අද සැප්තැම්බර් මාසෙ දහවැනිදා, අද තමයි ලෝක සියදිවි නසාගැනීම් වැළැක්වීමේ දිනය.

අද දිනය ඇවිල්ලා මිනිසුන්ගේ මානසික සෞඛ්‍යය ගැන ප්‍රශ්න, ගැටලු ආදිය විවෘතව කතාබහ කිරීම ගැන පුළුල් කතිකාවතක් ඇතිවිය යුතු දිනයක්. ලෝක සෞඛ්‍ය සංවිධානයේ දත්තයන්ට අනුව වාර්ෂිකව ලෝකය පුරා පුද්ගලයින් ලක්ෂ අටකටත් වඩා සියදිවි නසාගැනීම් නිසා ජීවිතක්ෂයට පත්වෙනවා. ඒ හැම මරණයක් පිටිපස්සෙ ම ලෝකයාගෙන් ඔවුන් සැඟවුව ඔවුන්ගේ ම රිදෙන, දුක්ඛිත කතාවක් ඇති.

මම විශ්වාස කරන විදිහට ලෝක සියදිවි නසාගැනීම් දර්ශකයේ උඩ තැනක ඉන්න රටක් විදිහට මේ මාතෘකාව ඇවිල්ල අද විතරක් නෙවෙයි හැමදාටම කතා කරන්න ඕන මාතෘකාවක්.

ඇත්තටම ඇයි කෙනෙක් ඒ වගේ තීරණයකට යන්නෙ කියන කාරණය අපි මුලින්ම හොයල බලමු.

ලෝකය ගෝලාකාරයි, මිනිසුන් විවිධාකාරයි, ඒ ඒ මිනිස්සු එදිනෙදා ජීවිතයෙ මුහුණ දෙන ප්‍රශ්න විවිධාකාරයි. එයාල ඒවට උත්තර හොයන ක්‍රම විවිධාකාරයි. ඉතින් ඇතැම් වෙලාවට කෙනෙක්ට ජීවිතයෙ තමන්ව පෙළන යම්කිසි ප්‍රශ්නයක අන්තයටම ගියහම ඒ වගේ තීරණයක් ගන්න වෙනවා. නමුත් ඒ වගේ වෙලාවක ඒ පුද්ගලයා ගන්න තීරණයට අවට සමාජය කියන දේවල් අපිට අහන්න ලැබෙනවා. මම විශ්වාස කරන විදිහට කාටවත්ම අයිතියක් නෑ තව මනුස්සයෙක් ගත්තු තීරණයක් ගැන, විශේෂයෙන් ඒ මනුස්සය මුහුණ දුන්නු ප්‍රශ්නයෙ දිග, පළල, ගැඹුර ගැන හාංකවිසියකවත් අවබෝධයක් නැතුව ජජ් කරන්න. නමුත් මිනිස්සු කරන්නෙම ඒක.

ඇත්තටම මනුස්සයෙක් එහෙව් තීරණයකට යන්නෙ එකපාරින් නෙවෙයි, ඒක ඇවිල්ල ආවට ගියාට ගන්න ජාතියෙ තීරණයක් නෙවෙයි. එයා එතනට යන්නෙ පියවරයන් ගණනාවක්ම පහුකරලා. ඒ කෙනා එතනට යනකොට පුදුමාකාර විදිහට බිඳිලයි ඉන්නෙ. ඒ කෙනාගෙ හිත කෑලි කෑලිවලට කැඩිල තියෙන්නෙ .

සමහරවිට මේ වෙලාවෙ ඔබේ සමීපතම කෙනෙක් එතනට යන ස්ටෙප් එකක් පහුකරනවා ඇති. කරුණාකරල ඒ කෙනාව හඳුනාගන්න. ඒ කෙනාට හොඳින් සවන්දෙන්න. බොහොමයක් වෙලාවට එහෙව් කෙනෙක්ට සවන්දීමක්, හොඳ ඇහුම්කන්දීමක් කියන්නෙ විශාල දෙයක් වෙන්න පුළුවන්. එහෙව් කෙනෙක්ට ඒ අවස්ථාවේ අවශ්‍ය ඇහුම්කන්දීමක් විතරක් ම වෙන්නත් පුළුවන්.

ඉතින් ඔබට පුළුවන් ඒ කෙනාට හොඳින් සවන්දීලා, ඒ කෙනාව දැඩිව පෙළන ගැටලුවට සවන්දීලා, ඒ කෙනාට වචනයකින් හරි හයියක් වෙන්න බලන්න. වචන කියන්නෙ අතිශයින්ම බලවත් ආයුධ. ඒවට කෙනෙක්ව මරන්නත් පුළුවන්. ඒ වගේම මැරෙන්න ඉන්න, ඒ ආසන්න තත්වයේ ඉන්න කෙනෙක්ව ජීවත් කරවන්නත් පුළුවන්. ඒක මම මහ පොළොව උඩ අත්දැකල තියෙනවා.

වචනවලින්, තමන්ගෙ ක්‍රියාවන්ගෙන් මනුස්සයෙක් මරන කෙනෙක් නොවී මනුස්සයෙක් ජීවත්කරවන කෙනෙක් වෙන්න.

ඒ වගේම මෙවැනි අවස්ථාවන් වෙනුවෙන් අපි වෙනුවෙන් ඉන්න ශ්‍රී ලංකා සුමිත්‍රයෝ, ජාතික මානසික සෞඛ්‍ය ආයතනය වැනි සංවිධානයන් සහ ආයතනයන් අමතක කරන්න බෑ. ඔවුන් ඔබ වෙනුවෙන් පුරා පැය විසි හතරම, සතියේ දින හත පුරාම නිරන්තරයෙන් කැපවී සිටිනවා. පසුගිය කාලය පුරාවටම අකාලයේ මිලින වන්නට ගිය ජීවිත බේරාගැනීමට ඔවුන්ගෙන් ඉටු වූ කාර්‍යභාරය අනභිභවනීය සහ උත්තුංග එකක්.

සමහරවිට මේක කියවන ඔබ මේ ගතකරන්නෙ ඔබේ ජීවිතයෙ අමාරුම, අපහසුම කාලයක් වෙන්න ඇති. ප්‍රශ්න පිට ප්‍රශ්න එනව ඇති, ඒ ප්‍රශ්නවලින් ඔබ හොඳටම හෙම්බත් වෙලා ඇති, වැඩ වැඩි ඇති , “දැන් ඇති” කියල අනන්ත වාරයක් හිතෙනව ඇති, මේ හැමදේකින්ම නිදහස් වෙන්න ඕනි කියල හිතෙනව ඇති.

ඕනිම මනුස්සයෙක්ගෙ ජීවිතයෙ අමාරු කාල එනව. ඒ කාලෙට ප්‍රශ්න පිට ප්‍රශ්න එනකොට හිතෙන්න පුළුවන් ඒ දේවල් වෙන්නෙ තමන්ව විනාසකරන්න, නැත්තටම නැතිකරල දාන්න කියල. “ඇයි මටම මෙහෙම වෙන්නෙ ?” කියල හිතෙනව ඇති අනිවාරෙන් ම.

ඇත්තටම ඒ දේවල් වෙන්නෙ හේතුවක් ඇතුව. ඒ තමන් තුළ තියෙන තමන්වත් නොදන්න තමන්ගෙ ශක්තිය තමන්ටම පෙන්නන්න. තමන්ගෙ දරාගැනීමේ සීමා මායිම්, දරාගැනීමේ හැකියාවන් කොච්චර ද කියල පෙන්නන්න. තමන් එක්ක ඒ වෙලාවට ඉන්නෙ කවුද, නොඉන්නෙ කවුද, තමන්ට හැබැවින්ම ආදරේ කවුද, නැත්තෙ කවුද කියන දේවල් පෙන්නන්න.

ඒක ඇවිල්ල ජීවිතයෙ එක්තරා විදිහක පරීක්ෂණයක්.

ඒ වගේ කාලවල කරන්න තියෙන්නෙ අල්ලගෙන, දරාගෙන ඉස්සරහට යන එක. මොකද ජීවිතය කියන්නෙ One way journey එකක්. ආයෙ හැරෙන්න බෑ. ඉස්සරහටම යනව හැරෙන්න වෙන ඔප්ශන් එකක් නෑ.

ඒ අමාරු කාල අවසානයේ බිහිවෙන්නෙ වෙනස්ම මනුස්සයෙක්. ඒ මනුස්සයා කලින් හිටපු කෙනාට වඩා ප්‍රශ්නවලින් පදම් වෙලා පන්නරය ලබපු ශක්තිමත් කෙනෙක් වෙන්නත් පුළුවන්. එහෙම නැත්තං ප්‍රශ්න නිසා හැමදේම එපා වුණු දුර්වල, බිඳුණු කෙනෙක් වෙන්නත් පුළුවන්. ඒ දෙකෙන් මොන කෙනා වෙනවද කියන එක ඔබට අයත් ඔබගේ තීරණයක්.

අමාරු කාලවල අල්ලගෙන, දරාගෙන, තමන් ගැන විශ්වාසය තියල හැමදේම හරියන ලස්සන දවස් හොයාගෙන ඉස්සරහට යමු. එහෙම හරිගිය දවසක ඔබට ලෝකය ඉස්සරහ කියන්න කතාවක් තියේවි. එදාට ඔබට ඒ කතාව ඔබ කාලෙකට කලින් පහුකළා වගේම ජීවිතයෙ අමාරු දවස් පහුකරගෙන යන ඔබ වගේම අයට වාරුවක්, හයියක් වේවි. අතාරින්න එපා. අල්ලගෙන දරාගෙන විශ්වාසයෙන් ඉස්සරහට යන්න. අහිමිවුණු දේවල්වලට, දාල ගිය මිනිස්සුන්ට, අමාරු දවස්වලට කටපුරා ස්තූතියි කියල කියන්න දවසක් එනවමයි .

“මිස්වෙන දේවල් හොඳම දේවල් නෙවෙයි සහ ජීවිතයෙ හොඳම දේවල් කවමදාවත් මිස්වෙන්නෙ නෑ… “

නමුත් ඔබට ඒ මිස්වෙන කිසිම දෙයකට ජීවිතය මිස්කරගන්න ඉඩ තියන්න එපා. මොකද ජීවිතය කියන්නෙ මොනම හේතුවක් නිසා හෝ මිස්විය නොයුත්තක්.

“නොරිදවා, නොරිදවී ජීවත්වෙන්න.”

Written By : Wikum Sanjith Ranaweera

Image Courtesy :https://bit.ly/3PERNRN