ලොවම අඳුරුයි ලොවම සැතපෙයි
සිහින ලෝකෙක පාවෙලා
ඒ රැයේ කඩුපුල් මලක් ඇයි
තනිව නිහඬ ව පිපීලා…
සීත පවනේ ඔබේ සුවඳට
ඇගේ සුවඳත් මුසු වෙලා
සිනිඳු සුදු මුදු පෙති අතරේ
ඇගේ දෙකොපුල් මතුවෙලා…
ලොවට රහසේ පිපී ඔබ සේ
ලොවට රහසෙම පරවෙලා
යන්න යන සේ මාත් යාවිද
ඇගේ දිවියෙන් පරවෙලා…
දෙනෝ දාහක් දෙනා මැද්දේ
හුදෙකලා වූ මා සොයා
හමා ආවා එදා ඈ මගෙ
ජීවිතේ රස පුරවලා
නොවූ සිදුහත් මා ඉදිරියේ
යශෝධරාව වී මෙදා
මා තුරුල්ලේ අද නිදයි ඈ
මගේ රාහුල පුතු දරා…
ආදරේ බැමි රැහැන් අතරේ
ජීවිතේ අද සිරවෙලා
නම නොදන්නා මිරිඟුවක්
එපිටින් සසර කෙළවර වෙනා
දියවෙලා ඒ මිරිඟුවේ
විසඳුමක් ඇත අද නොපෙනෙනා
යන්න අවැසිය යන්නෙ කෙලෙසද
ඔබ දමා මා… යශෝධරා…
මෙතේ බුදු ළඟ වන්න අගසව්
හිඳිනෙමී පෙරුමන් පුරා
එසේ නම් කප් සුවහසක් කල්
හිඳිනු වෙයි සසරම පුරා
බිඳලුවොත් අද සියලු බැමි
කෙලෙසින් හිඳින්නද ඒ තුරා
ඒ නිසා අද එන්නෙමී මා
දෙවන රාහුල පුතු සොයා…..
Written By : Navodhya Laksarani
Image Courtesy : https://bit.ly/3b3X2Vg