පුරා මාසයක කාලයක් මුළුල්ලේ, තරඟ ඉසව් විසි නවයක් යටතේ කලඑළිගැන්වෙන ක්‍රීඩා කෞශල්‍යයත්, සහෝදර බැඳීමත් කැටිකර ගත් කොළඹ විශ්ව විද්‍යාලයීය නවකයන්ගේ “2019 කුළුඳුලේ හටනේ”, සිව් වන තරඟ ඉසව්ව ලෙසින් “කැරම්” මාර්තු මස විසිනව වන දා විශ්ව විද්‍යාලයීය ගෘහස්ථ ක්‍රීඩාගාරයේ දී ආරම්භ විය. සියලුම තරඟ ඉසව් පැවැත්වීමට කාල වේලාව ප්‍රමාණවත් නොවීම හේතුවෙන්, විසිනවය සහ තිහ යන දෙදින පුරාවට තරඟ වට දියත් කිරීමට සිදු විය. ඉවසීමත්, නිවැරදි ඉලක්කයත්, සුදුසුම තීරණයත් වඩාත් උචිත මොහොතේදී යොදා ගනිමින්, ප්‍රතිවාදී පිලට කලියෙන් අවම වාර සංඛ්‍යාවකින් ඉත්තන් දහයක් වලට දැමීමේ මේ සුන්දර ක්‍රීඩා ඉසව්ව කොළඹ විශ්වවිද්‍යාලයීය විද්‍යාර්ථයින්ගේ ක්‍රීඩා හපන්කම් මනාව පිළිබිඹු කිරීමට සමත් විය. පිරිමි හා කාන්තා අංශ වෙනුවෙන්, පීඨ හා අනුබද්ධිත ආයතන නියෝජනය කරමින් කණ්ඩායම් 09 බැගින් තරගාවලිය සඳහා සහභාගී විය. කුසලානය තම පීඨය සතු කර දීමේ ඒකායන අරමුණින්, ඉතාමත් තියුණු තරඟාවලියකින් අනතුරුව, පිරිමි අංශයේ ශූරතාවය කළමනාකරණ හා මූල්‍ය පීඨ කණ්ඩායම විසින් දිනා ගත් අතර, කාන්තා අංශයේ ශූරතාවය විද්‍යා පීඨ කණ්ඩායම විසින් දිනා ගනු ලැබිණි.
පිරිමි අංශය
පළමු ස්ථානය කළමනාකරණ හා මූල්‍ය පීඨ කණ්ඩායම
දෙවන ස්ථානය යූ.සී.එස්.සී. කණ්ඩායම
තෙවන ස්ථානය විද්‍යා පීඨ කණ්ඩායම
සිව්වන ස්ථානය ශාස්ත්‍ර පීඨ කණ්ඩායම
වෛද්‍ය පීඨ කණ්ඩායම, නීති පීඨ කණ්ඩායම, තාක්ෂණ පීඨ කණ්ඩායම, හෙද පීඨ කණ්ඩායම සහ ශ්‍රීපාලි කණ්ඩායම යන කණ්ඩායම් වලට සහභාගීත්වයෙන් සෑහීමට පත්වන්නට සිදුවිය.
කාන්තා අංශය
පළමු ස්ථානය විද්‍යා පීඨ කණ්ඩායම
දෙවන ස්ථානය වෛද්‍ය පීඨ කණ්ඩායම
තෙවන ස්ථානය කළමනාකරණ හා මූල්‍ය පීඨ කණ්ඩායම
සිව්වන ස්ථානය හෙද පීඨ කණ්ඩායම
යූ.සී.එස්.සී. කණ්ඩායම, නීති පීඨ කණ්ඩායම, ශාස්ත්‍ර පීඨ කණ්ඩායම, තාක්ෂණ පීඨ කණ්ඩායම සහ ශ්‍රීපාලි කණ්ඩායම යන කණ්ඩායම් වලට සහභාගීත්වයෙන් සෑහීමට පත්වන්නට සිදුවිය.
ලකුණු පුවරුවෙන් පෙන්නුම් කළ සමස්ත ප්‍රතිඵලය අනුව, “කැරම් කිරුළ” සම ශූරතාවය, කළමනාකරණ හා මූල්‍ය පීඨ කණ්ඩායම සමඟින් විද්‍යා පීඨ කණ්ඩායම දිනා ගැනීමට සමත් වූ අතර සම අනුශූරතාවය දිනාගැනීමට යූ.සී.එස්.සී. කණ්ඩායම සමඟින් වෛද්‍ය පීඨ කණ්ඩායම සමත් විය. හදවත සිප ගත්, රසබර මතකයන් රාශියක් සමඟින්, දිනෙන් දින උණුසුම් වන, 2019 නවක හටනේ තවත් එක් සොඳුරු පරිච්ජේදයක් මෙසේ සනිටුහන් වූ වගයි.
Written by : Ishanka Nirodha
Image Credits: https://bit.ly/2V7ZW2F