මරුවා සමඟ සටනකි මර බිය මැද්දේ
දෙසවන් පුරා හදවතෙ වළපින සද්දේ
පණ නල රකින්නට වරමකි අප ලද්දේ
මරණය පමා කරලන්නයි මේ යුද්දේ
කඳුලැලි වලින් වියැකුණු නෙතු සිහිවෙනවා
කෙඳිරිලි සුසුම් අපෙ පපුවත් රිදවනවා
සැඟවුණු හදේ නව පැතුමන් පිබිදෙනවා
සිතේ පහන් දල්වා අපි වෙහෙසෙනවා
හදවත් යොමා පිහිටා එක අරමුණෙක
මනුසත් පෙමින් හිඳුවා ඔබ පෙරමුණෙක
ගුණවත් සෙනේ රඳවා අපෙ උණුහුමෙක
දෛවය වෙනස් කරනා මහ සැරසුමෙක
හදවත පියකරුයි මෙත්කුළු දහමින් නේ
මුනිවත රකින්නට නම් නොව අපි ඉන්නේ
ඇඳිවත ළයේ ගෞරවයෙනි පවසන්නේ
මනුසත කෙරේ ජීවකවරු අපි වන්නේ
Image Courtesy : https://bit.ly/2Y1O1oP