එකම කිරුළක බලාපොරොත්තුවෙන් රොද බැඳුණු ශ්‍රී ලාංකේය සරසවි විද්‍යාර්ථීන්ගේ මහා කෙළි මංගල්‍යයේ හොකී තරග පසුගිය අගෝස්තු 2, 3 හා 4 යන තෙදින තුළ දී මාතර උයන්වත්ත ක්‍රීඩාංගණයේ දී සාර්ථක ව පැවැත්විණි. විශ්වවිද්‍යාල 14ක් එකිනෙකා පරයා තරග වදින මෙවර තරගාවලියේ නිල සමාරම්භයට පෙර පැවති ක්‍රීඩා ඉසව් 6න් එකක් වූ හොකී ඉසව්වේ පිරිමි අංශයේ ශූරයින් ලෙස පේරාදෙණිය විශ්වවිද්‍යාලයත්, කාන්තා අංශයේ ශූරියන් ලෙස සබරගමුව විශ්වවිද්‍යාලයත් අබිසෙස් ලැබූහ.
පිරිමි අංශය
විශ්වවිද්‍යාල කණ්ඩායම් දොළහක සහභාගිත්වයෙන් පැවති හොකී පිරිමි අංශයේ තරගය ආරම්භයේ පටන් ඉතා තියුණු ස්වරූපයක් ප්‍රදර්ශනය කළේ ය. ප්‍රධාන කාණ්ඩ හතරක් යටතේ දියත් වූ මූලික වටයේ තරගවල ප්‍රතිඵල මත ඒ ඒ කාණ්ඩයේ මුල් ස්ථාන දෙකට හිමිකම් කී කණ්ඩායම් අර්ධ අවසන් පූර්ව වටයට සුදුසුකම් ලැබී ය. ඒ අනුව A කාණ්ඩයෙන් රජරට හා කොළඹ විශ්වවිද්‍යාල කණ්ඩායම් ද, B කාණ්ඩයෙන් ශ්‍රී ජයවර්ධනපුර හා පේරාදෙණිය විශ්වවිද්‍යාල කණ්ඩායම් ද, C කාණ්ඩයෙන් මොරටුව හා සබරගමුව විශ්වවිද්‍යාල කණ්ඩායම් ද, D කාණ්ඩයෙන් යාපනය හා රුහුණ විශ්වවිද්‍යාල කණ්ඩායම් ද ඉදිරි වටයට සුදුසුකම් ලබද්දී නැගෙනහිර, ඌව වෙල්ලස්ස, වයඹ හා කැලණිය විශ්වවිද්‍යාල කණ්ඩායම්වලට මූලික වටයෙන් ම සිය බලාපොරොත්තු අත් හැර දමන්නට සිදු විය.
අර්ධ අවසන් පූර්ව වටයේ තරගවල දී යාපනය පරදා පේරාදෙණිය කණ්ඩායමත්, මොරටුව පරදා කොළඹ කණ්ඩායමත්, ශ්‍රී ජයවර්ධනපුර පරදා රුහුණ කණ්ඩායමත්, සබරගමුව පරදා රජරට කණ්ඩායමත් අවසන් පූර්ව වටයේ සිය ස්ථාන වෙන් කර ගැනීමට සමත් විය. ඒ අනුව රුහුණ හා කොළඹ විශ්වවිද්‍යාල කණ්ඩායම් පළමු අවසන් පූර්ව තරගයේ දී එකිනෙකා මුණ ගැසුණු අතර 2-1 ලෙස තරගය ජය ගත්තේ කොළඹ විශ්වවිද්‍යාල කණ්ඩායමයි. රජරට විශ්වවිද්‍යාල කණ්ඩායම සමඟ පැවති දෙවන අවසන් පූර්ව තරගයේ ජය 2-0 ලෙස පේරාදෙණිය විශ්වවිද්‍යාල කණ්ඩායම සතු විය.
පේරාදෙණිය හා කොළඹ විශ්වවිද්‍යාල කණ්ඩායම් අවසන් වටය සඳහා එලෙස සුදුසුකම් ලබද්දී තෙවන ස්ථානය වෙනුවෙන් රජරට හා රුහුණ විශ්වවිද්‍යාල කණ්ඩායම් තරග වැදුණි. තරගය 3-2 ලෙස ජය ගනිමින් රජරට විශ්වවිද්‍යාල කණ්ඩායම හොකී පිරිමි අංශයේ තෙවන ස්ථානය තමන් සතු කර ගැනීමට සමත් විය. ඉතා තියුණු මුහුණුවරක් ගත් අවසන් මහා තරගයේ අවසන් ලකුණු පුවරුව 1-0 ලෙස සටහන් වූයේ පසුගිය වර ශූරයින් වූ කොළඹ විශ්වවිද්‍යාලයෙන් එම ශූරතාවය උදුරා ගනිමිනි. ඒ අනුව පේරාදෙණිය විශ්වවිද්‍යාලය SLUG XIIIහි හොකී පිරිමි ශූරයින් ලෙසත්, කොළඹ විශ්වවිද්‍යාලය අනුශූරයින් ලෙසත් අබිසෙස් ලැබූහ.
කාන්තා අංශය
හොකී ක්‍රීඩාවේ පළපුරුදු ක්‍රීඩිකාවන් මෙන් ම විශ්වවිද්‍යාලයේ දී මුල් ම වරට හොකී පිත්තක් අතට ගත් ක්‍රීඩිකාවන් ද එක ම කණ්ඩායම් හැඟීමකින් තරග වැදුණ SLUG XIIIහි කාන්තා අංශයේ හොකී කිරුළ මෙවර දිනා ගත්තේ සබරගමුව විශ්වවිද්‍යාලයයි. පිරිමි අංශයේ මෙන් ම අග්නිදිග විශ්වවිද්‍යාලයත්, සෞන්දර්‍ය හා කලා විශ්වවිද්‍යාලයත් හැර සෙසු විශ්වවිද්‍යාල දොළහෙහි සහභාගීත්වයෙන් පැවති කාන්තා අංශයේ තරග ද ආරම්භයේ පටන් ඉතා තියුණු මුහුණුවරක් ප්‍රදර්ශනය කළේ ය.
ප්‍රධාන කාණ්ඩ හතරක් යටතේ දියත් වූ මූලික වටයේ තරගවල ප්‍රතිඵල මත ඒ ඒ කාණ්ඩයේ මුල් ස්ථාන දෙකට හිමිකම් කී කණ්ඩායම් අර්ධ අවසන් පූර්ව වටයට සුදුසුකම් ලැබී ය. ඒ අනුව A කාණ්ඩයෙන් රජරට හා මොරටුව විශ්වවිද්‍යාල කණ්ඩායම් ද, B කාණ්ඩයෙන් කැලණිය හා පේරාදෙණිය විශ්වවිද්‍යාල කණ්ඩායම් ද, C කාණ්ඩයෙන් සබරගමුව හා යාපනය විශ්වවිද්‍යාල කණ්ඩායම් ද, D කාණ්ඩයෙන් ශ්‍රී ජයවර්ධනපුර හා කොළඹ විශ්වවිද්‍යාල කණ්ඩායම් ද ඉදිරි වටයට සුදුසුකම් ලබද්දී වයඹ, ඌව වෙල්ලස්ස, නැගෙනහිර හා සත්කාරක රුහුණ විශ්වවිද්‍යාල කණ්ඩායම්වලට මූලික වටයෙන් ම සිය බලාපොරොත්තු අත් හැර දමන්නට සිදු විය.
අර්ධ අවසන් පූර්ව වටයේ තරගවල දී රජරට පරදා යාපනය කණ්ඩායමත්, මොරටුව පරදා සබරගමුව කණ්ඩායමත්, කැලණිය පරදා කොළඹ කණ්ඩායමත්, පේරාදෙණිය පරදා ශ්‍රී ජයවර්ධනපුර කණ්ඩායමත් අවසන් පූර්ව වටයේ සිය ස්ථාන වෙන් කර ගැනීමට සමත් විය. ඒ අනුව සබරගමුව හා කොළඹ විශ්වවිද්‍යාල කණ්ඩායම් පළමු අවසන් පූර්ව තරගයේ දී එකිනෙකා මුණ ගැසුණු අතර 5-2 ලෙස තරගය ජය ගත්තේ සබරගමුව විශ්වවිද්‍යාල කණ්ඩායමයි. යාපනය විශ්වවිද්‍යාල කණ්ඩායම සමඟ පැවති දෙවන අවසන් පූර්ව තරගයේ ජය 3-0 ලෙස ශ්‍රී ජයවර්ධනපුර විශ්වවිද්‍යාල කණ්ඩායම සතු විය.
තෙවන ස්ථානය වෙනුවෙන් කොළඹ හා යාපනය විශ්වවිද්‍යාල කණ්ඩායම් තරග වැදුණු අතර තරගය 4-0 ලෙස ජය ගනිමින් කොළඹ විශ්වවිද්‍යාල කණ්ඩායම හොකී කාන්තා අංශයේ තෙවන ස්ථානය තමන් සතු කර ගැනීමට සමත් විය. ඉතා තියුණු මුහුණුවරක් ගත් අවසන් මහා තරගයේ අවසන් ලකුණු පුවරුව 2-1 ලෙස සටහන් වූයේ SLUG XIIIහි කාන්තා හොකී කිරුළ සබරගමුව විශ්වවිද්‍යාලයට හිමි කර දෙමිනි. තරගාවලිය ආරම්භයේ සිට ම ඉහළ දක්ෂතා දැක්වීම නිසා මෙවර ශූරියන් වනු ඇතැයි බොහෝ දෙනා විශ්වාස කළ ශ්‍රී ජයවර්ධනපුර විශ්වවිද්‍යාලයට අනුශූරතාවෙන් සෑහීමකට පත් වීමට සිදු විය.
තම විශ්වවිද්‍යාලයේ ජයග්‍රහණය වෙනුවෙන් එකම කිරුළක බලාපොරොත්තුවෙන් තරග වැදුණු තමන්ගේ ම සොයුරු සොයුරියන් වෙනුවෙන් ඔල්වරසන් දෙන්නට, ඔවුන් ව දිනවන්නට, දිරි ගන්වන්නට, අභිප්‍රේරණය කරවන්නට විද්‍යාර්ථීන් විශාල පිරිසක් උයන්වත්ත ක්‍රීඩාංගණයට එක් රොක් ව සිටි අයුරු දැක ගන්නට ලැබිණි. ශූරයින්, අනුශූරයින් ලෙස අබිසෙස් ලැබූ කණ්ඩායම් ඇතුළු හොකී කිරුළ වෙනුවෙන් තරග වැදුණු සියලු ම විශ්වවිද්‍යාල කණ්ඩායම්වලට අපගේ සුබාශිංසන එක් කරන අතර දිනෙන් දින උණුසුම් වන SLUG XIII කෙළි බිමෙහි නවතම තොරතුරු දැන ගන්නට FOS Media අප සමඟ රැඳෙන මෙන් ඔබට ඇරයුම් කර සිටිමු.
Catch us on our official web site for SLUGXIII 2019.
Blogs|Videos|Scores and many more…
https://fos.cmb.ac.lk/slug2019/
Stay tuned with us for live updates…
#WeReportBestAtFirst
#FOSMedia
Image Courtesy – FOS Media