ඉඩෝරය ඉවරවෙලා වැස්ස වහින්න පටන් ගත්තා විතරයි, පරිසරයෙ තියෙන්නෙ පුදුමාකාර සුන්දරත්වයක්. වේලිලා ඉරිතලලා ගිය මහපොළව කොළ හැලිලා ඉපල් විතරක් ඉතුරු වුණු රූස්ස ගස් ආපහු දළු දාලා ප්‍රබෝධමත් වෙලා තියෙන්නෙ හරියට ඉඩෝරයක් තිබ්බෙ නෑ වගේ. සොබාදහම කොයිතරම් අපූරුද, කොයිතරම් සුන්දරද. ජීවිතේට කොතරම් පාඩම් කියලා දෙනවද.
ඉඩෝරය කාලයට මුළු පරිසරයම ලොකු දුෂ්කරක්‍රියාවක් කරනවා. එත් වසන්තය ආවට පස්සෙ ඉඩෝරයක් තිබ්බද කියලවත් මතක නෑ. දිය හිඳිලා ඉරිතලලා ගිය ඇල වේලි, ජලය පිටාර ගලන්න තරම් සශ්‍රීක වෙනවා. ඉපල් වෙලා තිබ්බ ගස්, දළු දලා මල් පිපිලා ඵලබර වෙන්නෙ ජීවිතේට තවත් අවස්ථාවක් තියෙනවා කියන්න වගේ. සොබාදහමත් අපේ ජීවිතේට ගොඩක් පාඩම් කියලදෙනවා. දුෂ්කරකාල ජීවිතයට එනවා. ඒත් ඔබ එතනින් නැවතිය යුතු නෑ. දුර්භික්ෂය එන්න එන්නම දරුණු වේවි. නමුත් ඔබ එතනින් නැවතිය යුතු නෑ. මොකද දිනක ඉඩෝරය ඉවර වෙලා වස්සානය උදා වෙවි. වසන්තය උදා වෙවි. අර දුර්භික්ෂ කාලයන් අවසන් වෙවි. ඒ විඳි දුක් ගැහැටවලටම සමාන වෙන්න සතුට ඔබට ලැබේවි. හරියට ඉපල් පිරුණු ගහ දළු දලා මල්බර වෙනවා වගේ.
දළු දාලා ගස් වල කොළ හැදුණට පස්සෙ ඒ ගහ ගොඩක් ශක්තිමත් වෙනවා. පුංචි පුංචි මල් පොහොට්ටු හැදිලා මල් පිපිලා ඵලබර වෙනකොට ඒ ගහ පරිපූර්ණ වෙනවා.
ඒත් අපි හැමවෙලේම මතක තියා ගන්න ඕන දෙයක් තියෙනවා. අද ගහක් හිටවලා හෙට ගෙඩියක් ගන්න බෑ කියන එක. හැමදේටම කාලයක් තියෙනවා. හැමදේටම කාලයක් අවශ්‍ය වෙනවා. ඔබේ කාල රාමුව මගේ කාල රාමුව නොවෙන්න පුළුවන්. මා නවතින තැන ඔබේ ආරම්භය වෙන්න පුළුවන්. ඒ නිසා කිසිම කෙනෙක් එක්ක ඔබව සංසන්දනය කරන්න එපා. මොකද? ඔබේ කාල රාමුවයි ඔවුන්ගේ කාල රාමුවයි වෙනස් නිසා. ජනපති බැරක් ඔබාමා විශ්‍රාම ගත්තෙ අවුරුදු 55 දී, නමුත් ජනපති ඩොනල්ඩ් ට්‍රම්ප් ඔහුගේ ගමන පටන් ගත්තෙ අවුරුදු 70 දි. ඉතිං ඔබ තවමත් ප්‍රමාද නෑ. ඔබේ ජීවිතයටත් දුර්භික්ෂයන් ඒවි, නමුත් සැලෙන්න එපා. මොකද වස්සානය එනවා සත්තයි.
Image Courtesy :
http://kb4images.com/images/rainy-day-images/36813331-rainy-day-images.jpg
