මන්දාරම් නුවර, මේ නම ඔබ කොහේ හෝ අසා ඇති බොහෝ විට. කියවන පමණින් ම මේ නම හා බැඳුනු ස්ථානය අනිවාර්‍යෙන් ම සිත් ඇදගන්නා සුළු තැනක් බව ඔබට සිතෙනවා ඇති බවට නො අනුමානයි. ඉදින් මේ සූදානම ශ්‍රී ලංකාවේ මධ්‍යම කඳුකරයේ පිහිටා ඇති සුන්දර පරිසරයකට උරුමකම් කියන වසරේ බොහෝ කාලයක් මීදුමෙන් වැසී පවතින අනගිභවනීය පරිසරයකට ඔබ කැදවාගෙන යාමට යි.
මිස්ටි සිටි යන අන්වර්ථ නාමයෙන් ද සංචාරකයන් අතර ජනප්‍රිය මෙම ස්ථානයේ මනරම් දිය ඇල්ලක් වූ කොලපතන දිය ඇල්ල ද දැකගත හැකි ය. එමෙන්ම ලංකාවේ උසම කඳු මුදුන වන පිදුරුතලාගල පාමුල මෙම සුන්දර ගම්මානය පිහිටා ඇත. ඔබ කොළඹ සිට ගමන් කරන්නේ නම් කොළඹ-නුවර ප්‍රධාන මාර්ගයේ ගමන් කර පදියපැලැල්ලෙන් හැරී ගමන් කිරීමෙන් මෙම ස්ථානයට පහසුවෙන් ගමන් කළ හැකි ය.
මේ සුන්දර ගමනේ ආරම්භය සනිටුහන් වූයේ පෙරදින අප නවාතැන් ගත් කෑගල්ල ප්‍රදේශයේ සිට ය. පෙර සූදානම් කරගත් වෑන් රථයේ නැගුණු අප හිමිදිරි උදයේ ම පිටත් වූයේ දහවල් වීමට ප්‍රථමයෙන් මන්දාරම් නුවරට ළඟාවන අටියෙනි. කඩුගන්නාව බිංගෙය හරහා වැටී තිබූ අපගේ ගමන් මාර්ගය දෙපස පරිසරය උදෑසන හිරු කිරණත් සමග මනරම් අන්දමින් දිස්වූයේ ගමනේ ආරම්භයේ පටන්ම ආස්වාදයක් ගෙන දෙමිනි. අවට පරිසරයේ සිරි නරඹමින් කෙමෙන් නුවරට ළඟා වූ පසු අපගේ ගමන් මග වැටී තිබුණේ වැව රවුම වටා ය. අනෙක් පසින් මනරම්ව දිස්වන දළඳා මාලිගාවේ දර්ශනය මෙන්ම එම පරිසරයේ චමත්කාරජනක බව විඳගනිමින් ගමන් ගත් අපි වැව රවුම පසු කරමින් ගමන් කළෙමු. මන්දාරම් නුවර දක්වා වැටී තිබුණු මගෙහි එක් ස්ථානයක වාහනය නතර කළ අප උදෑසන ආහාරය යුහුසුළුව ලබා ගත්තේ ගමන නැවතත් ඉක්මනින් ආරම්භ කිරීමේ බලාපොරොත්තුවෙනි.
කෙමෙන් මන්දාරම් නුවරට සේන්දු වෙමින් සිටි අප හට පරිසරයේ වෙනස්කම මෙන්ම සුන්දරත්වය ද දැක ගැන්මට හැකියාව ලැබුණි. ගම්මානයන් මැදින් වැටී තිබූ මාර්ගය ගෙවා දමමින් අප මන්දාරම් නුවර ගම්මානය කරා සේන්දු වූයෙමු. කදුවැටි අතරින් වැටී තිබූ මෙම මාර්ගය සැබවින්ම සුන්දර පරිසරයකට උරුමකම් කියයි. එමෙන්ම දෙපස ඇති වගා භූමි තුළ විවිධ වර්ගයේ එළවලු බෝග වගා කර ඇති අන්දම ඔබට දැකබලා ගත හැකි ය. මන්දාරම් නුවර ගම්මානය මැද පොලිස් ස්ථානය අසල වාහනය නතර කළ අපි ගම්මානය මැදින් පා ගමනින් යමින් නුදුරෙහි පැවති දිය ඇල්ල කරා යාමට පිටත් වූයෙමු. මෙහි පැමිණෙන ඔබට සාමාන්‍යයෙන් පරිසරය මිහිදුම් වලාවන්ගෙන් වැසී පවතිනු දැක බලා ගත හැකි ය.
ග්‍රාමීය පරිසරයක් හිමි මෙම ප්‍රදේශය, නිරන්තරයෙන් වැසී පවතින මීදුමෙන් මෙන්ම වටා පිහිටා ඇති කඳු පන්තිය හේතු කොට ගෙන මහත් චමත්කාරජනක බවක් නිතැතින්ම ජනිත වේ. කුඩා හා මධ්‍යම ප්‍රමාණයේ වගා භූමි පසුකරමින් ගම්මානය හරහා ගමන් කළ අප එම මාවතෙන් හැරී කුඩා දොල පහරක් හා සමාන්තරව ගමන් කළෙමු. එම දොල පහරේ ආරම්භය සාමාන්‍ය ප්‍රමාණයේ ස්වභාවික ජල පහරකි. ඉන් අපට වැටහී ගිය කරුණ නම් අප එතෙක් වෙලා සමාන්තරව ගමන් ගත් ඇල මාර්ගය මිනිසුන් විසින් ගම්මානයට ජලය ලබා ගැනීමට නිර්මාණය කරන ලද්දක් බවයි. ස්වභාවික ජල පහර ගල් අතරින් ගලා යන්නේ කුඩා ජල තටාක සාදමින්‍ ය. සිත්සේ ජල ස්නානය කිරීමට මෙම ස්ථානය කදිම ස්ථානයක් බව වැටහුනු අප ඉදිරියට ගමන් කළේ ආපසු පැමිණෙන අතරතුර එම ස්ථානයෙන් නාමු යැයි කතිකා කරගෙන ය. එමෙන්ම ඉහළ දිය ඇල්ල පිහිටි ස්ථානයෙන් දිය නෑමද තහනම් බව මෙහි සංචාරය කරන ඔබ මතක තබා ගත යුතු ය. ඉන් ඉදිරියට මද දුරක් ගමන් කරන විට ප්‍රවේශපත් කවුළුව හමු වේ. එම ස්ථානයෙන් ඉදිරියට ගමන් මළු, ආහාර පාන හෝ අමතර ඇදුම් රැගෙන යාමට ඉඩ නොදෙයි.
නැවතත් ගමන් ආරම්භ කල අප කුඩා කඳු ගැටයක් තරණය කරමින් ගමන් කර දිය ඇල්ල කරා සේන්දු වුනෙමු.
පරිසරය වසාගත් මීදුම් වලාවත් සමග කඳු අතරින් පතිත වන මනස්කාන්ත ජල ප්‍රවාහය ඇස පිනවන දසුනකි. එමෙන්ම දිය ඇල්ලෙන් එන හිරිකඩ ඇඟේ වදින විට දැනෙන ආස්වාදය විස්තර කිරීමට අපහසු ය. සැබැවින්ම එම ස්ථානය නෙත් සිත් පැහැරගන්නා මනරම් ස්ථානයකි.
මෙහි පිහිටා ඇති දිය ඇල්ලේ සුන්දරත්වය විඳිමින් මඳ වේලාවක් විවේකීව ගත කළ අප ආපසු ඒමට පිටත් වූයේ එම සුන්දරත්වය සමග එකතු කරගත් මතකයන් මෙන්ම ඡායාරූප ගොන්නක් ද සමගිනි.
නැවත ආපසු එන ගමනේ ගමන් මළු තබා ආ ස්ථානයට පැමිණි අප නැවත ඒවා රැගෙන පෙර සඳහන් කළ ඇල මාර්ගය කරා ගමන් කළේ එම ස්ථානයෙන් නා ගැනිමත් අරමුණු කරගෙන ය. යහමින් ජලය පිරී තිබූ දිය තටාකයක් තෝරාගත් අප එහි නාමින් විනෝද වූයේ පැවති සීතලද අමතක කරමිනි. සිරුර ගල් ගැහෙන තරම් සීතලක් එම ජලයේ පැවතියද කිසිවෙකු එය සැලකුවේ නැති තරම් ය.
සිත්සේ දිය නාමින් විනෝද වූ පසු ගොඩට පැමිණි අප දහවල් ආහරය ලබා ගත්තෙමු. මෙහිදී මතකයේ තබා ගත යුතු එක් කරුණක් නම් දිය නෑම සඳහා ස්ථානයක් තෝරාගැනීමේදී විශාල ගැඹුරක් පවතින වඩා පහළින් පිහිටි ස්ථාන තෝරා නොගැනීමට වග බලා ගත යුතුය. නැවත හැඳ පැලඳගත් අප නැවත පිටත් වූයේ එතෙක් වෙලා ගමනේ ආරම්භයේ පටන් අපගේ ගමන් සගයා වූ සුනඛයාට ද ආහාර ලබා දීමෙන් අනතුරුව ය.
ගම්මානය මැදින් වැටී පැවති ගමන් මාර්ගයේ ගමන් කරමින් පහළ වාහනය නවතා ඇති ස්ථානය කරා ආපසු පැමිණි අප නැවතත් වාහනයට ගොඩ වූයේ මන්දාරම් නුවර මතකයන් ගොන්නක් සිත් වල එකතු කරගෙන ය. සැබවින්ම මෙම ස්ථානය ඔබ එක් වරක් හෝ සංචාරය කල යුතුම සුන්දර අනර්ඝ ස්ථානයකි. මන්දයත් එම සුන්දරත්වය, ආස්වාදය, පරිසරය ඔබම විඳගත යුතු ය.
Image Courtesies: Author