ඇරඹුමක් නොදන්නා බැඳීමක් මෙමට ඇත. කවදා කෙලෙස ඇති වූ මිතුදමක්දැයි නොදන්නාමුත් දැන් ඒ බැඳීම නැතිවම බැරිය… ඔහු මගේ මිතුරාය… කවුරුවත් නොදන්නා අපේ මිතුදම අවුරුදු එක හමාරක් පමණ පැරණිය. ඔහු මහ නපුරෙකි. දුෂ්ටකම නම් ඕනාවටත් වැඩිය.
ඔහුට message එකක් දැමූ විට reply එක පැය කිහිපයකට පසුය. ඇතැම් හදිසි අවස්ථාවක නම් ඔහුට message කිරීමෙන් ඵලක් නැතිය. උදව්වක් අවශ්‍යය වූ විට ඔහුගෙ අඟය බැලීම නම් දෙවියන් මාගේ ඉවසීම පරික්ෂා කිරීමකි. එතරම් ලොකු සීන් බලමින් මා නිතරම ඔහුගෙ උදව් බලාපොරොත්තු වීම නම් අරුමයකි. එහෙත් ඔහු මාගෙ හොඳම මිතුරාය.
ලෝකයෙන් සැඟවුණ අපේ මිතුදම හරිම සුන්දරය. නිතරම වගෙ ඔහුට වරද පැටවීම මාගෙ සිරිතයි. කිසිදු වරදක් නොකරම වරද පිලිගන්නා ඔහු පවසන්නේ “ඔයා කියන දෙයක් තමයි.” නිතරම වාද කර අවසානයේ මා හට ජයග්‍රහණය ලබාදී “ඔබට සතුටුයි ද දැන්” කියා අසයි. ඒ වෙලාවට මා සිතේ සියුම් දුකක්ද හටගන්නා නමුත් ජයග්‍රහණයේ සතුට පෙන්වමි.
මා මහත් වූ කරදරයක් බව ඔහු පවසයි. මා ඔහු සමඟින් තරහ වීම පිලිබඳව බොහෝ සේ සතුටු වේ. නමුත් මා ඔහු සමඟ තරහ වන බව පැවසූවත් සැබවින්ම තරහ වන්නේ නැත. හේතුව මට ඔහු සමඟ තරහ වී සිටීමට බැරිකම නොවේ. තරහ නිසා ඔහුට වැඩිපුර වද දීම මාගේ අදහසයි.
මා තරහ වූ විට නැත්නම් ඔහු කිසිඳු කරදරයකින් තොරව සිටිනු ඇත. ඉතින් මා තරහ වීමෙන් ඵලක් නැත. ඔබ ද ඔබේ මිතුරා සමඟ තරහ නොවී ඔහු සමඟින් හිඳිමින් වැඩිපුර වද දී බලන්න. ඔබගේ තරහ අඩුවන අතර මිතුදම ශක්තිමත් වේ.
ඔහු මගේ ජීවිතයෙ මා අන්තයටම වැටී සිටි අවස්ථා වල මා හට ප්‍රශ්න වලින් ගොඩ ඒමට බොහෝ උදව් උපකාර කළේය. හඬන්න අවශ්‍යය අවස්ථා වලදී පවා මගෙ මුවඟට සිනහවන් ගෙන ඒමට ඔහු සමත් විය. මා ඔහුට නිතරම දුෂ්ටයා කිය කිව්වත් ඔහු ඒ කිසිවක් ගානකටවත් නොගෙන ඔව් මම දුෂ්ටයනෙ කියා පඩුවෙ සිටී. ඔහුගේ ඉවසීම ඍණ අගයක් බව මට බොහෝ දෙනා පවසා ඇත. එහෙත් මා කියනා පිස්සු විකාර සියල්ලම ඔහු ඉවසනා හැටි නම් අපූරුය. මා ලඟවත් ඔහු සතු තරමෙ ඉවසීමක් නැත.
ඉඳ හිට ලොකු සීන් දැමුවත් ඔහුගෙ හිත හොඳය. ඔහු කොතරම් හොඳ කෙනෙක්දැයි දැනගැනීමට නම් පිටින් බලන කිසිවෙකුටත් නොහැකිය. ඔහුගේ සමීපතමයන් පමණක් ඔහු ගැන හොඳින්ම දන්නවා ඇත. මාද ඉන් කෙනෙකු වීම මා ලැබූ භාග්‍යයකි. සඳහටම ඔහු මාගේ මිතුරාය. නිතරම මා ලඟ හිඳ බොරු කියා ම සැනසුවේ නැති මිතුරා ඔහුය. කනට ගහනවා වාගේ ඇත්තම කියන ඔහු මගේ දුෂ්ටයාය. ඒ අවංකකම මම සැමදා ප්‍රිය කරන්නෙමි.
අව්‍යාජ සිනහවක් හිමි ඔහුගෙ ගීත ගායන හැකියාව ද ඉතා ඉහළ මට්ටමක පවතී. සිංදු කතන්දරයක් ලෙස ඉදිරිපත් කිරීම ඔහු සතු විශේෂ හැකියාවකි. මාව බයිට් කරමින් කුරිරු සතුටක් ලබන පිරිසිදු හිතක් ඔහු සතුව ඇත.
ජීවිතය තුල අපිට සැබෑ මිතුදම් අහම්බයකින් හමුවේ. ඇතැම් විට අප ඒ මිතුදම් හඳුනාගත නොහැකිව මඟහැර ගනී. කෙනෙක් දෙස පිටතින් බලා නිගමන වලට යාමට පෙර සිතා බලන්න. සමහරවිට ඒ ඔබ සොයනා සැබෑ මිතුරා විය හැකියි. හදවතින් සුන්දර මිනිසුන් හඳුනා ගැනීම පහසු නැත. මන්ද ඔවුන් කිසි විටක තමන්ගේ යහපත් බව ලෝකයාට ඔප්පු කිරීමට උත්සාහ නොකරයි.
තමන් ලඟ නැති හොඳ මවනා බොහෝ දෙනෙක් ලඟ සැබවින්ම එම යහපත් ගුණාංගයන් නැත. සරල මිනිසුන් ලඟ තිබෙන සුන්දරත්වය පිටතින් පොෂ් යැයි කියා පෙන්වන මිනිසුන් ලඟ නැත. ලෝකයට පේන්නට රඟපාන මිනිසුන් බොහොමයක් ඉන්න සමාජයක් තුල ඔබටත් හිත හොඳ සැබෑ මිතුරෙක් ඉන්නවද… පිළිතුර ඔව් නම් ඔබ මෙලොව සිටින වාසනාවන්තයෙකි.
කවුරුන් කෙසේ කීවත් මිතුරන් කොපමණ සිටියත් අපේ ජීවිත කතා වල හිතට දැනෙන සැබෑ මිතුදම් ඇත්තේ අල්පයකි. මිතුදම් ඇති කරගැනීම පහසුය. රැකගැනීම අපහසුය. මිත්‍රත්වය මෙලොව පවතින සුන්දරම බැඳීමකි.
මිතුදම් හැමකල් සොඳුරුය. අයිතියක් ඇතිමුත් නැති ලෙස හිඳිනා අව්‍යාජ බැදීම් මිතුදම්ය. බොහෝ දෙනා පැවසූ රළු හිතේ හිමිකරු මාගේ හොඳම මිතුරා විය. එහෙත් මා දන්නා ඔහුට තිබෙන්නේ මෘදු හිතකි. ඔහු මාගේ මිතුරාය… ඒත් මහ නපුරාය… ලොව පවතින සොඳුරු මිතුදම් සැමදා පවතීවා යන පැතුම මා සිතේ ඇත. මිතුදම් වලට ජය…❤️✌️
Image Courtesy : https://bit.ly/2LX7CE0