නොමැත ‍සෙවනක් හිසට අද මට

වැටෙන වැහි බිඳු සීතලයි

සිසිල නිවනට කහට උගුරක්

බොන්න ඇති නම් මට සිතෙයි

පුතුනි ඔබ අද රජෙකි ලොව තුළ

නමුදු අද මා හුදෙකලයි

පුංචි දෝණිගෙ සිනහ සිහි‍වෙයි

පපුවෙ ගින්දර දෙගුණ වෙයි

කුසට අහරක් නොමැත මා හට

නමුදු එය ඉවසිය හැකි

දැනෙන පාළුව නුඹ නැතිව මට

දරා ගන්නට නොම හැකි

අත ද පය දැන් වාරු නෑ මගෙ

තනිව එන්නට නොම හැකි

ඔබට හැකි නම් රැගෙන යන්නට

නැවත මා හට එනු හැකි

හමන සුළඟට කියන දුක මගෙ

ඇසුණෙ නැතුවැති නුඹට නම්

හිතට දුක නැහැ එක් වරක් හරි

ඔබෙ මුහුණ දැක ගත්තා නම්

පුතුනි ඔබ මගෙ දිවිය සැම දා

ඔබට එය වැටහුණා නම්

ඔබට සෙනෙහස මියෙන තුරු

එලෙසට ම ඇත මගෙ සිතෙහි නම්

Written By: Achini Liyanage

Image Link: https://bit.ly/2JIEsZz