කොළඹ සරසවියේ “Freshers” 2018 ට නවක අපි!!!

Gimshan 0 Comments

ජීවිතය යනු ඉගෙනීම ම පමණක් යන මානසිකත්වයෙන් වසර දෙක තුනක් තිස්සේ අමතර පන්ති තුළ සැරිසැරූ අප, අද සරසවිය තුළ කිසිදිනක නොවිඳි අපූරු ජීවිතයකට පය තබා ඇත. එය වචනයෙන් විස්තර කිරීමට නොහැකි තරම්ය. අභියෝග හමුවේ මදක් පසුබැස්ස අප, අද වෙනදාට වඩා නව ජවයකින්,  උවමනාවකින්, මග බලා සිටින්නේ මාර්තු මස 2 වන දින ආරම්භ වන “freshers” නැතිනම් නවකයින්ගේ ක්‍රීඩා තරගාවලියට සුබවාදී මුහුණුවරකින් තරග බිමට පිවිසීමටය.

කොළඹ විශ්වවිද්‍යාලයේ සියලුම පීඨවල නවකයින්ගේ සහභාගිත්වයෙන් ඉතා විශාල ක්‍රීඩා ඉසව් ගණනාවක් මුල් කරගනිමින් මෙය පැවැත්වීමට සියලුම කටයුතු සූදානම් වෙමින් පවතී. අප කාගෙත් ඒකායන අභිලාශය මෙහි ශුරතාවය තම පීඨය සතු කර දීමයි. මෙහි උණුසුම කෙසේද කිවහොත් එක් පුද්ගලයෙක් තරඟ ඉසව් පහකටත් වඩා සම්බන්ධ වීමට රුචිකත්වයක් දක්වා ඇත. තරග ජයග්‍රහණයට පිපාසයෙන්, ගිජුවෙන් සෑම දෙනෙක්ම වෙහෙස නොතකා මේ දිනවල පුහුණුවීම්වල නිරත වෙමින් පවතී.

“හිත ඇත්නම් පත කුඩාද” යැයි අප මුතුන් මිත්තන් කියන්නා සේම සමහරුන් තමා කිසිදිනක නොකළ ක්‍රීඩාද තම පීඨය වෙනුවෙන් කිරීම ම පැසසීමට කරුණකි. ක්‍රීඩාවේ ජය පරාජය කෙසේ වුවත් වටින්නේ සහභාගිත්වය යි. එබැවින් ක්‍රීඩාවේ ජය පරාජය සම සිතින් දරා ගැනීම අප සෑම දෙනෙකු විසින්ම කළයුත්තකි.

එසේනම් තව නොබෝ දිනකින් ආරම්භ වීමට නියමිත freshers  2018 ක්‍රීඩා තරඟය කොළඹ විශ්වවිද්‍යාලයේ සෑම පීඨයකටම ජයග්‍රාහී ක්‍රීඩා තරඟයක් වේවායි!  විද්‍යා පීඨ මාධ්‍ය ඒකකයේ අපි හදවතින්ම සුබ පතමු.

Inter Faculty Freshers’ Championship 2018 – Timetable (Updated 01.03.2018)