මහ පොළොව ඉරි තලන
කාෂ්ටක ඉඩෝරෙක
සීත පිණි පොද වැස්සෙ
පපුතුරට ළං වෙමු ද
ගිනි ගහන කතරකට
අවාරෙක ඇද වැටෙන
හිම තුහින මල් වැස්සෙ
සඳට කවි මුමුණමු ද
මූකලන් වනයක
වනස්පති ඇස් වසා
කණාමැදිරි එළි බලන්
හෙමින් ඇවිදන් යමු ද
වළාකුළු වල ලියූ
හිරු සඳුගෙ පෙම් පුවත
විසල් නිල් අහස යට
ඉතින් අපි අහගමු ද
මීදුමෙන් නැහැවිච්ච
උදා අරුණළු මැදින්
පිණි බිංදු ඇහිඳින්න
දෙ අත් පටලා ගමු ද
හිරු සයුර සිපගන්න
නුරාගී සැඳෑවක
සුසිඳු වෙරළතට වී
හද ගැස්ම සනහමු ද
Image Courtesy : https://bit.ly/46zz28p