Dia කන්නඩ චිත්‍රපටය මේ අවුරුද්දෙ මට බලන්න ලැබුණ ආදරය ගැන සංවේදීම කතාවක් කිව්වොත් මා නිවැරදියි. කේ.එස්.අශෝක මහතාගේ මෙම සොඳුරු නිර්මාණය ඔහුගේම අධ්‍යක්ෂණයෙන්ම රූගත විය. ඒක ආදරය ගැන අලුත්ම පාඩමක් මට කියල දුන්නා වගේ. ඇත්තටම මම බලාපොරොත්තු නොවුණ අවසානයක් ඒ ඩියාගෙ ආදර කතාවෙ ලියවිලා තිබුණා. මට හිතුණා ඒක නෙවෙයි අවසානය කියලා.ඒත් ඒ ආදර කතාව ඇතුළෙ අපි පිළිගන්න අකැමති යථාර්ථයක් තිබුණා විය හැකියි.
රෝහිත්, ඩියාගෙ ක්‍රෂ් එක වගේම ඩියා, රෝහිත්ගෙ ක්‍රෂ් එක කියල හිතෙන්නෙවත් නැති වෙලාවල් තිබුණා. ඒත් ඒ දෙන්නගෙ ආදර කතාව පටන්ගත්තම හැමදේම හොඳින් වෙද්දි නොහිතපු අනතුරකින් ඒ දෙන්නා ඈත් වුණා. ඒත් ආයෙත් රෝහිත් ආවා වැරදි වෙලාවක ඩියාව හොයාගෙන. ඇත්තටම ඒක රෝහිත්ගෙ හෝ ඩියාගෙ වරදක් නෙවෙයි කියල මට හිතෙන්නෙ. ආදරය අපි හිතන විදියටම ඇති වෙන්නෙ, නැති වෙන්නෙ නෑ වගේම අපි හිතන කෙනෙක් ළඟම ගිහින් නතර වෙන්නෙත් නෑ. ආදරයෙ භාෂාවන් ගැන ස්වරූප ගැන ලස්සන චිත්‍රයක් මවනවා වගේ මේ චිත්‍රපටිය. ඉතින් මම සම්පූර්ණ කතාවම මේ ලිපියෙ ලියන්න කැමති නෑ. ඒක මම ඩියා නොබලපු අයට කරන අසාධාරණයක්. ඉතින් රෝහිත් සහ ඩියාගෙ ළඟම ඉන්න අනිත් තරුණයගේ කතාව ඔබම සොයාගන්න.
ඩියා ඔබ බලාපොරොත්තු වන කතාවම නොවිය හැකියි. ඩියාට අනුව ආදරය ඔබ හිතන තරම් සුන්දර නොවූත්, අසුන්දර නොවූත් යථාර්ථයක් විය හැකියි. ඔබ චිත්‍රපටය අවසානයේ කුමක් සිතුවා ද මා හට සිතුණේ නම් ඩියා ආදරය සෙවීම නතර නොකළ බවත් ඇයගේ ජීවිතය රේල් පාර ළඟ නොරැඳී ඉදිරියටම ගිය බවයි.
“ආදරේ නම් පුදුමාකාර හැඟීමකි
අනෙක් හැඟීම් තුළට රිංගන්නට ආදරයට හැකිය
ආදරණීය බැඳීම් වල
කේන්තිය, වේදනාව, සතුට තුළ ආදරය ඇත
ආදරය හැඟීම් වල එකතුවක් නොව
හැඟීම් තුළ ජීවත් විය හැකි හැඟීමකි
ආදරය අපි හිතින් මවනා තරම්
සුන්දර ද නැත අසුන්දර ද නැත
ආදරය විවිධ ස්වරූප ගෙන
ආදරයට ආමන්ත්‍රණය කරයි
හිනාව, කදුළු, නිහඬ බව
ආදරයේ භාෂාවන්ය
ආදරයේ නිර්මාණයක් වීමට
සැමට නොහැකිය
නමුත් ආදරයෙන් නිමවෙන්නට
සියල්ලෝටම හැකිය
ආදරයට මැසිවිලි නගන්නට පෙර
ආදරය හඳුනන්නෙකු වන්න
ආදරය සැඟව ඇත්තේ වචන වල නොව
ඔබ නොදුටු සිහින තුළ විය හැකිය”
ඩියා වෙනුවෙන් ආදරයෙන් ❤
Image Courtesy : https://bit.ly/2WCxby0