මොනව ද කියන්න තියෙන්නෙ?
මේක නිකන් ම නිකන් සුහද හමුවක් නම් නෙවෙයි. එදාට සැම දෙනාට ම විනෝද වෙන්න පුලුවන් විනෝද ක්‍රීඩා රැසක් සූදානම් කරල තියනවා. ඒ වගේම හවසට කොත්තු පාටියත් එක්ක DJ එකකුත් සංවිධානය කරලා තියෙනවා. අවසාන වශයෙන්, ඔබත් කොළඹ විශ්වවිද්‍යාලයේ විද්‍යා පීඨයේ කර්මාන්ත සංඛ්‍යානය හා ගණිත මූල්‍ය උපාධි පාඨමාලාව හැදෑරූ හෝ දැනට හදාරන අයෙක් නම්, 21 වෙනිදා විශ්වවිද්‍යාලයට ඇවිත් වෙනස් ම ආකාරයේ අත්දැකීමක් ලබා ගන්නා ලෙසට ආරාධනා කර සිටිනවා.