“වැලන්ටයින් දිනය” සෑම පුද්ගලයෙකුට ම තම අභිමතය පරිදි සැමරිය හැකි සුවිශේෂී ආදරණීය දිනයකි. “පෙම්වතුන්ගේ දිනය” ලෙස බොහෝ දෙනෙක් හඳුන්වන නමුත් වැලන්ටයින් දිනය මා හඳුන්වන්නේ ආදරය සඳහා වෙන් වූ විශේෂ දිනයක් ලෙසයි. ආදරය කියන මාතෘකාව සෑම මනුෂ්‍යයෙකු ම හා බැඳී පවතින සංකීර්ණ වූත් පැහැදිලි කිරීමට අපොහොසත් නමුත් හිත් තුළ හටගන්නා පොහොසත් ම හැඟීමකි.
ආදරය ලබන්නට කැමති බහුතරයක් අතරේ ආදරය කරන්නට දන්නේ සුළුතරයක් පමණයි. මා එසේ කියන්නේ වැලන්ටයින් දවසේ ආදරය නිසා දුක් වන බහුතරයක් නිසායි. මේ විදියට දුක් වන්නේ තනිකඩ අය විතරක් නම් නෙවෙයි, ආදරය කරන කෙනා සමඟ වැලන්ටයින් සමරන්න බැරි නිසා දුක් වෙන පිරිසක් වගේ ම තමන් බලාපොරොත්තු වූ තරම් හොඳින් වැලන්ටයින් සමරන්න බැරි වුණ පිරිසකුත් ඉන්නවා. වැලන්ටයින් සමරන පිරිස දිහා බලලා දුක් වෙන පිරිසක් වගේ ම වැලන්ටයින් සැමරූ ආකාරය සංසන්දනය කර දුක් වන පිරිසකුත් ඉන්නවා. වැලන්ටයින් ගැන දන්නෙ නැතිව වගේ ම දැනගෙනත් සාමාන්‍ය ලෙස වැලන්ටයින් දිනය ගත කරන පිරිසකුත් ඉන්නවා. ඒ වගේ ම ආදරයට වාණිජමය වටිනාකමක් ලබා දී ආදරයෙන් මුදල් උපයන දිනයක් ලෙසත් යොදා ගන්නා පිරිසක් වර්තමානය වන විට බිහි වී සිටිනවා.
වැලන්ටයින් සැමරීම හෝ ප්‍රතික්ෂේප කිරීම තමන් සතු අයිතියකි. නමුත් වැලන්ටයින් සමරන පිරිස දෙස ද්වේෂ සිතින් නො බලන්න. තනිකඩ පිරිසට ද වැලන්ටයින් සැමරිය හැකි ය. එය තීරණය කළ යුත්තේ ඔබ ය. තමන් තමා වෙත දක්වන ආදරය අනෙක් සෑම ආදරයකට ම වඩා ප්‍රබලය. මන්දයත් තමන්ගේ වගේ ම තමන්ට ආදරය කරන පිරිසෙත් සතුට රැඳී පවතින්නේ ඒ මත ය. තමන්ට ආදරය නො කරන කෙනෙකුට තව කෙනකුට හානියක් නො වන අයුරින් ආදරය කළ නොහැකි ය. තමන්ට ආදරය කරන පුද්ගලයා නිතර ම තමන් ආදරය කරන පුද්ගලයන්ට මානසික පීඩාවක් ලබා නො දෙයි. එම නිසා ඔබත් වැලන්ටයින් දිනයේ ඔබට ම ආදරය කරන්න පුරුදු වෙන්න. ඔබ කැමති දෙයක් ඔබ වෙනුවෙන් ම කරන්න. ඔබට පුළුවන් තනිව ම වැලන්ටයින් සමරන්න කිසිවකු මත නොයැපී ම.
වැලන්ටයින් සමරන ආදරවන්තයන් ආදරවන්තියන් අනාගතයේ පසුතැවීමට සිදු නොවන අයුරින් වැලන්ටයින් සැමරීම තමන් සතු වගකීමක් බව නිතරම සිහියේ තබාගන්න.ඒ වගේ ම වැලන්ටයින් සමරන ආකාරය අනුව තව කෙනෙක්ගේ ආදරය ගැන අර්ථකථනයන් ලබා නො දෙන්න. මන්දයත් දෙදෙනෙකු අතර පවතින බැඳීම ඉන් පිටත සිට බලන පුද්ගලයෙකුට නිගමනය කළ නොහැක. තම පෙම්වතා හෝ පෙම්වතිය සමඟ ඔබත් කැමති නම් වැලන්ටයින් සමරන්න. නමුත් කිසිවිටක ඔබගේ සැමරුම තවත් කෙනකු සමඟ සංසන්දනය නො කරන්න. සුබ පැතුම් කාඩ්පත්, නැවුම් මල් පොකුරු, චොකලට් සහ විසිතුරු තෑගි ආදිය වැලන්ටයින් දිනය වෙනුවෙන් බහුල ලෙස පෙම්වතුන් අතර හුවමාරු වේ.
ඔබට පුළුවන් වැලන්ටයින් දිනය ඔබ වැඩියෙන් ම ආදරය කරන පුද්ගලයන් සමඟ සමරන්නත්, ඒ ඔබේ පවුලේ සාමාජිකයන් හෝ හොඳම යහළුවා විය හැකියි. කිසිම මුදලක් වැය නො කර ඔබගේ හිතේ ඇති ආදරය ප්‍රකාශ කිරීමෙන් ඔබ ආදරය කරන කෙනෙක් සමඟ සතුටින් කාලය ගත කිරීමෙනුත් ඔබට වැලන්ටයින් සැමරිය හැකියි.වැලන්ටයින් දිනය සඳහා ත්‍යාග ලබාදීම හෝ ලැබීම අනිවාර්යය නොමැති නිසා ඔබ නොදන්නා පුද්ගලයකුගේ වෙළඳ අරමුණු ඉටු කරගැනීමට සහය දක්වන්නට නොහැකි වීම පිළිබඳ ඔබ කිසිවිටක දුක් වීමට අවශ්‍ය නැහැ.
වැදගත් ම දෙය නම් ආදරය වෙනුවෙන් වැලන්ටයින් දිනය තිබෙන අතර ආදරය තිබෙන්නේ වැලන්ටයින් දිනය වෙනුවෙන් නොවන බව සිහියේ තබා ගැනීමයි. ආදරය කරන්නට දිනයක් වෙන් කළ යුතු නොවේ. ඔබ මුළු හදවතින් ම ආදරය කරන මිනිසුන් වෙනුවෙන් ඔබ සතුව ප්‍රමාණවත් තරම් කාලයක් තිබෙනු නිසැක ය. එලෙස ම බැඳීමක පැවැත්ම ආදරය මත පමණක් තීරණය නොවේ. ඒ නිසා තේරුම් ගෙන ආදරය කරන්න. විශ්වාසයෙන් ජීවත් වන්න. ඔබට සතුටින් ජීවත් වීමට තරම් ආදරයක් ඔබ වෙනුවෙන් ඔබ සතුව ඇත. අමතක නො කර තමන්ටත් ආදරය කරන්න. වැලන්ටයින් තිබුණත් නැතත් ආදරයෙන් සිත පුරවාගෙන ජීවත් වන්න. එතකොට හැමදාම වැලන්ටයින් දවස වගේ ආදරය වෙනුවෙන් ම හැම දවසක් ම ඔබ සතුව තිබේවි.
Image Courtesy:
Featured Image; https://bit.ly/2LppIQd